Prof Fanie Snyman

Prof Fanie Snyman

Tans Prof in Ou Testament aan die Universiteit van die Vrystaat.




Prof Francois Malan

Prof. Francois Malan

Francois Stephanus Malan B.A. D.D. (UP) gebore Wolmaransstad 1934.10.17. (Getroud met Nesta Hartzer; 8 kinders; 14 kleinkinders)Francois_Malan

Legitimasie Universteit van Pretoria 1958; Ordening NGSendingkerk van Transvaal, Johannesburg 1959.

Sendeling van die NGKerk in Johannesburg (1959-1970) en op die sendingstasie Kranspoort (distrik Louis Trichardt; 1970-1972)

Dosent in Nuwe Testament aan die Stofberg Teologiese Skool by Turfloop en professor aan die Universiteit van die Noorde (distrik Pietersburg; 1972-1994)

Leraar NG Gemeente Renosterpoort (Pietersburg; 1994-1999)

Emeritus 1999-  

Doktorale proefskrif: Paulus se aanwysings in 1 Korintiërs 7 ten opsigte van die huwelik en die ongehude staat. 




“Huisskoonmaak”

“Huisskoonmaak”

Theo Visser vra:

Daar doen ‘n CD die rondte wat “huisskoonmaak” hanteer. Daarin word gelowiges aanbeveel om van sekere items wat moontlik in die huis kan voorkom, ontslae te raak –  byvoorbeeld beeldjies van feetjies of kabouters. Sulke items sou dan glo oop deure vir die bose wees . Ek glo nie ek onderskat die krag van die bose nie , maar maak hierdie mense afleidings wat nie gestaaf kan word deur behoorlike bestudering van die Woord nie? Ek glo so. (Ek het nog nie self die CD onder oë gehad nie so ek weet nie wie dit uitgee nie.)

Antwoord van Prof Jan van der Watt:

Theo Visser skryf dat daar ‘n CD die rondte doen wat aanbeveel dat gelowiges  met “huisskoonmaak” te doen het. Dit beteken dat daar by gelowiges aanbeveel word om van sekere items wat moontlik in die huis kan voorkom, ontslae geraak moet word, byvoorbeeld. beeldjies van feetjies, kabouters of ander vreemde beelde. Sulke items sou dan glo oop deure vir die bose wees.

Die vraag is: kan ʼn beeldjie of ʼn hangertjie duiwelse magte so oor my kan laat losbreek dat ek maar net magteloos kan toekyk hoe die duiwel my siek maak of dinge vir my en my huis kan laat skeefloop? Moet ʼn mens bang wees vir duiwels of demone wat in ʼn stukkie juweliersware of in een of ander beeldjie in jou huis rondlê? Beteken dit regtig dat die duiwel in die geheim hierin wegkruip om jou in oomblikke van swakheid te bekruip?

Ek moet sê dat ek regtig wens dat geestelike kragte in sulke hangertjies, beeldjies of tekens kon wegkruip. Dit sou beteken dat dit ook van kruisies of beeldjies van Jesus waar moes wees. Immers as geesteskragte in hangertjies kan wegkruip, kan dit mos nie net van die duiwel waar wees nie – dit moet ook van Christus waar wees. En nou die rede hoekom ek wens dat dit waar sou kon wees: Christus is mos baie sterker as die duiwels. As jy dus ‘n kruisie om jou nek hang, sou dit moes beteken dat Christus so besit neem van jou lewe, net soos mense beweer dat ‘n satanshangertjie of beeldjie die duiwel besit van jou laat neem. Maar ons weet dit werk nie so nie. Ons weet mos jy kom nie skielik jou eksamen deur deur ‘n kruisie om jou nek te hang nie of kom nooit in ‘n ongeluk omdat jy die Christelike vis-teken agter op jou kar plak nie.

Daar kruip nie bonatuurlike kragte in metaalhangertjies, vissies op ‘n kar of beeldjies in ‘n huis weg nie. ‘n Kruisie om jou nek is maar net ‘n stukkie metaal. Die krag lê nie daarin nie, maar in die Here wat aan die kruis vir ons gesterf het. Die kruisie is net belangrik omdat dit ons aan die Here Jesus herinner.

So ‘n Christelike of satansteken is maar net ‘n rigtingwyser, iets wat jou herinner aan die persoon waarvoor die kruisie of satansteken staan. ‘n Teken of simbool is maar net ‘n rigtingwyser. Veronderstel jy sien ‘n padteken met ‘n petrolpomp op. Daardie padteken het self niks petrol in hom nie. Om die waarheid te sê, hy het niks met ‘n pomp te doen nie. Maar wat daardie padteken wel doen is om vir jou in die rigting te wys van waar jy dit waarvoor die padteken staan kan kry, naamlik petrol. Die padteken vertel dus van iets anders. Die kruisie om jou nek is nie Jesus nie, maar net ‘n rigtingwyser na Hom toe. Dit herinner jou net aan die Een waarvoor die kruis staan. Volg jy die rigting wat die kruis op dui, kom jy by Jesus uit. Net so is ‘n satansteken of beeld nie die satan self nie. Volg jy egter die rigting wat die satansteken vir jou aandui sal jy by die satan uitkom.

Dit bring ons nou by die werklike gevaar van duiwelstekens uit. As die satansteken op jou hangertjie jou gedurig aan die duiwel laat dink moet die rooi ligte aangaan. Dan raak die satan gevaarlik omdat jy hom toelaat in jou gedagtes. As dit gebeur dat ek elke keer wat ek my hangertjie aansit of die beeldjie sien, onwillekeurig aan Satan dink, is dit die eerste tree in die verkeerde rigting. Dis soos ‘n mot wat in die eerste draadjie van ‘n spinnerak vasvlieg. As hy hard genoeg ruk, kan hy wegkom, maar as hy in nog en nog draadjies verstrengel raak, gaan dit vir hom te veel raak. As ek meer en meer plek vir die duiwel in my gedagtes gee sal die duiwel later ‘n goeie vastrapplek hê.

Die goue reël is dus: as jou hangertjie of beeldjie jou aan satan herinner raak dan dadelik daarvan ontslae.

Maar nou hoe presies lyk satanstekens? Daar is sekere bekende satanstekens soos ‘n bokkop in ‘n vyfpuntige ster. Tog kan ‘n mens die vraag eers regtig goed beantwoord as jy begryp wat ‘n  simbool is. ‘n Simbool soos die padteken wys na iets anders. Die simbool van die kruis wys byvoorbeeld na Jesus Christus. Ons maak dus in ons gedagtes ‘n koppeling tussen die kruis en die persoon van Jesus Christus. ‘n Satansteken weer sal enige iets wees wat jou ‘n koppeling of verbinding met die duiwel laat maak. Met ander woorde as iemand byvoorbeeld sê dat ‘n beeld in jou huis ‘n satansteken is en dit laat jou elke keer aan satan dink, word daardie beeld vir jou ‘n satansteken. As daardie selfde beeld ‘n ander persoon glad nie aan satan laat dink nie, is dit vir hom nie ‘n  satansteken nie, want dit laat hom nie aan Satan dink nie. Dit beteken dat ons as Christene dikwels vir Satan ‘n klomp wapens in sy hande sit, deur allerhande dinge satanstekens te noem. Op die manier maak ons lekker deure vir satan oop om nes te gaan maak in die gedagtes van ons jongmense. ‘Satansjagters’ doen satan soms meer gunste aan as wat hulle hom beveg. Hulle blaas satan so groot op dat hy groot dele van die denke en drome van ons jongmense vul. Ja-nee, dit is gevaarlik om die duiwel meer mag en publisiteit te gee as wat hy toekom.

‘n Beter opsie sou wees om jou liewer met die tekens waarop jy trots kan wees te assosieer. Dra liewer ‘n hangertjie, koop ʼn beeldjie of gebruik ‘n boekmerkie wat jou aan Jesus herinner. Laat Hy jou gedagtes vul. 

 

Outeur: Prof Jan van der Watt

 




Vir wie moet ek stem – Vraag

Vir wie moet ek stem? – Vraag

Kobus Rudolph vra die volgende vraag:

Na aanleiding van ‘n braaivleisgesprek – Wat kan ons as radiostasie aan ons luisteraars voorhou? Hoe besluit ons – as kinders van die Here – vir wie ons moet stem tydens die nasionale verkiesing? Is daar ‘n korrekte Bybelse antwoord?

Antwoord:

Die Bybel skryf natuurlik nie voor watter party ʼn mens moet ondersteun nie. Tog het die Bybel iets oor ons stemgedrag te sê. Dit hang natuurlik met ons burgerskap van ʼn land saam.

a) Die eerste saak wat ons moet uitklaar om die vraag te beantwoord, is: wat is die pligte van die staat of regering. Daar is ʼn paar belangrike gedeeltes wat ons hier na moet kyk:

  •          In Romeine 13:1-7 lees ons dat God die regering ingestel het om sy mense goed te regeer. Dit is ʼn ryk gedeelte maar dit is vir eers genoeg om te weet dat dit God se wil is dat daar mense is (ʼn regering) wat moet sorg dat die staatsburgers veilig kan leef en dat alles so georganiseer word dat die manier waarop mense saam leef in ʼn land vir almal goed en veilig is. Die staat moet dus na sy mense kyk, selfs ook as hulle swaarkry of nie werk het nie. Die swaardmag van die staat beteken dat die staat die reg het om mense te straf wat die goeie orde van die land in die wiele ry of teëwerk. Om dit anders te stel, die staat het die verantwoordelikheid om toe te sien dat as ek die oggend by my huis uitstap, my neus nie afgeskiet word nie, dat daar darem ʼn moontlikheid vir werk is en dat ek darem mark toe kan gaan om kos te koop.
  •          Die gedagte word op ʼn ander manier in 1 Petrus 2:13-17 teruggevind. Hier moet ons onthou dat Petrus se gemeente vervolg is – die samelewing en die staat het dit dus nie vir hulle maklik gemaak nie. Nogtans vra Petrus sy gemeente om die regeerders te respekteer. Waarom? Om dieselfde rede as by Romeine. As die staat omver gewerp word, wie gaan dan toesien dat die orde en veiligheid gehandhaaf word? Die implikasie is dus dat as ʼn mens die regering wil verander moet dit ordelik plaasvind sodat die basiese vereistes vir ʼn goeie, veilige en behoorlike samelewing gehandhaaf word. Daarom vra hy ook dat die gemeente te midde van die vervolging bly goed doen.
  •          As ons na Openbaring 13:1-10 gaan, word die regering van die dag met die dier uit die see verbind. Hulle vervolg die kerk en maak die gemeentelede selfs dood. Weereens word daar nie gesê dat die gelowiges met wapens die staat omver moet gooi nie, maar in Openbaring 10-11 word die profetiese boodskap as die wapen van die gelowiges beskryf. Gelowiges moet nie stilbly nie, maar moet deelneem – nie met wapens nie, maar met die boodskap van God. Die boodskap soek natuurlik reg en geregtigheid, vrede en voorspoed.

As ons dus na die drie dele kyk, het al drie dieselfde boodskap – neem deel en moenie afbreek nie, want as die staat weg is, wie gaan dan vir behoorlike omstandighede om in te leef, sorg? Moet egter nie stilbly nie, maar verkondig die boodskap van God in die proses duidelik. Laat die boodskap seëvier.

b) Met die breë buitelyne het ons al ʼn ent gevorder – ons moet deelneem sodat die orde en goeie dinge kan seëvier in die omstandighede waarin ons leef. Dit beteken dat ons moet stem, want dit is ons klein manier waarop ons aan die totstandkoming van die regering kan deelneem.

c) Die gevaar bestaan egter altyd dat ons ʼn bepaalde politieke agenda met die God se woord kan verwar. Dit mag natuurlik nooit gebeur nie. God se woord laat sigself nie in ʼn enkele politieke beleid vasvang nie. Daarom kan daar Christene wees wat vir verskillende partye stem.

d) Wat motiveer Christene om vir verskillende partye te stem? Wel, ʼn mens moet na die beleid (en geskiedenis) van ʼn politieke party kyk en dan jou eie evaluasie maak. Jy moet opweeg of die party die goeie vir die landsburgers nastreef, of die party die vrede in die land handhaaf, of die party vir die mense van die land sorg in terme van werk en kos, ens. Jy moet kyk of die party staan vir dit wat goed is in die lig van jou Christenskap. Daarom kan jy ook vra hoe die party teenoor jou geloof en godsdiens staan. Christene kan in hulle evaluasies verskil en daarom ook vir verskillende partye stem. In alle geval, geen party is volmaak nie en daar is positiewe en negatiewe kante aan alle partye. Dit moet opgeweeg word en dan moet jy jou keuse maak. Ten minste moet ʼn mens dan net eerlik teenoor jou gewete wees. 

 

Outeur: Prof Jan van der Watt