Die bende van die duiwel (Bose Geeste)

Is daar bose geeste? Die Bybel sê daar is magte en invloede en gebeure wat nie goed is nie, om dit nou maar sagkens te stel. Om die waarheid te sê, dit is boos en dit beïnvloed ons almal.

Om dit te verduidelik gebruik die Bybel ʼn beeld van ʼn koning of prins wat oor ʼn koninkryk regeer. Hy het sommer baie name. In Johannes (12:30-31) word die leier of duiwel byvoorbeeld die “prins/leier van hierdie wêreld” genoem en op ander plekke die slang van ouds, die draak of ook sommer Satan (Openbaring 12:9).

Om jou te kan voorstel hoe die Satan en sy magte werk, moet jy dink aan ʼn leier wat in ʼn koninkryk regeer. Die leier het baie helpers/diensknegte, die demone en bose geeste, wat hom op verskillende maniere in sy koninkryk moet dien, help en bystaan. So is die duiwel die leier van groot groepe demone, bose geeste en so aan. Elkeen van hierdie demone of geeste het sy eie werk en dit is beslis nie om goed te doen of soet te wees nie. So lees ons soms in die Bybel van bose geeste, ander kere van demone of van die duiwel self. Bose geeste is dus die anti-goddelike magte wat God se saak in die wêreld probeer verongeluk. En een van die hoof slagvelde tussen God en Satan is tussen en in mense. Daar word om mense se lojaliteit en siele geveg.

In die lig moet ons ook die opmerkings in die Bybel sien dat Jesus oorwin het. Dit was twee magte wat mekaar die stryd aangesê het en die Here Jesus het gewen. Nou is daar nog so bietjie weerstand van die duiwel se kant, maar hy het klaar verloor.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Bloed van Jesus

Bloed is vir die meeste van ons maar grillerig. Daarom wonder party van ons waarom Jesus dan sy bloed moes gee vir ons sondes. Wel, om dit te verstaan moet ons kyk wat die Bybel presies daarmee bedoel.

Die lewe is in die bloed, het die Bybelse mense gesê, want as iemand baie bloei, gaan die persoon dood… sy lewe loop uit hom uit, om dit nou maar so te stel. Bloed en lewe is sye van dieselfde munt.

ʼn Tweede ding om te weet: mense het destyds ooreenkomste gemaak (verbonde gesluit). So ʼn ooreenkoms het presies beskryf wat elke party in die ooreenkoms moes doen. As God ʼn ooreenkoms met sy volk maak, sê Hy dat Hy vir hulle ʼn God sal wees, maar dan moet hulle vir Hom ʼn volk wees. Hy gee vir hulle sy Tien Gebooie (sy Verbondswet) sodat hulle presies weet hoe om die ooreenkoms na te kom. MAAR, wat as hulle nie luister nie, of die ooreenkoms breek? Wel, dan moet hulle gestraf word, lui die ooreenkoms. (Dit is nie so vreemde gedagte nie, want as ons vandag nog ʼn ooreenkoms maak, staan daar gewoonlik in die ooreenkoms wat gebeur as ons nie ons deel nakom nie. Dan word ons gestraf met ʼn boete of so iets. Dit is hoe ooreenkomste werk). In die ooreenkoms tussen God en sy volk is die strafklousule dat as die volk hulle rug op God draai, het God die reg om hulle dood te maak. Hulle bloed mag maar vloei, om dit so te stel.

Die derde ding om te weet is dat God wel iets soos “in die plek van” ken en toelaat. Diere se bloed/lewe het byvoorbeeld “in die plek van” mense gevloei. So is die bepalings van die ooreenkoms op ʼn manier nagekom. Nie mense het hulle lewens verloor nie, maar diere is in hulle plek geoffer.

Wel, ons leef natuurlik nie altyd soos God wil nie en daarom moes die dood ook maar vir ons wag. En dit is waar Jesus se bloed inkom: aan die kruis het daar bloed gevloei… ja, die lewe het uit Jesus verdwyn; daar was dood. Dit gebeur in ons plek. Jesus gee dus sy lewe om so die bepalings van die ooreenkoms na te kom. Daarom kan ons leef.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Gelowiges is die liggaam van Christus

Paulus moes aan Christene verduidelik wat dit beteken om God se mense in die wêreld te wees. Hy kies toe ʼn baie goeie voorbeeld, naamlik dié van ʼn liggaam (1 Korintiërs 12).

ʼn Liggaam is een, maar tog met ʼn groot verskeidenheid lede. Daar is voete, ore, oë, hande en so aan. Elkeen het sy eie werk en doel. Daarom kan die oë nie vir die hande sê dat hulle nie nodig is nie, en die hande ook nie vir die oë nie. Hulle het mekaar nodig en die een moet ook nie die ander een se werk probeer oorneem nie. Boonop moet die een ook nie dink dit is belangriker as die ander een se werk nie. Almal is ewe belangrik vir wat dit moet doen. Alleen as elke lid van die liggaam doen wat dit moet en saamwerk met die ander lede, kan die liggaam goed werk.

Net so is dit met Christene in ʼn gemeente. Hulle is soos die liggaam van Jesus. Deur saam te werk en ʼn eenheid te vorm, verteenwoordig hulle Jesus in die wêreld. Nie almal het dieselfde werk in die gemeente nie. Tog het elkeen sy plekkie. As elkeen sy deel doen kan die liggaam van Christus goed werk. Maar as die oog nie wil werk nie, gaan die hand nie weet waar om te vat nie. Samewerking is dus belangrik. Gelowiges moet so saamwerk en elkeen moet sy eie deeltjie bydra anders werk die liggaam nie behoorlik nie. As net ʼn paar lede van ʼn liggaam werk, is die liggaam gebreklik. Dit mag ʼn gemeente nooit met die liggaam van Christus laat gebeur nie. Gemeentewees is spanwerk in die volste sin van die woord.

Nou sien ons ook waar die kwesbaarste plek van ʼn gemeente lê: in lidmate wat nie hulle deel doen nie. Ons pak maklik die verantwoordelikheid op die skouers van die predikant of ouderlinge. Die Here het nooit bedoel dat sy kinders hulle klere op kerkbanke moet sit en deurskuur nie. Nee, Hy het vir elkeen ʼn werk. Jy as gelowige moet vir die Here vra waar Hy jou presies wil gebruik om sy liggaam in die wêreld goed te laat werk. En dan moet jy voluit aan die werk spring.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

ʼn Plek van skande? (Kruis)

Die vreeslikste manier om destyds dood te gaan, was om gekruisig te word. Net party soorte misdadigers is so tereggestel, soos verraaiers, of staatsvyande.

Die proses was baie wreed Dit was nie om noodwendig die persoon te straf nie, maar om ander af te skrik om nie dieselfde te doen nie. Daarom is daar dikwels ʼn nota aan die kruis vasgesit om te verduidelik waarom die persoon daar hang. Daar kon jy gaan lees wat jy nie moes doen nie. Anders hang jy netnou dalk ook daar. In Jesus se geval het daar gestaan “Koning van die Jode”. Hulle het natuurlik ook die persoon so ver as moontlik probeer verneder en het daarom al sy klere uitgetrek en met hom gespot. Ons weet hoe het hulle met Jesus tekere gegaan.

Kruise kon verskillende vorms aanneem. Dit kon soos ʼn maalteken lyk, soos ʼn T, kon net ʼn regop paal wees of soos die kruis lyk wat ons ken. Die persone is met toue aan die kruis vasgebind of kon met spykers vasgeslaan gewees het. Die mense is dan gewoonlik van uitputting, versmoring of so iets dood. Dit kon tot dae geduur het voordat ʼn persoon uiteindelik dood is.

Jesus is ook gekruisig. Die merkwaardige is egter dat hierdie skandelike gebeure die hoofteken van die Christendom geword het. Ons dra selfs vandag kruisies om ons nekke. Die rede is omdat Jesus juis deur hierdie skande en lyding heen vir ons redding gebring het. Meer nog, Hy is so brutaal dood, maar het nie dood gebly nie. Hy het uit die dood opgestaan. Die kruis word dus vir gelowiges die teken van Jesus se oorwinning oor die sonde en die dood. Dit het ʼn teken van hoop en oorwinning geword in plaas van ʼn skande. Terloops, dit is ook een van die sekerste bewyse dat die Christendom nie ʼn godsdiens is wat sommer deur mense uitgedink is nie. Wie sou, as jy ʼn godsdiens wou begin, die skandelikste ding waaraan jy kon dink as basis vir die nuwe godsdiens gebruik het? Nee, juis omdat die kruisgebeure regtig gebeur het, het die Christene die skandelike gebeure as die kern van hulle godsdiens aanvaar.

Die kruisgebeure het ook die voorbeeld geword vir hoe Christene moes optree. Christus het die hele manier waarop ons mag verstaan op sy kop kom draai. Christelike oorwinning en mag lê in opoffering en nederigheid. Ons moet dus ook bereid wees om vir ander te help al kos dit ons wat en al beteken dit lyding. Christelike mag bestaan in nederigheid en opoffering.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy