I distrust those people who know so well what God wants them to do because I notice it always coincides with their own desires. -Susan B Anthony (1820-1906)

 

Die gevare van tegnologie

Ons vergeet so maklik waarom ons doen wat ons doen. Dit is baie maklik om te veel op tegnologie te fokus en nie genoeg op Jesus nie. Dit kan gevaarlik wees. Wat is die eerste ding wat jy soggens doen as jy wakker word? Jy kyk of daar boodskappe op jou selfoon is. Dan volg jou e-posse, Facebook, Twitter, blogs … As ek klaar is hiermee besef ek dat ek laat is. Ons prioritiseer gereeld tegnologie bokant tyd met Jesus Christus.

 

 

Wat kan ons hieraan doen? Hier is drie moontlikhede:

• Moenie die eerste ding in die oggend na jou foon hardloop nie.

Sodra jy jou foon en jou e-posse begin kyk, begin jou verstand al hierdie dinge prosesseer. As jy aan Jesus ‘n hoër prioriteit as aan tegnologie wil gee, begin by die Bybel. Dit is noodsaaklike tyd wat jy elke oggend moet afsonder.

 

• Tegnologie is wonderlik … moenie toelaat dat dit jou lewe beheer nie.

As tegnologie verhinder dat jy tyd met jou familie en vriende spandeer, moet jy weer oor jou prioriteite dink. Ons sê dat ons op datum moet bly en sien dit as ‘n goeie verskoning. Maar tegnologie mag nooit werklike mense verplaas nie. Gebruik die tyd wat jy op YouTube sou spandeer het en gebruik dit om saam met mense vir wie jy omgee, te verkeer.

 

• Skakel alle skerms ‘n uur voor slaaptyd af

Blootstelling aan helder LCD skerms kort voor jy gaan slaap, beïnvloed jou slaappatrone. Mense wat dit ten minste ‘n uur voor slaaptyd afskakel, slaap beter en is die volgende oggend meer uitgerus.

 

Tegnologie is frustrerend en belonend. Daar is altyd druk om met die nuutste ontwikkelinge op datum te wees. Onthou altyd: Jesus kom eerste.

 

 

 

Satan and all his agents, with all their combined strength and subtilty, cannot separate one soul from Christ. —Robert Shaw 

 

Oppas vir oordrywing

Hoe dikwels sê ons nie: Dit was die beste jaar/vergadering/ens wat ons nog ooit gehad het; daar is ‘n ongelooflike gevoel van momentum wat besig is om in die gemeente op te bou; ens. As hierdie soort oordrewe stellings deel van jou leierskap kommunikasie word, moet ons versigtig wees. As leier moet jy sekerlik optimisme uitstraal, maar as jy begin oordrywe loop jy ‘n risiko. Scott Cochrane identifiseer vier sulke risiko’s:

• Mense kan dink dat jy nie opreg is nie. Elke vergadering of gebeurtenis kan tog nie die beste ooit wees nie. As jy hierdie soort taal te dikwels gebruik, sal mense jou nie as leier, maar as bemarker sien.
• Jy kan jou geloofwaardigheid verloor. Onthou dit wat jy as die beste ooit beskryf – jou mense was daar en hulle het gesien dat dit nie die beste ooit was nie. As daar ‘n gaping ontstaan tussen wat jou mense weet wat waar is en wat jy sê waar is, begin jy jou geloofwaardigheid verloor.
• Jong mense skakel af. Jongmense se radar is ingestel op enigiets wat na oordrywing ruik. Die gemeente kan nie hierdie groep met jou kommunikasie ontstel en verloor nie.
• Jy skep ‘n kultuur van “desperaatheid.” ‘n Leier se woorde het die vermoë om die kultuur te vorm. Oordryf jy gedurig skep jy ‘n kultuur van desperaatheid. Vir jou volgelinge is dit ‘n kort paadjie van desperaatheid na agterdog.

 

Wees versigtig vir oordrywing.

There are Churches in which Jesus Christ’s gospel is buried, and lies completely hidden – J. C. Ryle

 

Jy mag naas my geen ander gode hê nie

Klink maklik. Wat dit beteken is dat niks anders as god in my lewe kan kwalifiseer nie. Die ware God is nie nommer een nie – Hy is die enigste een. Ons moderne mense hou nie van sulke eksklusiewe opsies nie. Ons voel dat God ons keuses beperk. Maar is dit nie hoe liefde is nie. Ek kan tog nie vir my vrou sê dat sy nommer een is nie, maak nie saak hoeveel ander vrouens daar is nie. Liefde en eksklusiwiteit staan nie teenoor mekaar nie. God se eis vir lojaliteit is God se uitdrukking van sy liefde vir ons.

 

 

Hoekom is dit toepaslik dat God op die eerste plek in ons lewens aanspraak maak? Ons kan nou na hierdie gebod kyk en sê ons is onskuldig. Ek noem niemand anders God in my lewe nie; ek aanbid niemand of niks anders nie; en het nie klein standbeeltjies in my huis nie. Miskien moet ons weer kyk na wat dit beteken om iets of iemand voor God te plaas. Dit is dan die Bybelse konsep van afgodery.

 

Wat is ‘n afgod? Dit is enigiets of enigeen wat in ons lewens in die plek van God geplaas word; dit is enigeen of enigiets wat ons so sentraal in ons lewens plaas dat ons nie onsself in die lewe daarsonder kan indink nie; dit is enigiets wat jy meer as God liefhet, gehoorsaam en vertrou.

 

Wie of wat aanbid jy? Hier is ‘n paar diagnostiese vrae:

• Om te voel dat die lewe goed is, wat het jy nodig?
• Wat maak jou lewe die moeite werd?
• As jy oor die toekoms droom wat droom jy dat jy wil bereik of bekom?
• Waar gaan jy vir vertroosting?

 

As ons die eerste gebod verbreek, verbreek ons al die ander, want afgodery is die toegangspad na al die ander sondes. Die gebiede waar jy die gebooie verbreek, is soos rook van ‘n vuur. Moenie op die rook fokus nie, maar volg die rook tot by die vuur. Doen jy dit kom jy by die altare van die afgode wat jy aanbid uit. Ek kan nie sonde en ongehoorsaamheid regmaak deur my gedrag te verander nie – ek moet teruggaan na die gesindheid wat lei tot hierdie diens aan afgode. Om werklik van die nadelige gevolge van ons sondige gedrag te ontsnap, moet ons teruggaan na wat ons aanbid. Wie of wat is dit?

Jy mag naas my geen ader gode hê nie.

Die betekenis van die doop – Francois Malan

Thys vra:

Wat is die betekenis, doel en verskil m.b.t. die Gelowige Doop, die Heilige doop, die klein(kinder/baba) doop, die groot(volwasse doop) en doping met die HeiligeGees. Doping met vuur. Water doop besprinkeling en /of onder dompeling.?

Antwoord

Prof Francois Malan antwoord:

Die betekenis van die doop:

Die doop is die uiterlike bevestiging deur God dat die dopeling verbind is aan Jesus Christus, die Seun van God, wat uit sy genade en groot liefde aan die kruis gesterf het vir die sonde van die wêreld, en deur sy opstanding die dood as straf op die sonde oorwin het. Die verbinding aan Jesus Christus word gedoen deur die Heilige Gees wat reeds in die dopeling kom woon het soos God belowe het. Deur die werking van die Heilige Gees is die dopeling weergebore tot kind van God. Die doop is ‘n uiterlike teken wat God gee, om daarmee sy seël van eienaarskap op ons te plaas – die dopeling behoort nou aan God, die Vader en die Seun en die Heilige Gees. 

 

            Romeine 6:3-4: Of weet julle nie dat ons wat in Christus Jesus gedoop is, in sy dood ingedoop is nie? Deur die doop is ons dus saam met Hom in sy dood begrawe sodat, net soos Christus deur die magtige heerlikheid van die Vader uit die dood opgewek is, so ook ons ‘n nuwe lewe sal lei.

 

`           Johannes 3:3: As iemand nie van bo weer gebore word nie, kan hy die koninkryk van God nie sien nie (die Griekse woord het ‘n dubbele betekenis en beteken altwee: ‘van bo gebore’ en ‘weer gebore’).

 

Johannes 3:8: die wind waai waar hy wil en jy hoor sy geluid, maar jy weet nie waarvandaan hy kom en waarheen hy gaan  nie. So is elkeen wat uit die Gees gebore is.

 

Johannes 14:16-17 Die Vader sal die Heilige Gees gee sodat Hy vir ewig by julle kan wees…en in julle sal wees.

 

Romeine 8:11: As die Gees van God, wat Jesus uit die dood opgewek het, in julle woon, sal Hy wat Christus uit die dood opgewek het, ook julle sterflike liggame lewend maak deur sy Gees wat in julle woon.

 

Romeine 8:15 Julle het die Gees van kindskap ontvang deur wie ons roep ‘Abba, Vader!’(Abba is die Aramees vir Vader)  Die Gees self bekragtig aan ons gees dat ons kinders van God is.

 

Doop met die Heilige Gees, en doop met vuur:

Johannes die Doper het gesê: Ek doop julle wel met water met die oog op bekering, maar Hy wat ná my kom…sal julle met die Heilige Gees en met vuur doop…die kaf sal Hy met ‘n onblusbare vuur verbrand (Matteus 3:11-12; vgl. Markus 1:8; Lukas 3:16) – hier is die vuurdoop die ewige vuur as ewige straf vir die ongelowiges (Matteus 18:8; 25:41 die vuur wat God vir die duiwel en sy volgelinge berei het). Jesus Christus kom as Regter om te oordeel tussen gelowiges en ongelowiges (Matteus 25:31-33).

 

Die doop met die Heilige Gees word verduidelik in Johannes 7:38-39:  Jesus het gesê: Hy wat in My glo, soos die Skrif sê (vgl. Jesaja 58:11): ‘Strome lewende water sal uit sy binneste vloei.’ Dit het Hy van die Gees gesê, wat dié wat in Hom glo, sou ontvang. Die Gees was immers nog nie daar nie, omdat Jesus nog nie verheerlik was nie – volgens die Evangelie van Johannes begin Jesus se verheerliking aan die kruis, as die hoogste liefdesoffer van God vir ons. Deur sy liefde trek Hy ons na Hom toe (vgl. Jn 12:32-33). Die vrug van die werking van die Gees in ons is: liefde, blydskap, vrede, geduld, vriendelikheid, goedheid, getrouheid, sagmoedigheid, selfbeheersing (Galasiërs 5:22-23). So lyk ‘n mens wat met die Heilige Gees gedoop is.

 

Die Heilige Gees is God wat in ons kom woon om ons daagliks te lei en te leer en te ondersteun; Johannes  16:7-8: As Ek weggaan sal Ek die Heilige Gees na julle stuur. En wanneer Hy kom, sal Hy die wêreld oortuig van sonde en van geregtigheid  en van oordeel – Hy wys ons op ons sonde; Hy oortuig ons dat die enigste manier om ons sondaars se verhouding met God reg te kry, is om aan Jesus Christus verbind te wees in die geloof en help ons om soos kinders van God te leef. Paulus sê in 2 Kor 3:18 dat die Heilige Gees ons verander om al meer soos Jesus te word. Hy sal ons ook oortuig van God se oordeel oor die duiwel en oor die bose in die wêreld (Jn 16:11).

 

Die doop met die Heilige Gees verwys na God se onsigbare werking in ons lewe. Dit gaan van God uit en Hy werk ons hele lewe lank aan ons.

 

Kinderdoop:

Die doop is God se uiterlike teken aan ons dat Hy ons sondes vergewe deur die bloed van die Here Jesus wat vir ons gestort is. Soos water ons liggaam reining, is die water van die doop die uiterlike teken dat ons sonde gereinig is deur die bloed van Christus. Sy ‘bloed’ is ‘n beeld van sy offer. Hy het in ons plek die straf op ons sonde gedra. Die Seun van God is deur God verlaat aan die kruis, deurdat Hy, uit sy genade en liefde vir ons, Homself oorgegee het in die dood. God het die dood as straf op die sonde gegee (Genesis 2:17). Deur self die straf van die dood op Hom te neem het Jesus ons bevry van die straf op die sonde, met die een offer wat vir God aanneemlik is, dat God ons straf op Homself neem. En die doop is God se seël wat nou bevestig dat ons vir ewig aan Hom behoort as sy kinders. Hy het ons losgekoop uit die straf op die sonde, en ons dood verander in die deurgang na die ewige lewe saam met God. 

 

Chrisus het sy bloed nie minder gegee vir die reiniging van die kinders van gelowiges as vir volwassenes nie (vgl. Markus 10:14: Laat die kinders na My toe kom en moet hulle nie verhinder nie, want die koninkryk van God behoort aan mense soos hulle). Daarom behoort kinders van gelowiges die doop te ontvang as die uiterlike teken van wat Christus vir hulle gedoen het. Die Christelike doop is ‘n bevestiging van die doop van Jesus aan die kruis vir die vergewing van ons sonde – in Lukas 12:50 verwys Jesus na sy kruisdood as ‘n doop waarmee Hy gedoop moet word. Die doop op Golgotha raak die ganse wêreld – vgl. Johannes 1:29: Jesus is die Lam van God wat die sonde van die wêreld wegneem. Die kinders van ‘n gelowige ouer is geheilig = aan God gewy, deur die gelowige ouer (1 Korintiërs 7:14).

 

Kolossense 2:11-12:  In Christus is julle ook besny, nie met die besnydenis deur mensehande nie, maar deur die besnydenis van Christus, waardeur julle sondige aard weggeneem is, toe julle in die doop saam met Hom begrawe is. In Hom is julle ook opgewek deur die geloof in die krag van God wat Hom uit die dood opgewek het.

            So verbind Paulus die doop aan die besnydenis van Joodse seuntjies op die agtste dag, wat die teken was van die ou verbond van God se genade aan Abraham en sy nageslag (Genesis 17:9-14). Die doop is die teken en seël van die nuwe verbond van God met ons en ons kinders,dat seuntjies en dogtertjies van gelowige ouers ook kinders van God is.

            Op die Pinksterdag verklaar Petrus: die belofte van vergifnis van sonde deur Jesus Christus en die ontvang van die Heilige Gees geld vir julle, en ook vir julle kinders, en vir almal daar ver, almal wat die Here ons God na Hom toe roep (Handelinge 2:38-39). Nadat die Here die hart van Lidia oopgemaak het om ag te slaan op Paulus se getuienis, is sy en haar hele huishouding gedoop (Handelinge 16:14-15); soos almal in die huis van die tronkbewaarder van Filippi (Handelinge 16:32-33).

           

Volwasse doop – gelowige doop:

Die Heilige Gees kom om mense, wat nie gebore is uit gelowige ouers nie, uit ouers wat nie deel het aan God se verbond van genade nie, om ongelowige mense te oortuig dat Jesus die Seun van God is, wat vir hulle die pad na God toe kom oopmaak het. Die Gees gebruik vir sy oortuigingswerk die woord van die Here. wat verkondig word met mense se woorde en lewensvoorbeelde, deur gebeurtenisse, ens. So word mense wat nog nie in Jesus glo nie, deur die Gees gelei tot die besluit om in die Here Jesus te glo, hulle lewe aan Hom oor te gee as die Here van hulle lewe, en te lewe volgens Jesus se woord en sy voorbeeld van liefdediens. 

            So is die mense op die Pinksterdag diep in hulle hart getref deur die woorde van Petrus, en het hulle gevra wat hulle moet doen. Petrus het hulle antwoord dat hulle hulle moet bekeer (die Griekse woord metanoia verwys na ‘n verandering van hulle harte en denke oor Jesus) en laat elkeen van julle in die Naam van Jesus Christus tot vergewing van julle sondes gedoop word. En julle sal die gawe van die Heilige Gees ontvang (Handelinge 2:37-38).

            Dit was ook Jesus se opdrag aan sy dissipels ná sy opstanding: Gaan dan en maak dissipels (leerlinge, volgelinge van Jesus) van al die nasies, doop hulle in die Naam van die Vader en van die Seun en van die Heilige Gees (met die teken en seël dat hulle aan God behoort), en leer hulle om alles te onderhou wat Ek julle beveel het (Matteus 28:19-20).

 

            God se genade word aan mense verkondig, en as hulle besluit om dit te aanvaar, en met geloof daarop antwoord, word dit in die doop bevestig. Met die doop neem God die gelowige op in sy huisgesin, in sy gemeente. (Efesiërs 2:8: Want uit genade is julle verlos, deur geloof. En dit kom nie uit julle self nie; dit is die gawe van God.

 

Besprinkeling en onderdompeling 

1 Petrus 1:2 noem die gelowiges in Klein-Asië: hulle wat uitverkies is volgens die voorkennis van God die Vader om deur die heiligmaking van die Gees gehoorsaam te wees en met die bloed van Jesus Christus besprinkel te word.           

Daarmee knoop Petrus aan by die beseëling van God se verbond met Israel by Sinai: Moses het toe die bloed gevat en op die volk gesprinkel terwyl hy sê: Dit is die bloed van die verbond wat die Here op grond van al hierdie gebooie met julle gesluit het (Eksodus 24:8). So sien Petrus die samehang tussen die besprenkeling met die water van die doop van die nuwe verbond en die besprenkeling met die bloed van die ou verbond.

            Vir die doop van klein kinders is die besprenkeling met water dus aangewys as die teken en seël wat God aan hulle gee. Vir ‘n teken en ‘n seël maak die hoeveelheid water nie saak nie.

 

Die onderdompeling is ‘n baie realistiese teken van die sterwe aan jouself en jou ou lewe, deur jou heeltemal onder die water te druk, en die opstanding tot ‘n nuwe lewe waarin God die beheer oor jou lewe neem met die uithelp uit die waterbad deur die persoon wat jou doop. Romeine 6:4: Deur die doop is ons dus saam met Christus in sy dood begrawe sodat, net soos Christus deur die magtige heerlikheid van die Vader uit die dood opgewek is, so ook ons ‘n nuwe lewe sal lei.

 

Maar die hoeveelheid water is nie belangrik nie. Dit is ‘n teken wat heenwys na Jesus se sterwe en opstanding, en dat ons hele lewe daaraan verbind word, om saam met Hom daagliks ons sonde af te lê, versoekings te weerstaan, en te lewe in gehoorsaamheid aan wat Hy sê (vgl. Efesiërs 4:22-24 om jou ou lewenswandel af te lê, die aard van jou denke te verander, en die nuwe mens aan te trek wat in geregtigheid en ware heiligheid na God se beeld geskep is). In. Johannes 13:34 sê Jesus: Ek gee julle ‘n nuwe opdrag: Julle moet mekaar liefhê. Net soos Ek julle liefgehad het, moet julle ook mekaar liefhê – dit beteken selfs tot die dood toe mekaar liefhê.

 

Die doel van die doop

God beseël met die doop dat die dopeling aan sy Seun verbind is en dat God hom/haar daarom as kind aangeneem het en opgeneem het in die gemeente as deel van die ligaam van Christus. 1 Korintiërs 12:13: Ons is tog almal deur die een Gees gedoop in een liggaam – Jode of Grieke, slawe of vrymense – en ons is almal met een Gees deurdrenk. Efesiërs 1:22-23: God het Christus as Hoof bo alles aan die kerk, wat sy liggaam is, gegee, die volheid van Hom wat alles in almal vervul. 

 

Skrywer:  Prof Francois Malan