How sweet is rest after fatigue! How sweet will heaven be when our journey is ended. —George Whitefield

Die groot Opdrag: Verpligting en gawe

In Lukas 24 lees ons van Jesus se laaste gesprek met sy dissipels. Daarin sê Hy onder andere vir hulle: In sy Naam moet bekering en vergewing van sondes aan al die nasies verkondig word, van Jerusalem en verder. Maar Lukas voeg dan by: En Ek sal die gawe wat my Vader beloof het, vir julle stuur. Maar julle moet in die stad bly totdat julle met krag van bo toegerus is. Jesus sê nie gaan en vertel nie, maar gaan en wag.

Hiermee beklemtoon Hy die rol wat die Heilige Gees speel om die dissipels te bemagtig om te gaan en te doen wat Jesus Hulle beveel het.

Wat gebeur as ons dit nie so sien nie?

• Ons dink dat Christene meer in hulle eie krag kan doen as wat die geval is.
• Ons onderskat die rol wat die Heilige Gees speel in die uitdra van die evangelie na die nasies.

Jesus gee aan ons ‘n besliste opdrag om sy woord te verkondig en oor Hom te getuig. Hy gee aan sy dissipels die naam van getuies: Julle is getuies van hierdie dinge. Maar om hierdie take uit te voer het hulle krag nodig – krag wat van die Heilige Gees kom. Die verpligting om te getuig kom met ‘n gawe – die Heilige Gees.

Kerkleiers  sien die groei van die kerk in terme van strategieë en metodes. Natuurlik is dit belangrik, maar ons mag nooit vergeet dat ons nie op planne nie, maar op ‘n Persoon moet vertrou. Jesus beveel sy dissipels om na Jerusalem toe te gaan en daar te wag op die uitstorting van die Heilige Gees. Sonder die Heilige Gees kan die dissipels nie die opdrag wat Jesus aan hulle gegee het, uitvoer nie.

Dit word gesê dat mense die seile span, maar dat God die wind stuur. Ons mag nooit vergeet dat ons nooit God se opdragte kan uitvoer sonder die krag wat Hy vir ons stuur nie. Onthou: ‘n opdrag en ‘n gawe.

JOHANNES DIE DOPER – ‘N NUWE TYD BREEK AAN EN DIE PAD WORD GELYKGEMAAK (1) – Jan van der Watt

deel 1 – Johannes die Doper

Die evangelie van Jesus begin met Johannes die Doper; daaroor is al vier evangelies dit eens. Johannes die Doper speel egter ‘n belangrike rol in die die Nuwe Testament, belangriker as wat ons soms dink. Geleerdes meen dat mense in die tyd van Jesus meer van Johannes die Doper geweet  en gedink het hy is belangriker as Jesus. Selfs Josefus, die skrywer van die Joodse geskiedenis, skryf ‘n langer stuk oor Johannes die Doper as oor Jesus. Johannes was ‘n prominente figuur in daardie tyd wat selfs die koning aangevat het – dit sou uiteindelik sy dood kos. 

 

 

Voor jy verder na die diagram kyk – wat weet jy alles van Johannes die Doper?

…………………………………………………………………………………………………………………………………………..

…………………………………………………………………………………………………………………………………………..

 

Ek weet nie of jy geweet het hoeveel inligting ons regtig oor Johannes die Doper in die Nuwe Testament het nie. Dit is nogal baie – kom ons gaan van hulle deur:

 

JOHANNES DIE DOPER IN DIE NUWE TESTAMENT

Johannes se geboorteverhaal

Johannes se geboorte aangekondig – Luk 1:5-25; Johannes se geboorte – Luk 1:41,57-66. Hy word groot – Luk 1:80.

Inleidende (en belangrikste) verhale oor sy prediking en doop

Matt 3:1-17; Mk 1:2-11; Luk 3:1-22; Joh 1:6-8, 19-36; Prediking teen Herodes Luk 3:19-20; Hy het vir almal gepreek – Matt 21:31-32

Hoe het hy geleef?

As arm woestynswerwer – Matt 3:4; 11:18; Mk 1:6. In die omgewing van die Jordaan – Joh 10:40-41.

Verskille oor wat Jesus en Johannes leer – Johannes se groot vraag aan Jesus

Johannes vra of Jesus die Messias is – Matt 11:2-19; Luk 7:18-35. Vrae oor vas, gebed en Sabbat – Matt 9:14-17; Mk 2:18-22; Luk 5:33-39; 16:14-18.

Johannes se doop vs. Jesus se doop – dit verskil

Johannes se doop met water – Mk 11:30; Luk 20:3; Hand 18:25-19:10; Joh 3:22-30; 4:1. Jesus doop met die Heilige Gees – Matt 3: 11; Mk 1:8; Luk 3:16; Joh 1:33; Hand 1:5; 11:6.

Hoe belangrik was Johannes die Doper volgens Jesus?

Baie belangrik Matt 21:23-27; Selfs soos Elia – Matt 17:11-13; Maar tog nie regtig so belangrik as dit by Jesus kom nie – Joh 5:33-36; Matt 11:2-29; Luk 7:18-35.

Sy verdere verhouding met Jesus

Mense verwar Jesus met Johannes die Doper (wat uit die dood opgewek is – Matt 16:14; Mk 6:14-16; 8:27-33; Luk 7:7-9; Hy was onbelangrik in die teenwoordigheid van Jesus – Matt 3:11; Mk 1:7; Joh 1:26, 30; 3:27-30; Hand 13:24-25.

Tronk toe en sy dood

Matt 4:12; 14:1-10; Mk 1:14; 6:17-29 – Herodes vang hom en onthoof hom

 

Uit hierdie inligting sien ons dat die Nuwe Testament vir ons ‘n redelike volledige prentjie gee van Johannes die Doper – van sy geboorte af, sy prediking, sy lewe en selfs hoe hy dood is. Waarom was dit vir die vroeë Christene so belangrik om so baie van Johannes te weet?

 

As jy nou die prentjie van Johannes die Doper “aanmekaar” moet sit, wie dink jy was hy, waaroor het hy gepreek en vir wie?

…………………………………………………………………………………………………………………………………………..

…………………………………………………………………………………………………………………………………………..

 

As jy dalk eers wil lees wat Josefus, die Joodse geskiedskrywer oor Johannes te sê gehad het, hier is dit:

 

Wel, party van die Jode het gedink dat die vernietiging van Herodes se weermag van God af kom en dat dit geregverdig was, as straf vir wat hy aan Johannes gedoen het, wat die Doper genoem is; Herodes het hom doodgemaak, hy (Johannes) wat ‘n goeie man was. Hy het die Jode opdrag om deugsaam te leef, beide wat hulle regverdige optrede teenoor mekaar as was hulle toewyding teenoor God betref en om hulle daarom te laat doop.  Die was (met water) was vir hom aanvaarbaar as hulle daarvan gebruik maak, nie alleen om van hulle sonde ontslae te raak nie, maar vir die reiniging van hulle liggame, met die veronderstelling dat die siel vooraf deeglik deur regverdigheid gereinig is. Toe baie mense in skares na hom toe gekom het – hulle was behoorlik meegevoer deur sy woorde – het Herodes begin vrees dat die groot invloed wat Johannes oor die mense gehad het, hom die mag en die neiging sou gee om ‘n rebellie op die been te bring, want die skare het gereed gelyk om enigiets te doen wat hy vra. Herodes het dit toe goed gedink, deur Johannes dood te maak, om enige moeilikheid wat Johannes mag veroorsaak te verhoed en om so nie vir homself moeilikheid op die hals te haal deur ‘n man te spaar wat hom sou laat jammer kry as dit te laat is nie. Gevolglik is Johannes, weens Herodes se suspisieuse geaardheid, as gevange na Magerus, die vesting wat ek vantevore genoem het, gestuur waar hy doodgemaak is. Die Jode is nou van mening dat die vernietiging van Herodus se weermag was sy straf en was ‘n teken van God se afkeur van hom. (Ant. 18.2 §116-119).

 

 Maar hoekom was Johannes die Doper so belangrik? Daarna kyk ons volgende keer.

 

Skrywer: Prof Jan van der Watt

 

Alle Paaie lei na Jesus: Wat gebruik die skrywers van die Nuwe Testament uit die Ou Testament? – Adrio König

Hoofstuk 6

Die verhouding Ou Testament-Nuwe Testament

Hier het ons een van die ryk temas in die Bybel wat op ’n merkwaardige manier na Jesus lei. Ons gaan kyk na ’n paar kante van hierdie verhouding.

• Wat gebruik die skrywers van die Nuwe Testament uit die Ou Testament?
• Hoekom?
• Wat is in die lig hiervan die verhouding tussen die twee Testamente?
• Uit watter Ou Testament haal die Nuwe Testament se skrywers aan?

6.1 Wat gebruik die skrywers van die Nuwe Testament uit die Ou Testament?

’n Mens kan begin by die vraag hoe ons vandag die Ou Testament gebruik. Gebruik ons al die dele/boeke van die Ou Testament ewe veel? Of gee ons voorkeur aan bepaalde boeke? Oor die algemeen sal ons vind dat daar duidelike voorkeure is onder Christene. Waarskynlik is die Psalms die populêrste boek. Dan volg moontlik sommige historiese boeke soos Genesis, of sommige profete soos Jesaja. Miskien is Spreuke ook populêr. Is dit verkeerd? Moet ’n mens nie die hele Bybel ewe veel lees en alles op dieselfde vlak nie? Die hele Bybel is tog die Woord van God.

 

Wel, kom ons vra eers hoe die skrywers van die Nuwe Testament die Oue gebruik het. Vir minstens die eerste eeu het Christene nie ’n Nuwe Testament gehad nie. Waarskynlik is al die boeke van die Nuwe Testament gedurende die laaste helfte van eerste eeu geskryf, maar hulle is nie gou in een bundel versamel nie. Dit beteken dat die eintlike Bybel van die vroeë Christene die Ou Testament was. En hulle het oorvloedige gebruik daarvan gemaak. Daar is ongeveer 2 400 direkte of indirekte aanhalings of verwysings uit die Ou Testament in die Nuwe. Dit beteken dat daar in die Nuwe Testament omtrent sewe verwysings per bladsy na die Ou Testament is, wat regtig baie is. Dit beteken dat dit belangrik is om die Ou Testament te ken as ’n mens die Nuwe wil verstaan.

 

Maar dit is interessant uit watter dele van die Ou Testament die meeste aanhalings/verwysings kom. Daar is geen sprake van ’n eweredige verdeling nie. Omtrent die helfte kom uit net vier boeke:  Omtrent 400 elk uit die Psalms en Jesaja, en omtrent 200 elk uit Genesis en Eksodus.

 

Wat het die Nuwe Testament spesifiek in hierdie boeke gekry? Dis interessant dat hulle ook hierdie boeke nie eweredig gebruik het nie. Van die 400 uit Jesaja kom byna die helfte net uit Jesaja 40-54, waarvan omtrent 40 aanhalings/verwysings net uit Jesaja 53. En van die 400 uit die Psalms kom omtrent 70 uit net drie Psalms (2, 22, 110).

 

Waarom juis die konsentrasie op hierdie bepaalde dele uit hier die boeke? Daar is net een antwoord: Jesus. Alle paaie uit die Ou Testament lei na Jesus.

• Uit die Nuwe Testament weet ons goed die Christene het die Jode probeer oortuig dat Jesus die beloofde Messias is. Dink maar net aan Petrus en Paulus se preke in Handelinge (2:36; 3:18-20; 9:22; 13:23; 17:3; 18:5). Vandaar die konsentrasie op bepaalde Messiaanse profesieë soos Jesaja 9 en 11 (6 keer elk) en Psalm 2 (18 keer).
• Maar omdat hulle Hom ook gesien het as die groot Hoëpriester (Hebreërs) was Psalm 110 (25 keer) so belangrik. Wat hierdie Psalm nog belangriker gemaak het, is die feit dat koning en priester hier in een persoon verenig word, en dit is juis wat die vroeë Christene van Hom geglo het.
• Van die allergrootste belang was sy diens aan mense in nood, en uiteindelik sy kruisdood. Dit het hulle na die Dienaar van Jesaja 40-54 laat kyk, veral Jesaja 53 (38 keer), maar ook na sekere Psalms soos Psalm 22 (24 keer).
• Maar dan was daar soveel ander kante van Jesus se betekenis dat hulle rond en bont in die Bybel geblaai het. Dink maar aan Jesus as die Seun van die mens. Daar word 14 keer verwys na Daniël 7:13-14.
• Jesus as Profeet was vir hulle baie belangrik. Daarom word 11 keer verwys na Deuteronomium 18:15-19.
• Dat die Seun van God saam met die Vader die Skepper was, word oor en oor bely, en dit is een van die redes waarom daar so veel verwysings na Genesis is. Dis gewoonlik na die eerste skeppingsverhaal, Genesis 1. Dink maar net aan Johannes 1:1-3.

 

Wat interessant is in hierdie verband, is dele in die Ou Testament waarna nie verwys word in verband met Jesus nie, terwyl dit in ons tyd mode geword het om dit wel te gebruik.

• Die Nuwe Testament pas nooit die “saad” (nageslag) van Eva op Jesus toe nie (Gen 3:15) terwyl baie vandag aanvaar dis die eerste “Messiaanse” profesie. Daar is natuurlik nie Messiaanse profesieë vóór Dawid nie, want die Messias sou die seun (nageslag) van Dawid wees (2 Sam 7:12-16). Daar is wel profesieë soos dié van die besondere profeet, maar dis nie Messiaanse profesieë (profesieë oor ’n Messias) nie, maar profesieë oor ’n Profeet.
• Ook Abraham wat geroep word om sy seun te offer (Gen 22), word nooit op Jesus toegepas nie.
• Net so die verwysings na die kleur rooi (soos Ragel se rooi tou, Jos 2:21) wat vandag graag op die bloed van Jesus betrek word.

 

Die skrywers van die Nuwe Testament het oorvloedig na Jesus verwys, en hulle het Hom geken en geweet wat sy betekenis is. Daarom lyk dit my gepas om ons te hou by die talle en talle verwysings wat hulle uit die Ou Testament op Jesus toegepas het. Ek dink nie ons kan dit beter doen as hulle nie. Dit sluit ook die talle “tipes” in wat daar van Jesus sou wees. In Genesis en Eksodus was nog ’n paar temas vir die vroeë Christene belangrik. In Genesis was dit veral Abraham (kyk na Abraham, hoofstuk 1), en in Eksodus Moses en die uittog en die wet, die tempel, priesters en offers (kyk na hoofstuk 3 oor die wet). Wat nou belangrik is, is die feit dat nie een van hierdie groot temas op sy eie so belangrik is nie, maar dat hulle almal direk in verband met Jesus ontwikkel word.

• esus is die eintlike nakomeling van Abraham (Gal 3:16),
• Hy is groter as Moses (Heb 3:1-6),
• Hy was by die uittog betrokke (1 Kor 5:7; 10:1-5),
• Hy vervul die wet (Matt 5:17, 1953-vertaling),
• Hy is die tempel wat in drie dae afgebreek word (Joh 2:19-21),
• Hy is dié Hoëpriester (Heb 7:11-17),
• Hy is self die groot offer (Heb 9 en 10).

Waarlik, alle paaie lei na Jesus.

 

Mense wonder dikwels oor verskeie aspekte van die Christelike geloof. Alle Paaie lei na Jesus (2010) deur prof Adrio König is ʼn baie nuttige naslaanwerk wat ʼn betrokke en uitdagende verduideliking bied van die die middelpunt van ons geloof: Jesus Christus.

Bybelkennis gaan gereeld gedeeltes uit hierdie bron publiseer. Ons dank aan prof König en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

 

 

 

Skrywer: Prof Adrio König

JESUS PREEK – DIE BERGPREDIKASIE (2) – Jan van der Watt

Deel 2 – Jesus preek verder oor wat van sy mense verwag word

 

3. Ware godsdiens (en beloning – dit is nie wat Christenskap jou kos nie, maar die loon wat jy kry)

 

3.1 In hoofstuk 6 verander die tema van die Bergpredikasie. Die eerste sin (6:1) gee al ‘n aanduiding van waaroor dit gaan: “Moenie julle godsdienstige pligte in die openbaar nakom om deur mense gesien te word nie, want dan kry julle geen beloning van julle Vader wat in die hemel is nie”  

 

Wat sou jy uit bogenoemde opmerking oor wat godsdiens presies is, aflei?……………………..

……………………………………………………………………………………………………………………………….

 

Godsdiens is duidelik iets tussen jou en God en nie om mense te beïndruk of om eie eer te soek nie.

 

3.2 Gebed… om met jou pa te praat (6:5-15)

 

Lees 6:5-15 en gee in jou eie woorde weer wat goeie opregte gebed beteken…………………

………………………………………………………………………………………………..

 

Hier word die klem weer op die verhouding tussen mens en God in plaas van eie eer geplaas.

 

Die ‘Ons Vader’ gebed is ’n gebed van ‘n kind aan sy/haar vader – daarom word dit aan die ‘Vader’ gerig. Vaders in daardie tyd het 3 belangrike funksies gehad: om die gesin na buite (in die publiek) te verteenwoordig, om die gesin te versorg en om die gesin te beskerm teen gevaar. Vir die drie dinge word daar in die Ons Vader gebid. Eers word daar gevra dat die publieke beeld van die Vader uitgebrei en sterker gemaak word (Laat….u Naam, u Koninkryk, u wil…). Dan word gevra vir brood, maar met die erkenning dat die Vader vir die brood sorg. Dan word daar gevra vir beskerming – bewaar ons van die bose en as ons foute gemaak het, moenie dit teen ons hou nie. Vergewe ons, want ons wil goeie kinders wees en bly. So is die gebed ‘n gebed van ‘n kind van God wat gelowig sy kindskap teenoor die Vader erken. Die gebed is dus meer as om te vra; dit is ook om te gee, jouself te gee.

 

3.3 Vas

 

Die meeste hedendaagse Christene vas nie meer nie. Waarom nie?

 

Lees Mat 6:16-18 en sê hoe jy dink hierdie verse verstaan moet word……………………………..

………………………………………………………………………………………………………………………………..

 

Lees dan ook Mat 6:19-21 en sê waar die werklike loon en skatte vir die gelowige gevind moet word……………………………………………………………………………………………….

…………………………………………………………………………………………………………….

 

3.4 Lojaliteit: Beginsel van die onmoontlikheid om twee here te dien

 

Lees Mat 6:24 en sê wat jy daaruit aflei vir die gelowige se alledaagse lewe?…………………..

………………………………………………………………………………………………………………………………..

 

3.5 Fokus in die lewe

 

Een van die wonderlikste dele in die Bybel kry ons in Mat 6:25-34. Belangrike mense soos Franciskus van Assisi is byvoorbeeld deur hierdie gedeelte beïnvloed, juis omdat dit die gedeelte God se sorg en ons absolute afhanklikheid daarvan so sterk beklemtoon.

 

Lees 6:25-34 en sê vir jouself wat dit beteken vir jou eie geloofslewe………………………………

………………………………………………………………………………………………………………………………..

 

4. Loop die reguit pad

 

In hoofstuk 7 verander die aanslag van Matteus weer. Hy verduidelik wat te midde van die lewe gevra word. Moenie op ander se foute konsentreer nie (7:1-6), maar vra liewer God om jou te help en te gee wat jy nodig het (7:7-12). Bly op die regte pad en oppas vir valse profete wat jou van die pad af wil kry (7:13-20). ‘n Mens sal immers aan jou vrugte geken word wat jou dade in ooreenstemming met die wil van God is. Wie wil oorleef, moet sy lewe op hierdie boodskap van Jesus bou.

 

Gaan deur hoofstuk 7 en kyk of jy alles wat in die boonste paragraaf gesê word, kan kry……….

……………………………………………………………………………………………………………………………

 

As jy 7:1-6 lees, dink jy jy mag vir ander sê waar hulle foute maak?Moet ‘‘n mens maar altyd stilbly? Motiveer jou opinie…………………………………………………………………………….

……………………………………………………………………………………………………………………………

 

Beteken 7:7-12 dat jy altyd alles gaan kry waarvoor jy vra? Motiveer jou antwoord………..

……………………………………………………………………………………………………………………………….

 

In hoofstuk 7:12 is daar ‘n belangrike opmerking wat eintlik alles opsom: ‘Alles wat julle dan wil hê dat die mense aan julle moet doen, net so moet julle aan hulle ook doen; want dit is die wet en die profete’. Dit staan bekend as die sogenaamde goue reël wat ook in die Jodedom bekend was. Jyself en jou eie belange word die maatstaf vir jou optrede teenoor ander. Die veronderstelling is dat jy jou eie belange so sterk op die hart dra, dat jy altyd die beste vir jouself sal wil hê. Hier word daardie ‘beste vir jouself’ op ander geprojekteer.

 

Skrywer: Prof Jan van der Watt