There is nothing wrong with our having fences. But let us keep our fences low and shake hands often – Mark Dever

Die lewe van geloof

Om te glo, is om seker te wees van die dinge wat ons hoop, om oortuig te wees van die dinge wat ons nie sien nie (Hebreërs 11:1).

Die skrywer is nie besig om geloof te ontleed en komponente daarvan te identifiseer nie. Hy skryf hier hoe geloof werk.

Geloof is die versekering en vertroue van dit wat ons hoop. Hoop is nie wensdenkery nie – dit is sekerheid oor iets wat nog nie ‘n werklikheid is nie. Dit is die hoop waarvan Paulus in Romeine 5:5 praat: Dié hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het.

Maar geloof is ook die bewys – die oortuiging – van dinge wat ons nie sien nie. Dit is die kenmerk van die gelowiges wat volhard soos iemand wat die onsienlike God sien (Hebreërs 11:27). Geloof kyk dus altyd vooruit na die toekoms. Geloof beteken dat ons na die wêreld kyk, nie deur die bril van hierdie wêreld nie, maar deur die bril van God.

Wat beteken dit nou in die praktyk? In Hebreërs 11 wys die skrywer vir ons wat geloof in die alledaagse lewe beteken. Deur hierdie galery van geloofshelde lei hy ons totdat ons uiteindelik by Jesus Christus uitkom. Hy is die oorsprong en vervuller van ons geloof. Daarom dat die skrywer in 12:1 – 2 sê dat ons die wedloop wat vir ons voorlê met volharding moet hardloop, die oog gevestig op Jesus, die Begin en Voleinder van die geloof.

Hierdie gelowiges het twee eienskappe in gemeen gehad: hulle het verby die huidige gekyk na die dinge wat ons hoop, en hulle het verby die sigbare dinge gekyk na die dinge wat hulle nie gesien het nie. Hulle het die wysheid van die wêreld – leef vir vandag – verwerp; hulle leef in die huidige in die lig van die toekoms.

Die skrywer lê besondere klem op Moses en Abraham. Wat verklaar hulle wonderlike, maar tog onvolkome, geloof? Hulle het God se woord gehoor en daarop vertrou. Eintlik het hulle God wat die woord gepraat het vertrou.

Geloof is om te hoor wat God sê, om sy woord te vertrou en daarvolgens te lewe.

 “Christians don’t tell lies, they just go to church and sing them.” — AW Tozer

Calvyn se gebed

Calvyn het aan die einde van sy lesings gebid. Hier is sy gebed na ‘n lesing oor die kleiner profete:

Grant, Almighty God, that as almost the whole world give such loose reins to their licentiousness, that they hesitate not either to despise or to regard as of no value thy sacred word,—Grant, O Lord, that we may always retain such reverence as is justly due to it and to thy holy oracles, and be so moved, whenever thou deignest to address us, that being truly humbled, we may be raised up by faith to heaven, and by hope gradually attain that glory which is as yet hid from us. And may we at the same time so submissively restrain ourselves, as to make it our whole wisdom to obey thee and to do thee service, until thou gatherest us into thy kingdom, where we shall be partakers of thy glory, through Christ our Lord. Amen.  [Calvyn, J., Commentaries on the Twelve Minor Prophets (Joe 1:1–4)].

Moeilik om te verstaan, want hy gebruik woorde wat ons nie meer elke dag gebruik nie. Wat wel van groot belang is, is dit waarop hy in hierdie gebed fokus:

(a) Dat sy hoorders waarde aan die Skrif moet heg.

(b)Dat hulle eerbied het vir God se woorde.

(c)Dat hulle nederig sal wees omdat God afbuig om met hulle te praat.

(d)Dat dit sal lei tot ware gehoorsaamheid.

Vir Calvyn was daar ‘n groot gevaar as mense nie God se woord respekteer nie. Calvyn was absoluut oortuig dat God se woord gehoor moet word.

God sweetens outward pain with inward peace. —Thomas Watson

Nuwe wyn vir ou wyn

‘n Baie interessante gedeelte is Johannes 2:1 – 4:46. Dit begin en eindig in Kana. Daar loop ‘n goue draad deur hierdie gedeelte: Jesus vervul en vervang die ou orde van Moses met iets nuut.

• Nuwe wyn. Jesus is die gas by ‘n bruilof in Kana. Daar vervang Hy die water wat vir seremoniële reiniging gebruik word met nuwe wyn. Wat doen Hy? Hy wys daarop dat die voorsiening in die ou orde onvoldoende is. Die offersisteem kon nie die vreugde bring wat dit veronderstel was om te bring nie. Die ou water gee seremoniële vergifnis oor die kort termyn. Wat Jesus in die evangelie gee is ewigdurend.
• ‘n Nuwe tempel. Jesus reinig die tempel. Die mense wil weet met watter gesag hy hierdie dinge doen. Profeties verwys Jesus dan na sy eie dood en opstanding. Hy doen dit deur te verwys na die afbreek en opbou van die tempel. Vir die Jode was die tempel die belangrikste gebou op aarde; vir Jesus was dit slegs ‘n skadu. Christus self is die nuwe tempel.
• Nuwe geboorte. Nikodemus kom een nag na Jesus toe. Hy was  ‘n bekende leermeester in Israel, maar hy verstaan nie die openbaring van God in die Skrif nie. Al sy geleerdheid help hom niks nie. Al wat sal help is ‘n nuwe geboorte: As iemand nie opnuut gebore word nie, kan hy die koninkryk van God nie sien nie. Jesus gee hierdie nuwe geboorte.
• Nuwe water. Jesus praat met die Samaritaanse vrou. Jesus praat van lewende water. Die vrou verstaan dit nie en sê: Jy is tog nie tot meer in staat as ons voorvader Jakob wat hierdie put vir ons gegee het nie. Dit is die hele punt: Jesus is groter as Jakob. Aan die voorvaders is die beloftes gegee; Jesus was die vervulling van die beloftes. Jakob se water les die vrou se dors slegs tydelik. Jesus gee water wat sal maak dat sy nooit weer dors sal kry nie.
• Nuwe lewe. ‘n Regeringsamptenaar kom na Jesus. Sy seun lê op sterwe. Sy saak was hopeloos. Die wet van Moses kon nie sy seun weer lewend maak nie. Wat hier nodig was, was nuwe lewe … en Jesus gee dit.

Wat leer ons uit hierdie insidente? Ons kry ‘n leidraad in 2:11: Hy het daardeur sy heerlikheid laat blyk, en sy dissipels het tot geloof in Hom gekom. Johannes het reeds hierdie beginsel in 1:17 verduidelik: God het die wet deur Moses gegee; die genade en die waarheid het deur Jesus Christus gekom.

Ons moet toelaat dat Jesus Christus ons heeltemal vernuwe.

For above all things we must beware, that we neither pray privately nor publicly to this end [i.e., to be noticed], neither yet fashion the gesture of our body, to get the vain praise of the people, that we may seem to be renowned and accounted holy before men: it sufficeth that we please God, and be allowed by his judgment. Heinrich Bullinger

Die inwonende Christus

In die Nuwe Testament lees ons dat Christus in ons woon. Twee vrae kom na vore:

• Op watter manier woon Christus in ons? Julle moet in My bly en Ek in julle (Johannes 15:4). Dit is die voorwaarde as ons baie vrugte wil dra. Later sê Jesus: Ek in hulle en U in My, sodat hulle volkome een kan wees … Ek het u Naam aan hulle bekend gemaak … sodat die liefde wat U aan My bewys het, in hulle kan wees en Ek ook in hulle (17:23, 26). Jesus het reeds aan sy dissipels bekend gemaak dat Hy in hulle deur die Heilige Gees bly. Jesus verwys dan ook na die Heilige Gees as ‘n ander Voorspraak (14:16). Hy gaan verder deur vir hulle te sê dat hulle op pinksterdag sal weet dat hulle in Hom is en Hy in hulle (14:20). Paulus sê presies dieselfde in Romeine 8: Die Gees van God woon in julle (vs 9); Omdat Christus in julle is (vers 10); ens. Christus woon in ons deur die Heilige Gees.
• Watter verskil maak dit in ons lewens?Hier is verskeie aspekte van belang:
  • Dit verander die rigting van ons lewens. En nou is dit nie meer ek wat lewe nie, maar Christus wat in my lewe (Galasiërs 2:20). Die ou lewe oorheers deur die duiwel en Satan is verby; ons leef nou vir Christus.
  • Sodra Christus in ons bly, word ons lewe ‘n geestelike slagveld. Christus bly in ons, maar ook nog die sonde. Dit moet tot konflik lei. Die groot verskil is dat as Christus in ons woon, sal die sonde ons nie meer oorwin nie.
  • Ons houding teenoor medegelowiges verander, want ons besef dat dieselfde Christus wat in ons woon ook in hulle woon. Hier is Christus alles en in almal (Kolossense 3:11).
  • Nou behoort ons liggame aan Hom. Ons oë en wat ons sien, ons lippe en wat ons sê, ons hande en wat ons aanraak, ons voete en waar ons gaan – alles is Syne.

Christus woon in ons. Hoe? Deur sy Heilige Gees. Hoe weet ons dat Hy in ons woon? Ons lewens verander.