Bose simbole wat jou geestelik kan beïnvloed – Kobus Kok

Corne vra: 

Ek wil nou baie seker maak. My dogter was op n kamp waar hulle opleiding ontvang mbt musiek in die moderne wêreld. Daar is verskillende popgroepe en selfs Afrikaanse alternatiewe ” rock bands” waar woorde en tekens in hulle musiek en video’s voorkom wat satanistiese oorsprong het. ‘n Rukkie gelede was daar n e-pos oor die Monster energie drankie wat sportmense gebruik. Die M is blykbaar Hebreeuse syfers vir 666. Ek het op die Internet gaan gaan soek vir webwerwe oor die onderwerp. Daar is nogal heelwat inligting oor musiek met versteekte boodskappe en selfs kos en koeldrankadvertensies waar daar versteekte boodskappe in hul logos versteek is. Hoe maak mens in n wêreld vervuil van goed wat jy nie eers weet dat die duiwel dit gebruik om jou in te trek of om jou te verswak nie. Hoe maak mens dit duidelik aan jou kinders? Moet hulle nou onmiddellik gaan en alle musiek van hulle selfone of rekenaars afhaal of skrap? Kan dit ‘n invloed hê op jou gees of bindinge plaas op jou lewe sonder dat mens dit eers besef? Kan dit bindinge bring soos vrees, angstigheid, terneergedruktheid , lae selfbeheersing of die vrug van die Gees in jou lewe aanval?

Antwoord

Prof Kobus Kok antwoord:

Wees versigtig om inhoud te “vul” in simbole

Mens moet versigtig wees om nie vasgevang te word in die soeke en interpretasie van allerlei simbole nie. Ek het nou die dag gehoor hoe iemand daarop wys dat Apple rekenaars, ipads en iphones eintlik duiwelse simbole dra. Die rede wat aangevoer word, is dat die appel van Apple Computer ‘n half geknaagde appel verteenwoordig en dit verwys na Genesis waar die slang vir Eva verlei het om die appel te eet en net soveel soos God te wees. Net so verlei Apple Computers mens om te vergeet dat God alles is en dat diegene wat Apple rekenaars gebruik elke dag verlei word. Die probleem is egter dat iemand op ‘n dag die halfgeknaagde appel raakgesien het en dat hulle die simboliese betekenis daarvan met “verskuilde” inhoud gevul het. Dit is baie problematies omdat verbande getrek word en inhoud ingevul word in die simbool wat nie noodwendig getrek moes word nie. Dit is altyd die probleem met simboliese interpretasie – simbole in hulle aard skep die ruimte waarbinne betekenis “ingevul” moet word. Enige ou kan amper enige betekenis daarin vul. Net so het iemand anders eendag die Apple Rekenaar so gekyk en gesê die halfgeknaagde appel staan vir “An apple a day keeps the doctor away”, so Apple Rekenaars probeer iets van heelheid deur die appel simboliseer.  Dit wys jou net dat mens amper enige inhoud in ‘n simbool kan vul. Mense wat geestelik paranoïes is, sal agter elke liewe ding iets geestelik boos en sleg sien. Daarteen moet ons waak.

Christene deel aan God se oorwinningskrag

Ons moet sommer van die begin af vir mekaar se dat ware Christene weet dat geen magte en kragte enige effek op hulle kan hê nie. In Kolossense lees ons van die vroegste Christene wat ook gedink het dat hulle allerlei goed moes doen om die magte van die kosmos (stoigeia toe kosmoe) goed te stem. Hulle was naamlik bang dat die magte van die kosmos negatiewe dinge met hulle kan aanvang. Paulus stel dit in Kolossense 1:15-20 duidelik dat Christus die beeld van die onsienlike God is, en dat hy die eersgeborene van die ganse skepping is. Alles het deur hom tot stand gekom en is in hom en vir hom geskep – die sienlike en die onsienlike. Deur sy kruisdood en opstanding het God deur Christus geïllustreer dat hy baie sterker is as enige mag of krag. Selfs die sterkste mag, die dood, moes voor die opstandingskrag swyg. Christus het die bose magte in die triomftog van God meegesleur (vgl. Kol 2:15). Christene hoef nie bang te wees vir die magte van die kosmos nie, en  hoef ook nie koorsagtig op die uitkyk te wees vir bose simbole nie. Dit het geen mag oor ‘n Christen nie. Leer jou kinders om vanuit hulle identiteit as kinders van die God van oorwinning te leef.

Christene maak regte keuses

Christene is mense wat vanuit ‘n herskepte verhouding met God leef, wat hulle identiteit in God verstaan en graag keuses maak wat in lyn is met hulle identiteit. Sommige vorms van musiek is duidelik nie musiek wat mens se verhouding met God versterk nie. Net so is sekere gesprekke en vriendskappe met mense ook nie altyd opbouend vir mens se geloof nie. Die geheim is om jou te omring met geestelik opbouende dinge. Indien jy voel dat sekere musiek jou negatief beïnvloed, bly eerder daarvan weg.

Skrywer: Prof Kobus Kok

Pornografie – Francois Malan

Yvette vra:

Wil net graag weet waar in die Bybel staan die woord pornografie? Ek weet dis verkeerd en doen nie sulke dinge nie. Dit is vir my seun wat vir ‘n vriend van hom wil wys hy’s besig met sonde en nou wil hy weet waar dit staan!!

Antwoord

Prof Francois Malan antwoord:

Die woord pornografie staan nie in die Bybel nie, maar die saak word dwarsdeur die Bybel aangespreek.

Pornografie kom van die Grieks pornos ‘n hoer, ‘n seksueel onsedelike persoon, en grafein om te skryf. Dit is ‘n uitbeelding in skrif en deur die film, ens. van die seksuele op obsene/onwelvoeglike wyse, om te prikkel Dit beteken gewoonlik om die hele liggaam of dele van ‘n man of vrou se liggaam te ontbloot wat ander mense seksueel kan prikkel (porne vroulike prostituut; pornos manlike prostituut;  porneia seksuele onsedelikheid, hoerery, ontug; vgl. bv. ‘n paar van die tekse waar die woord porne, pornos,of porneia voorkom: Num 25:1; Deutr.23:17; Spreuke 6:26; 23:27; 29:3; Jeremia 3:3; Eseg.16:33; Luk 15:30; 1 Kor 5:9-11; 6:15,16; Efesiërs 5:5; Hebr 13:4; Judas 7).

Genesis 2:24,25 sê ‘n man sal sy pa en ma verlaat en saam met sy vrou lewe en hulle twee sal een word (letterlik: ‘een vlees wees’) wat die seksuele omgang insluit as die bevestiging van hulle lewenseenheid. Hulle twee, Adam en Eva, was kaal, maar hulle was nie skaam nie. Dit is God se doel met die seksuele lewe van man en vrou om in die huwelik ook liggaamlik een te wees.

Genesis 3:7 vertel reeds hoe die mense, nadat hulle ongehoorsaam was aan die Here en in sonde verval het, vir die eerste keer besef het hulle is kaal en probeer het om hulle naaktheid te bedek. Nadat die Here aan die mense hulle straf opgelê het, het Hy uit sy groot genade vir hulle velklere gemaak, en hulle dit aangetrek (Gen 3:21).

Maar in die nageslag van Kaïn was Lameg reeds nie tevrede met een vrou nie, en het homself ook aan ‘n tweede vrou ontbloot (Gen.4:19) en sy suster Naäma (lieflike vriendelike) was volgens haar naam waarskynlik ‘n prostituut wat haar aan mans ontbloot het (Gen4:22).

Reeds in Gen. 6:5,6 was die Here bedroef dat Hy die mense gemaak het, want hulle verdorwenheid was so groot en dat hulle hulle lewenslank net slegte dinge bedink het, en die Here almal behalwe Noag en sy gesin uitgewis het.

Nadat die Here Israel van hulle slaweskap van byna 400 jaar verlos het uit Egipte, het hulle, toe Moses lank by die Here op die berg Sinai gebly het om die wet te ontvang, ‘n goue bulkalf gemaak as hulle god, en wellustig fees gevier om soos bulle en koeie kaal met mekaar te verkeer (Gen.32:3-6; vgl. 1 Korintiërs 10:7; Numeri 25:1-15 waar hulle net voor hulle Kanaän ingaan met die Moabitiese meisies in die Baältempel gemeenskap gehad het, 1 Kor 10:8 se waarskuwing teen daardie onsedelikheid onder Christene).

Daarna het Israel vir 40 jaar in die woestyn geswerf en het hulle kinders Kanaän ingeval. Teen daardie tyd het die ongeregtigheid van die Amoriete, die verskillende stamme van Kanaän, hulle volle maat van sonde bereik en moes Israel hulle uitroei (Gen 15:16). Die Kanaäniete het die bulgod Baäl gedien en die vroulike Astarte of Asjera, en onder elke groen boom en op die heuwels en berge hulle kaal uitgetrek en soos bulle en koeie gemeenskap gehad om vrugbaarheid te kry.

Israel het dieselfde pad gevolg en die Here verlaat om soos die Kanaäniete seksueel te lewe. In Jesaja 57 sê die Here: Israel is gebore uit owerspel en hoerery (v3), hulle dien die afgode met hulle wellus onder die groot bome, onder elke groen boom (v5), hulle verkies die afgodsbeelde in die laagte (v6), op die hoë berge het hulle ‘n plek ingerig vir onsedelikheid en daarheen opgeklim om offers te bring (v7), agter hulle deur en aan hulle kosyne het hulle beeldjies opgehang. In jou ontrou aan My, het jy jou kaal uitgetrek, op jou bed geklim en vir jou minnaars plek gemaak. Jy het jou verbind aan dié saam met wie jy graag geslaap het. Jy het hulle naaktheid geniet (v8; Astartebeeldjies was van vroue met ontblote borste, en Baälbulle met vergrote geslagsdele), jou wellus het jou aanhou oorweldig, daarom het jy nie opgehou nie (v10).

Om vir al die sondes van die wêreld versoening te doen, ook vir al die seksuele oortredings, het God self gekom, mens geword, en sy eie volk, die Jode, het Hom laat kruisig. Die Romeinse soldate wat Jesus moes kruisig het Hom kaal uitgetrek en aan die kruis gespyker (Johannes 19:23-24).

En nou moet ons lewe as mense wat deur Jesus se offer gereinig is van ons sonde. Jesus het sy Heilige Gees gestuur om in ons te woon en ons te leer om soos kinders van God te lewe (Romeine 8:3-17). Jesus het reeds gesê: elkeen wat na ‘n vrou kyk en haar begeer, het reeds in sy hart met haar egbreuk gepleeg (Matteus 5:28). Paulus sê: Dir is die wil van God dat julle heilig moet lewe. Weerhou julle van die onsedelikheid. Elkeen moet weet om sy vrou met heiligheid en eerbaarheid te verkry en saam te lewe; julle moenie deur hartstog en begeerte gedrywe word soos die heidene wat vir God nie ken nie (1 Tessalonisense 4:3-5). In 1 Korintiërs 6:19-20 sê hy: Of besef julle nie dat julle liggaam ‘n tempel van die Heilige Gees is nie? Julle het die Heilige Gees ontvang, en julle behoort nie aan julleself nie: Julle is gekoop, en die prys is betaal (deur Christus aan die kruis). Julle moet God dus in julle liggaam verheerlik.

God het reeds Adam en Eva se liggame bedek met klere van vel. Maar wanneer mans en vroue weer begin om so veel as moontlik van hulle liggame te ontbloot, moet hulle weet dit prikkel mekaar en lei tot seksuele begeertes wat weglei van die Here en sy pad af. Paulus sê in Filippense 4:8: alles wat waar is, alles wat reg is, alles wat rein is, alles wat mooi is, alles wat prysenswaardig is – watter deug of watter lofwaardige saak daar ook mag wees – daarop moet julle julle gedagtes rig. Maar as ons begin pornografiese boeke en tydskrifte met kaal mans en meisies begin lees, en pornografiese TV programme en foto’s ook op rekenaars en selfone begin kyk, beweeg ons lynreg weg van die Here en die beste pad vir ons lewe.

Skrywer: Prof Francois Malan

Sal ons mekaar na die dood herken? – Kobus Kok

Heila vra:

Ek het gelees dat ons mekaar nou op die name ken, maar na die dood sal ons mekaar nie herken of ken nie. Waar in die Bybel staan dit?

Antwoord

Prof Kobus Kok antwoord:

Myns insiens sal ons mekaar na die dood wel herken. Dit is in baie Nuwe Testamentiese gedeeltes duidelik dat die identiteit van die persoon wat gesterf het, in die hemel steeds herkenbaar is. Die bekendste voorbeeld is die verhaal van Lasarus en die ryk man (Luk 16:19-31). Hulle herken mekaar duidelik. Volgens 1 Korintiërs 15 gaan ons getransformeerde liggame hê. Presies hoe dit gaan lyk weet ons nie. Ons weet egter dat ons herkenbaar sal wees vir mekaar. Hierdie herkenbaarheid gaan op ‘n baie dieper vlak lê as ‘n fisiese vlak.

Skrywer: Prof Kobus Kok

Die heerlikheid van God – Kobus Kok

Fia vra: 

Ek wil graag meer weet van die heerlikheid van God.

1. Kan ons nou al die heerlikheid beleef in ons aardse lewe?
2. Wat behels die heerlikheid van God in die hemel? En verheerliking van God? Is dit eer en lof deur lofprysing en ook deur my lewe; dit waarvan my lewe getuig?

Antwoord

Prof Kobus Kok antwoord:

Die heerlikheid van God? Liggaamlik of fisies? Nou al of eers dan?

Die heerlikheid van God waarvan ons in die Nuwe Testament lees, kom van die Griekse woord doksa. Dit is ‘n baie komplekse woord en rondom die gedagte het daar uiteenlopende perspektiewe in die antieke tyd bestaan tussen die Jode, die Stoïsyne, die Platoniste en die Middel-Platoniste en natuurlik ook die Gnostiese groepe. Die Bybel se siening van die doksa het beide Joodse en Grieks-Hellenistiese, veral Stoïsynse gedagtelyne, wat baie verskil van die Platoniste en die Gnostieke groepe. Om dit eenvoudig te maak: Die Jode en die Stoïsyne het geglo dat die gees of pneuma materieel, fisies in die mens aan die werk is. Die Platoniste en veral die Gnostiese denkgroepe het geglo dat die gees of pneuma nie materieel is nie, en ook nie aan die mens se liggaamlikheid gekoppel kan word nie. Volgens Troels Engberg Pedersen, ‘n professor van Kopenhagen, in sy boek Cosmology and Self in the Apostle Paul (vgl. http://www.amazon.com/Cosmology-Self-Apostle-Paul-Material/dp/0199558566#reader_0199558566 ), was Paulus ‘n ou wat geglo het dat die Gees fisies in die mens teenwoordig  is en dat dit daartoe lei dat ons kan sê dat die doksa van God en die krag of dunamis van God aktief in ons vleeslikheid aan die werk is. Die middel Platoniste en die ouens soos die Gnostiek (‘n ketterse splintergroep van Christene wat ons veral vanaf die tweede eeu n.C. kry) het geglo dat die liggaam van die mens so soort van ‘n tronk is en dat die gees net nie kan wag om te ontsnap uit die liggaam nie. Hulle sou nie gedink het dat die doksa of heerlikheid van God aan die werk kan wees in die verganklike menslike liggaam nie. Paulus praat bietjie anders daaroor. Hy is van mening dat die heerlikheid van God juis aan die werk is in ons liggame. Lees gerus 1 Korintiërs 15 en Romeine 8.

Deur die wedergeboorte en die doop kry ons fisies nou al deel aan God se Gees en die krag van God. In en deur ons sterwende, fisiese liggame word die doksa of heerlikheid van God tog nou al in hierdie lewe sigbaar omdat die Gees aan die werk is in en deur ons fisiese liggame (vgl. 1 Kor 3:16). In die proses is daardie doksa en die dunamis van God nie bedoel om versamel te word soos hemelse pêreltjies nie, maar bedoel om uitgedeel te word. Ons word geroep om die werk van God se dunamis in ons lewe so uit te straal dat die doksa van God vir die wêreld sigbaar word, met die doel dat die ganse wêreld se knieë uiteindelik sal buig en verklaar dat Jesus die Here is tot eer en verheerliking van God. Wanneer ons sterf, word ons opgeneem en getransformeer in geestelike liggame, deur God se krag, en kry ons deel aan die absolute heerlikheid van God. Wanneer Christus weer kom, sal almal, die wat lewe en die wat reeds gesterf het die absolute heerlikheid en krag van God in en deur Christus sien.

Ons sien dus die volgende belangrike aspekte by Paulus se siening van die doksa:

1. Dit is fisies aan die werk in die liggame van gelowiges alreeds in hierdie lewe deur die krag of dunamis van God se gees of pneuma. Dit klink bietjie anders as wat ander geloofsgroepe soos die Gnostici daaroor gepraat het.
2. Daar is dus ‘n duidelike verband tussen die pneuma (gees), die krag van God (dunamis) en die heerlikheid (doksa) van God.
3. Ons kry nou al deel aan die doksa van God (heerlikheid) en die krag van God, maar sal dit eers na ons dood of by die wederkoms in volle effek sien/beleef.
4. In en deur ons gebroke, sterwende liggame is die krag van God aan die werk en daarom kan ons ook instrumente wees wat die heerlikheid van God aan ander mense uitstraal soos ligte wat skyn in hierdie wêreld.

Die teks wat dit die duidelikste beskryf is Filippense 2:15

“…. sodat julle onberispelik en opreg kan wees, kinders van God sonder gebrek te midde van ‘n krom en verdraaide geslag onder wie julle skyn soos ligte in die wêreld…” In hierdie teks is dit duidelik dat God se krag, sy heerlikheid in ons werk, en dat ons daardeur God se heerlikheid deur ons lewe laat skyn en so lof en heerlikheid aan God bring. Doksa of heerlikheid is dus in resiprositeits-beginsels ingebed. Resiprositeit beteken dat as ek iets ontvang dat gee ek dit weer terug. God transformeer ons, en daarom is ons geroep om as nuwe mense tot sy eer te leef en ons lewe aan hom te wy. Deur te leef tot God se eer straal ons sy heerlikheid uit en dien dit as ‘n getuienis vir ander. As ons lewe ‘n getuienis is, dan bring dit weer lof aan God. Ek noem hierdie tipe teologie ‘n positiewe resiprositeitspiraal.

Skrywer: Prof Kobus Kok