Tiendes – Francois Malan

Danie vra: 

Tiendes – wat sê die Bybel? Is my tiende my inkomste of kan ‘n deel van my tiende ook bestaan uit tyd of uitreik of sending of woordverkondiging? Wat van as ek geen inkomste verdien nie – wat is my tiende dan ?

Antwoord

Prof Francois Malan antwoord:

Die eerste wat ons van die tiende in die Bybel lees is Gen.14:20, waar Abram ‘n tiende van die goed wat hy teruggekry het aan die priester Melgisedek gegee het, nadat Lot en die mense van Sodom weggevoer was en hy hulle teruggebring het. Daarvan lees ons ook in Hebreërs 7:2,4,5,6,8,9. Daarna lees ons in Gen.28:22 van Jakob, wat sonder iets moes vlug en by Bet-el ‘n tiende aan die Here beloof het van alles wat hy in die toekoms sou kry.

Daarna word die tiende in baie tekse van Levitikus, Numeri, Deuteronomium, 2 Kronieke, Nehemia en Amos voorgeskryf vir Israel. En dan Maleagi 3:8,10 se beloftes van die Here, dat die vensters van die hemel sal oopgaan as ons ons tiendes gee.

In Matteus 23:23 verwyt Jesus die Fariseërs dat hulle o.a. op die gee van tiendes steun, en nie op wat die swaarste weeg van die wet nie, dit wat belangiker vir God is, soos geregtigheid, barmhartigheid en betroubaarheid. In Matteus 25:34-40 verduidelik Jesus wat Hy van ons verwag.

Paulus se aanwysings oor die gelowiges se bydraes staan o.a. in 2 Kor.8-9. Hy sê bv. ‘die wat karig saai, sal karig oes; en wie volop saai, sal volop oes. Elkeen moet gee soos hy hom in sy hart voorgeneem het, nie met teësin of uit dwang nie, want God het ‘n blymoedige gewer lief (9:6-7). Vir die ouderlinge van Efese herinner hy aan die woord van Jesus ‘Om te gee maak ‘n mens gelukkiger as om te ontvang’ (Hand.20:35).

Ons bring nie meer offers wat op ‘n altaar verbrand word soos die Israeliete nie, maar Paulus sê dat ons hele lewe ‘n offer van dankbaarheid aan God moet wees vir sy genade wat Hy aan ons bewys. In alles wat ons doen: huiswerk soos skottelgoed was, by die werk in ons beroep met eerlike harde werk om mense daarmee te dien, en in ons getuienis en gedrag teenoor mense, ook in die huwelik en grootmaak van die kinders wat die Here aan ons toevertrou het, is ons besig om God te dien. Vgl. Romeine 12:1 ‘Gee julleself aan God as lewende en heilige (= aan God gewyde) offers, wat vir Hom aanneemlik is…’

As ek geen inkomste verdien nie – lees Markus 12:41-44 (Luk.21:1,2).

 

Skrywer: Prof Francois Malan

Is liefde belangriker as geloof en liefde? – Francois Malan

Yolande vra: 

In Korintiërs sê dit liefde is belangriker as geloof en hoop. Beteken dit dis okay om nie te glo nie, solank jy liefde leef? Ek was al by soveel begrafnisse waar die persoon wat dood is goed gepraat word. Dan sê die predikant X se lewe is gekenmerk deur liefde, maar sê niks oor sy/haar verhouding met Jesus nie. Dis vir my hartseer.

Antwoord

Prof Francois Malan antwoord:

1 Kor.13:13 sê: ‘en nou bly geloof, hoop en liefde, hierdie drie; maar die grootste hiervan is die liefde.

In hoofstuk 13 het dit eintlik gegaan om die genadegawes wat tydelik is en ophou, teenoor die liefde wat vir altyd bly, en tot in ewigheid. Skielik noem Paulus geloof en hoop saam met die liefde, omdat dit die drie dinge is wat ons geestelike lewe opsom:

Geloof = vertroue op God; dat Hy ons vergewe en ons aanneem as sy kinders vir wie Hy sorg; omdat ons in sy Seun Jesus Christus glo, vertrou op sy offer vir ons sondes en op sy opstanding waardeur ons ook die ewige lewe ontvang. Die geloof is egter ‘n gawe van God, wat die Heilige Gees in ons bewerk.

Hoop = die verwagting van die ewige lewe saam met God, wat Christus vir ons waarborg deur sy Gees wat in ons kom woon het. Die Gees is God se waarborg dat ons sy kinders sal bly deur daagliks sy leiding te volg met die krag wat Hy vir ons gee om te lewe.

Liefde = is die verhouding van die Vader en die Seun en die Gees met mekaar (God is liefde, 1 Joh. 4:7-21). God het in ons kom woon met sy Gees, sodat ons ook kan begin liefhê: vir God en vir mekaar, selfs vir ons vyande (Matt.5:43-48), soos die Vader en die Seun en die Gees mekaar liefhet. Uit ons eenheid met mekaar kan die wêreld sien dat God ons liefhet (Joh.17:20-23).

Die spanning van die geloof wat nog nie sien nie, gaan egter ophou as ons by God kom, want dan sal ons Hom ten volle ken soos Hy ons ten volle ken (1 Kor.13:12).

Ook die spanning van die hoop op wat ons nie sien nie (Hebr.11:1), gaan ophou as ons die ewige erfenis van God ontvang in die hemel.

Maar die liefde bly tot in die ewigheid, as die verhouding tussen die mense van die God van liefde, en tussen God en sy kinders – niks kan ons skei van die liefde van God wat daar in Christus Jesus wat die Here oor ons lewe is nie (Rom.8:39).

As Jesus in Matteus 25:34-40 vertel van die oordeelsdag, sê Hy niks oor die geloof in Hom nie, maar praat Hy oor die persoon wat die erfenis van die ewige lewe ontvang se liefdesdade. Dit is die bewys dat ons in Hom glo en op Hom hoop.

 

Skrywer: Prof Francois Malan

Verwag die Here dat ons altyd vir bedelaars moet gee? – Kobus Kok

Yolande vra: 

Verwag die Here dat ons altyd vir bedelaars iets moet gee? Y

Antwoord:

Dr. Kobus Kok antwoord:

Iemand het eenmaal opgemerk dat indien mens vir bedelaars elke dag iets in die hand stop, jy hulle eintlik help om vasgevang te bly in hulle armoede. Die persoon se argument was dat mens eerder vir ‘n bedelaar ‘n visstok moet gee as om vir die bedelaar net elke dag ‘n nuwe vis te gee. Hierdie persoon is natuurlik reg dat vriendelike Christen gewers eintlik die armoede van die bedelaar in stand hou en die bedelaar nie bemagtig nie. Aan die ander kant het Jesus gesê dat Christene gekenmerk moet word deur die wyse waarop hulle gee. Ek het onlangs ‘n baie interessante boek gelees wat deur die geleerde Rodney Stark geskryf is met die titel “The Rise of Christianity”. In sy navorsing oor die saak het hy die vraag ondersoek na die eksponensiële groei van die Christendom in die eerste vier eeue. Die Christen beweging het met 12 mense begin en teen 315 nC was daar letterlik miljoene mense in die Romeinse Ryk wat Christene was, en het Constantyn, die eerste Romeinse Keiser tot bekering gekom en die Christendom die amptelike religie van die Romeinse Ryk gemaak. Hy het ook in sy navorsing bevind dat die antieke geskrifte dikwels melding maak van die omgee en die liefde wat Christene gewys het teenoor hulle eie mense, maar veral ook na die mense wat nie deel was van hulle eie groepie nie. Ja, die eerste Christene het bekend gestaan vir die wyse waarop hulle vir die heidene omgegee het. In die eerste drie eeue was daar naamlik verskeie epidemies wat die ganse wêreld platgeslaan het. Miljoene mense regoor die Romeinse Ryk het gesterf. Die antieke skrywers vertel hoe mense stede verlaat het en die siekes soos gemors langs die strate gelos het. Baie families het die siekes onder hulle net so onversorg gelos. Ironies genoeg het die Christene dit nie gedoen het nie. Hulle het nie net na hulle eie mense omgesien nie, maar ook na die doodsiek heidene opgesien. Baie het in die proses doodgegaan, maar ander se immuun sisteme het volgens Stark juis versterk en hulle in staat gestel om na die siekes te kyk. Dit het ‘n reuse indruk op die heidene gemaak en baie heidene het in die proses tot bekering gekom.

In Gal 6:10 lees ons dat Paulus sê dat Christene altyd goed moet doen aan mekaar, maar veral ook aan die wat buite die geloofsgemeenskap is. Dit was die hart van Jesus, en moet ook die hart van Christene vandag wees.

Wanneer ons egter vir mense gee uit skuldgevoel, dan mis ons die punt van Christus se boodskap. Dan hou ons die arm persoon in die greep van afhanklikheid en van armoede. Indien ons as Christene gee, moet dit wees op so ‘n wyse dat mense versterk en bemagtig word en dat die evangelie in die proses gedien en verkondig kan word. Dikwels het iemand meer nodig as ‘n geldjie op die straathoek – dalk sal belangstelling en woord van bemoediging of motivering meer waarde dra as die R10 wat jy in die persoon se hand stop. Gebruik jou geestelike oordeel.

 

Skrywer: Dr Kobus Kok

Is lag in die Heilige Gees Bybels? – Kobus Kok

Frans vra:

Tydens aanddiens het die prediker gesê die Gees sal julle monde vul met gelag en toe begin baie mense hardop lag. Kry ons so iets in die Bybel en is dit die werking van die Heilige Gees

Antwoord

Dr. Kobus Kok antwoord:

Is lag in die Heilige Gees Bybels?

Die antwoord is baie eenvoudig. Ja en nee! Die Heilige Gees kan jou laat lag, indien ons lag verstaan as die uitvloeisel van vreugde en blydskap. Maar, mens moet baie versigtig wees om dit nie te verwar met die histeriese lag-episodes waarvan ons soms hoor nie. Ek het sulke eredienste ook al beleef en is werklik oortuig daarvan dat dit nie heeltemal is wat die Bybel daarmee bedoel het nie, veral nadat ek eendag gehoor het dat die pastor tekste aanhaal wat eintlik in die Grieks heeltemal ‘n ander betekenis het as wat hy dit in die erediens gebruik het. Ek sê dit egter versigtig omdat ek ook glo dat God se Gees kan doen wat hy wil en wanneer hy wil (vgl. 1 Kor 12). Ek kan in hierdie artikel egter net wys op die Bybelse teks en die betekenis van oorspronklike woorde in die antieke konteks. Paulus stel dit duidelik in Galasiërs 5:22 dat die vrug van die Gees juis blydskap is. Daar moet egter daarop gelet word dat blydskap hier nie verwar moet word deur histeriese lag episodes nie. Blydskap verwys hier eerder na ‘n leefwyse waarin mens jou geluk in die Here vind. Die Griekse word “gara” word in hierdie kontekste gebruik en dui op ‘n lewenswyse wat deur blydskap en dankbaarheid in die Here gekenmerk word en verwys glad nie na tydelike lag-simptome nie. Die word “lag” kom net ‘n handjievol kere in die Bybel voor en word nie in die kontekste gebruik waar mense in die Heilige Gees aan die lag gaan nie. In die Grieks word die woordjie (egelasen) gebruik vir lag en dit kom byvoorbeeld voor in Gen 17:17 waar Abraham so lekker lag. Hier is al die tekste waarin die word blydskap (gara) voorkom in Paulus se literatuur en u kan dit gerus op u eie tyd bestudeer (AOV staan vir Afrikaanse Ou Vertaling):

(Rom 14:17 AOV) Want die koninkryk van God is nie spys en drank nie, maar geregtigheid en vrede en blydskap in die Heilige Gees.

(Rom 15:13 AOV) En mag die God van die hoop julle vervul met alle blydskap en vrede deur die geloof, dat julle oorvloedig kan wees in die hoop deur die krag van die Heilige Gees!

(Rom 15:32 AOV) sodat ek met blydskap deur die wil van God by julle kan kom en my saam met julle kan verkwik.

(2Kor 1:24 AOV) nie dat ons heers oor julle geloof nie, maar ons is medewerkers aan julle blydskap; want in die geloof staan julle vas.

(2Kor 2:3 AOV) En ek het juis dit aan julle geskrywe, dat ek nie by my koms droefheid mag hê deur hulle oor wie ek my moes verbly nie, omdat ek die vertroue in julle almal het dat my blydskap dié van julle almal is.

(2Kor 7:4 AOV) Ek het groot vrymoedigheid teenoor julle; my roem oor julle is groot; ek is vervul met troos; ek loop oor van blydskap in al ons verdrukking.

(2Kor 7:13 AOV) Daarom is ons getroos oor julle vertroosting en het veral bly geword oor die blydskap van Titus, omdat sy gees deur julle almal verkwik is.

(2Kor 8:2 AOV) dat onder baie beproewing deur verdrukking hulle oorvloedige blydskap by hulle diepe armoede oorvloedig was in hulle ryke milddadigheid.

(Gal 5:22 AOV) Maar die vrug van die Gees is liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing.

(Filippense 1:4 AOV) en ek bid altyd in al my gebede vir julle almal met blydskap—

(Filippense 1:25 AOV) En dit vertrou en weet ek dat ek sal bly, ja, saam met julle almal sal bly tot julle bevordering en blydskap in die geloof,

(Php 2:2 AOV) maak dan my blydskap volkome deur eensgesind te wees en dieselfde liefde te hê, een van siel, een van sin.

(Filippense 2:29 AOV) Ontvang hom dan in die Here met alle blydskap en hou sulke manne in eer.

(Filippense 4:1 AOV) Daarom, my geliefde broeders, na wie ek ook verlang, my blydskap en kroon, staan so vas in die Here, geliefdes.

(Kol 1:11 AOV) en met alle krag bekragtig word volgens die mag van sy heerlikheid tot alle lydsaamheid en lankmoedigheid met blydskap,

(1Tess 1:6 AOV) En julle het navolgers van ons geword en van die Here deurdat julle die woord in baie verdrukking ontvang het met die blydskap van die Heilige Gees,

(1Tess 2:19 AOV) Want wie anders as julle is ons hoop of blydskap of kroon van roem in die teenwoordigheid van onse Here Jesus Christus by sy wederkoms?

(1Tess 2:20 AOV) Want julle is ons eer en blydskap.

(1Tim 3:9 AOV) Want watter dank kan ons God vergelde oor julle vir al die blydskap waarmee ons om julle ontwil ons verbly voor onse God,

(2Tim 1:4 AOV) terwyl ek verlang om jou te sien as ek aan jou trane dink, sodat ek met blydskap vervul kan word,

(Filemon 1:7 AOV) Want ons het groot blydskap en troos oor jou liefde, omdat deur jou, broeder, die harte van die heiliges verkwik is.

 

Skrywer: Dr Kobus Kok