Ek bly sonder kos en sulke dinge, maar nie om te dieet nie, maar om te vas

Die Bybel praat van ŉ gebruik om ter wille van jou godsdiens nie kos te eet vir ŉ ruk nie – dit word vas genoem (Matteus 6:16-18). In plaas daarvan om te eet, fokus jy op God. Sodra jy honger word, of etenstyd aanbreek, sê jy vir jouself nee vir die kos en dink dan liewer aan die Here en praat met Hom. Op die manier word die vastyd ŉ spesiale tyd vir jou en God. In die tyd kom jy sommer baie nader aan hom.

Die probleem in die Bybel was dat sommige mense wel gevas het, maar om verkeerde redes. Hulle wou hê mense moes sien hoe godsdienstig hulle is. Hulle het nie gevas sodat hulle nader aan die Here kon kom nie, maar sodat mense meer van hulle kon dink. Daarom was die Here nie baie gelukkig daaroor nie.

Ons vas nie eintlik meer vandag nie, want Jesus het gesê dat as die Here elke dag so naby jou is, ja, in jou is, moet jy geen oomblik van Hom vergeet nie. Hy moet soos jou beste vriend wees. Dan hoef jy nie spesiale tye af te sonder om Hom te soek nie. Nee, jy moet elke dag saam met Hom feesvier en jou lewe geniet.

Dit beteken nou nie dat dit verkeerd sou wees as jy tog vir ŉ rukkie “vas” om net weer op jou verhouding met die Here te konsentreer nie. Jy kan iets wat jy graag doen of eet vir ŉ ruk los, net om jou daaraan te herinner dat jy gereeld met Jesus moet praat en moet doen wat Hy vra. Maar dan moet jy dit met die regte gesindheid en doel doen: om nader en nader aan jou Here te kom.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Vals profete

Mense kan jou soms so deurmekaar praat oor die godsdiens dat jy nie weet wie om te glo en wie nie. Dit was in die Bybelse tyd al so en dit is baie gevaarlik, want ŉ mens kan maklik op die verkeerde pad beland.

Die Bybel is ons anker as dit by waarheid kom. As iemand vir jou iets vertel wat met die Bybel bots, moet jy maar katvoet loop. In 1 Johannes 4:1-3 sê Johannes dat selfs as iemand beweer die Heilige Gees self het vir hom die boodskap gegee – en die boodskap verskil van die boodskap van Jesus – moet jy hom nie glo nie. Immers, die Gees sal mos nie ŉ boodskap gee wat Jesus ondermyn nie. As iemand so ŉ boodskap, wat met Jesus s’n bots, aan jou wil afsmeer, is dit die sekerste teken van ŉ dwaalleraar. Paulus sê dit nog sterker: hy sê dat selfs as ŉ engel deur die venster vlieg en voor jou kom staan en sê jy moet iets anders as die goeie boodskap van Jesus glo, moet jy vir hom sê hy kan maar gaan vlieg (Galasiërs 1:8). Jesus se boodskap staan vir jou vas.

Partykeer kom mense na jou toe en sê “Die Here (of die Gees) het dit of dat vir my oor jou gesê”. Baie keer is dit sommer ŉ seermaak boodskap. Moenie dit sommer net so glo nie. Die Here sal mos nie by ander oor jou “skinder” sonder om vir jou self ook daarvan te sê nie. Nee, as Hy oor jou iets wil sê, sal hy dit vir jou ook sê. Hy sal dit vir jou op ŉ manier bevestig. Oppas vir mense wat jou met godsdiens probeer manipuleer.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Die Here kies vir jou (Uitverkiesing)

Kies die Here party mense en party mense nie? Sommige mense sê ons moet die uitverkiesing so verstaan. As die Here jou kies, sal jy gered word. As Hy jou nie kies nie, sal jy nie gered word nie. Ander sê weer ŉ mens moet jou bekeer, anders gaan jy nie gered word nie. Wat moet ons glo?

Kom ons kyk of ŉ storie ons kan help. Sê nou die skoolhoof besluit dat hy so baie van die kinders in die skool hou, dat hy volgende Vrydagoggend voor skool vir elkeen ŉ roomys gaan gee. Hy kondig dit af, reël dat die roomys daar is en deel dit ook uit. Vrydagoggend kom en die kinders kry hulle roomys. ŉ Paar het gedink dis ŉ grap of het hulle nie daaraan gestuur nie. Toe hulle later met skoolopening daar aankom, is alles verby. Wie moet hulle blameer dat hulle niks gekry het nie? Wel, net hulleself. As ons mooi na die storie kyk, het die skoolhoof alles gedoen en gereël. Hy het letterlik alles gedoen. Al wat die kinders moes doen, is net om die roomys te kom haal.

So werk God met ons ook. Hy het net mooi alles vir ons redding gereël. Hy het uit liefde besluit om ons te red, het Jesus gestuur om alles reg te maak vir die redding, het predikante gestuur om ons te vertel van die redding en so aan. Met al hierdie dinge het ons as mense net mooi niks te doen nie. God reël dit. In die sin kan ons sê dat alles van God af kom. Sonder Hom sou daar niks gewees het nie. Maar as ons nie die redding aan die voet van die kruis by Jesus kom kry nie, het ons ook maar niks (net soos die kinders wat nie die roomys kom haal het nie). Dan kan ons ook nie vir God blameer nie. Ons kan net onsself blameer. Ons weet mos waar om die redding te kry: by Jesus deur in Hom te glo. As ons ons nie daaraan steur nie, moet ons nie verwag dat God dit in ons kele gaan afdruk nie.

In Efesiërs 1 lees ons dan ook dat God almal gekies het wat aan Jesus behoort. Hy het Jesus gekies en saam met Hom almal wat aan Hom glo. As jy dus aan Hom glo, kan jy maar weet God het jou gekies.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Die Here doen wat Hy sê (Beloftes in die Bybel)

Mense sê darem maklik iets wat hulle nie bedoel nie. Hulle sê hulle sal jou bel of by jou kom kuier en dan doen hulle dit nooit nie. Daarom is daar ŉ spesiale woord wat ons gebruik as iemand regtig ernstig is en jou 100% wil oortuig dat hy of sy dit gaan doen wat gesê word. Die persoon plaas dan sy eie eer en integriteit op die spel en beklemtoon dit deur te sê: “Ek belowe jou”. As hy dan sy woord breek, sê dit iets van sy integriteit: hy is onbetroubaar en ŉ leuenaar. Ja, beloftes maak skuld.

Die Bybel is vol beloftes… en dit is feitlik deurgaans God se beloftes. Sjoe, wat beter kan ŉ mens kry. As God belowe, hoef ons nie te wonder of dit gaan gebeur nie. God plaas sy eie eer op die spel as Hy iets belowe. Daarom kan ons maar seker weet dit gáán gebeur. God gaan sorg.

Wat alles nog wonderliker maak, is wat God alles belowe. Dit is die wonderlikste dinge en ons kan seker wees dit gaan alles gebeur. Hy belowe dat Hy vir ons God sal wees as ons Hom dien; dat sy liefde ons sal dra deur wat ook al mag kom; dat Hy ons nie bo ons kragte sal beproef nie; dat Hy met ope arms vir elkeen wag wat in Hom glo en dat as ons in Hom glo ons vir altyd saam met Hom sal wees. Ja, Hy beloof Hy is naby jou, selfs in jou deur sy Gees. Jy hoef nooit bang of alleen te voel nie. En as jy nie meer weet wat om te doen of waarheen om te vlug nie, wéét, Hy is daar. So kan ons aangaan. Miskien moet jy al die beloftes van God in jou Bybel merk. Jy sal verbaas wees wat die Here alles vir jou beloof. En die beste van alles is, Hy breek nooit sy woord nie. Sy beloftes is regtig beloftes.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy