God kom wys vir ons wie Hy is en wat ons moet glo (Openbaring)

Niemand het God nog ooit gesien nie. Die Bybel sê n’ mens sal sowaar dood neerslaan as jy God sommer so sal sien. God is net te groot en heilig.

Nou sê die Bybel dat mense soos Abraham en Moses God wel vlugtig gesien het, Moses net so skuins van agter af. Ten spyte hiervan sê die Bybel niemand het God gesien nie … en dis reg. Niemand het God nog so gesien dat hy of sy God regtig kon leer ken soos Hy is nie. Niemand was nog ooit so naby aan God dat die persoon vir ons kan vertel wat God dink of voel nie.

Nee, so het niemand God nog gesien nie … behalwe Jesus, sy Seun. Hy was by God van die begin af (Johannes 1:18). Hy het God gesien, regtig gesien, soos Hy is. Jesus weet wat God dink, wat Hy van ons wil hê, hoe Hy oor ons voel.

As ons dus wil weet hoe God is, moet ons na Jesus gaan kyk en na Hom gaan luister. Ons kan God nie sommer uitdink of sommer uit ons eie gaan sê hoe Hy is nie. Ons moet by Jesus gaan hoor. Hy sal die gordyn vir ons kan wegtrek en vir ons kan vertel. Dit noem ons openbaring.

Ons het dus n’ openbaringsgodsdiens. Ons skryf nie voor hoe God is nie, maar gaan eerder luister… by Jesus. En waar hoor ons Jesus praat? In die Bybel natuurlik. Lees daarom jou Bybel. Dan sal jy sommer baie meer van God sien.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Ons sal uiteindelik voor die Regter van die heelal moet gaan staan (Oordeel)

As die Here weer gaan kom, gaan daar eers ŉ finale “hofsaak” wees met God as die Regter. By die finale oordeel of hofsaak gaan God as Regter, aandui wie vir ewig by Hom mag wees en wie nie, ja, wie gered is en wie nie (Openbaring 21:11-15; Matteus 25:31-46).

Die mense wat nie aan God behoort nie en wat in hierdie wêreld geleef het asof Hy nie bestaan nie, sal geoordeel word. Dit beteken dat God vir ewig sy rug op hulle sal draai. Hulle sal in hulle eie boosheid vasloop en vergaan. Die mense wat aan God behoort, sal hoor dat hulle vry is om vir ewig saam met God te leef. In die hofsaak het hulle iets wat sterk in hulle guns tel. Hulle het ŉ Advokaat, Jesus, wat namens hulle by die Regter intree (Romeine 8:31-39). As jy Jesus dus ken en vir Hom lief is, sal Hy jou ook nie vergeet by die laaste oordeel nie. Geen Christen hoef dus bang te wees vir die finale oordeel nie.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Om nooit weer dood te gaan nie (Onsterflikheid)

G’n mens is onsterflik nie, al wil party dit so graag wees. Deur die eeue het baie mense probeer om onsterflik te wees – party het groot grafkelders met reuse grafstene gebou met die hoop dat mense hulle nooit sal vergeet nie, maar tog is hulle gou vergeet; ander het hulleself weer gode laat verklaar met die hoop dat dit hulle sal help om vir altyd daar te wees. Ook dit het nie veel gehelp nie. Dan is daar dié wat jou wil vertel dat al gaan hulle dood, hulle nog by jou gaan kom spook, want hulle gaan aanhou leef… Dit kan nie wees nie, want ons is nie onsterflik hier op aarde nie.

God het nie mense onsterflik gemaak nie. Ons is almal maar sterflik! MAAR God kan en gaan ons eendag onsterflik maak as ons uit die dood uit opstaan as Jesus weer kom. Dan gaan ons die ewige lewe hê; en ewige lewe beteken presies wat dit sê: jy gaan vir ewig lewe. Daarom praat die Bybel van wedergeboorte. Jy word weer gebore en die keer met ŉ lewe wat nooit gaan ophou nie. En om alles te kroon, gaan dit vir die gelowiges ŉ lewe saam met God wees. Dit kom nie uit jouself nie; God gee dit vir jou.

Dit is egter nie net alles goeie nuus nie. Mense wat niks van die Here wou weet nie, gaan ook so uit die liggaamlike dood opstaan, maar nie om saam met God te wees nie. Nee, hulle gaan die onsterflikheid in sonder God. En dit gaan hel wees, glo vir my… terloops, die duiwel self gaan hulle gasheer wees.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Die wonderlikste dinge wag vir ons in die hemel (die Nuwe Jerusalem)

Baie keer as mense praat van wat vir ons wag as die Here weer terugkom en ons kom haal, dan praat hulle van die Nuwe Jerusalem. Dit is natuurlik ŉ beeld wat ons in Openbaring 21 kry. Daar word vertel dat na die laaste oordeel God by en tussen sy mense sal kom bly. Dit is wat die hemel eintlik gaan wees: God wat direk saam met elkeen van ons gaan wees.

Maar hoe moet ŉ gewone mens hom dit voorstel? Hoe gaan dit wees? Die skrywer van Openbaring sê dit gaan soos ŉ stad van goud en pêrels en allerhande edelgesteentes wees met die mooiste tuine en ŉ pragtige rivier. Wat die skrywer gedoen het, is om al die mooiste dinge waaraan hy kon dink bymekaar te sit en te sê: so gaan dit wees. Die mense van destyds was maar arm (tot 80% van hulle het nie genoeg kos gehad om te eet nie). Om te hoor dat hulle in ŉ stad van goud gaan bly met kos wat nooit gaan opraak nie en God wat self hulle trane vir hulle afdroog, was vir hulle onvoorstelbaar wonderlik. Wonderliker kon dit nie!

Met ander woorde: hoe gaan dit eendag in die hemel wees? Onvoorstelbaar wonderlik, soos ŉ nuwe Jerusalem. Wonderliker kan dit nie.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy