Leef vir die Here (Sabbat)

Die vierde gebod sê dat ʼn mens op die sewende dag, die sabbat, nie mag werk nie, maar moet rus.

Vir die Jode het die hou van die Sabbat – wat Vrydagaand as die son sak begin en duur tot die Saterdagaand as die son sak – die groot bewys geword dat iemand ʼn goeie Jood is wat die Wet gehoorsaam. In Jesus se tyd was die Jode dus baie ernstig oor die hou van die sabbat en as Jesus iets op die sabbat gedoen het, was hulle gewoonlik dadelik omgekrap en moeilik met Hom. Hulle wou selfs so ver gaan om Hom dood te maak daaroor (Johannes 5:18).

Jesus het egter die sabbat anders gesien. Hy het nie gehuiwer om mense op die sabbat gesond te maak nie en het selfs sy dissipels toegelaat om kos op die sabbat voor te brei, iets wat heeltemal verbied was (Matteus 12:1 en verder). As die Jode hom daaroor aanvat, het Hy op verskillende maniere geantwoord. In Johannes 7:21-24 argumenteer Hy dat die sabbat juis daar is sodat mense gesond kan word. Al moet Hy dan werk om iemand gesond te maak, beteken dit juis mos dat Hy doen wat reg is. By ʼn ander geleentheid het Hy gesê dat die mens nie daar is vir die sabbat nie, maar die sabbat vir die mens (Markus 2:27). Die sabbat is nie die groot reël wat die mens domineer nie, maar die sabbat moet vir die mens die geleentheid gee om regtig menswees saam met God te geniet. Hy het verder gegaan en gesê dat Hy die Here van die sabbat is (Matteus 12:8) waarmee Hy geïmpliseer het dat Hy kan sê wat op die sabbat moet gebeur. Die hou van die sabbat mag nooit ʼn reël word wat almal soos slawe dryf nie. Eintlik moet ons elke dag van die week sabbat vier deur vir Jesus te leef.

Christene het later ook Sondag soos ʼn sabbat begin vier omdat Jesus op ʼn Sondag uit die dood opgestaan het.

Boek: Geloof in Aksie-Bybel

Skrywers: Prof Jan van der Watt, Dr Stephan Joubert, Dr Johan Smith

Uitgewers: Christelike Uitgewers Maatskappy

Om skoon voor God te staan (Reinheid)

Ons hoor baie dat ons rein moet wees.

Dit het te doen met “geestelik skoon” wees, of in die geval van Ou-Testamentiese offers, dat die dier niks moet makeer nie – alles moet reg wees. As 1 Johannes 3:3 dus sê dat ons rein moet wees, beteken dit dat daar geen moddervlek van die sonde in ons lewe moet wees nie. Ons moet so leef dat ons om die poele van sonde loop en nie daardeur nie. Ons moet ons geestelike klere vir die Here skoon hou deur reg te leef.

Boek: Geloof in Aksie-Bybel

Skrywers: Prof Jan van der Watt, Dr Stephan Joubert, Dr Johan Smith

Uitgewers: Christelike Uitgewers Maatskappy

Ons verhouding met God is weer reg (Redding)

In die kerk praat ons baie van redding. Wat beteken dit nou juis?

Redding in die Bybel beteken die regmaak van stukkende verhoudings… stukkende verhoudings tussen God en mense. Dit is interessant dat as die Bybelskrywers oor redding praat, hulle dit omtrent altyd in beelde doen. Feitlik al die beelde gaan oor die regstel van die verhouding tussen God en mense. Kom ons kyk na ʼn paar voorbeelde:

• Loskoping: ons is slawe van die sonde en dan kom koop Jesus ons vir Hom. So kan ons nou as vry mense die Here dien.
• Versoening: as twee persone kwaaivriende is, het ʼn derde persoon gewoonlik as tussenganger kom optree om die vrede weer te herstel. Hy of sy het dan met beide persone gepraat en ʼn manier uitgewerk om die dinge wat tussen die twee verkeerd geloop het, weer reg te maak. Uiteindelik, as alles uitwerk, word die twee weer vriende. Dan is hulle versoen, want die verhouding tussen die twee is weer reg. So is ons ook deur Jesus met God versoen.
• Regverdigmaking: die beeld kom uit ʼn hofgeding waar iemand aangekla word vir wat hy of sy gedoen het. As die regter die persoon onskuldig bevind, is die persoon “regverdig”. Jesus is ons advokaat by God en Hy sorg dat as ons aangekla word ons nie skuldig bevind word nie, maar regverdig verklaar word. As daar “boetes” betaal moet word vir ons skuld, doen Hy dit namens ons. So word die verhouding tussen ons en God weer “reg gemaak”. Dit noem ons die proses van regverdigmaking.
• Wedergeboorte: Johannes sê dat ons dood is in al ons sonde. Maar as ons in Jesus glo, word ons soos kinders geestelik gebore. As nuwe mense begin ons ʼn nuwe verhouding met God.

Elke keer gaan dit oor ʼn verhouding wat doodgegaan of opgehou het, maar wat weer herstel word. Redding beteken dus dat jou verhouding met die Here weer reg is.

Boek: Geloof in Aksie-Bybel

Skrywers: Prof Jan van der Watt, Dr Stephan Joubert, Dr John Smith

Uitgewers: Christelike Uitgewers Maatskapppy

Mense wat tussen God en mens staan (Priesters)

Die Bybel praat van priesters en in party kerke kry ons vandag nog mense wat priesters genoem word.

Eintlik is elke gelowige ʼn priester vir Hom (1 Petrus ). Wat beteken dit nou?

Wel, priesters het in die heiligdom van die Here gewerk. Hulle moes sorg dat alles reg was wat nodig was om die Here behoorlik te dien. Hulle moes dan ook namens die volk by die Here intree met offers en sulke dinge. Hulle het dus mense by God verteenwoordig. Maar die omgekeerde is ook waar. Hulle het ook namens God tussen die mense gewerk. Hulle het mense met die raad en daad van God bygestaan. So gesien, was hulle dus mense wat tussen God en mense gestaan het. Hulle het God vir mense toeganklik gemaak en mense na God toe gebring.

As die Bybel dus sê dat elkeen wat in Jesus glo eintlik ook ʼn priester is, beteken dit dat ons in die wêreld mense moet wees wat tussen God en mense staan. Ons moet namens God hande van liefde, reinheid en genesing na mense toe uitsteek en ook namens mense ons hande na God toe uitstrek. Ons is God se mense in die wêreld en daarom moet ons die kontakpunt tussen God en mense in hierdie wêreld wees, daar waar die vonk tussen mens en God skiet.

Boek: Geloof in Aksie-Bybel

Skrywers: Prof Jan van der Watt, Dr Stephan Joubert, Dr Johan Smith

UItgewers: Christelike Uitgewers Maatskappy