A Christian man is the most free lord of all and subject to none; a Christian man is the most dutiful servant of all, and subject to every one – Martin Luther.

God: Die Bron van Waarheid

“Without God there is no meaning (truth, rationality, etc.); therefore God exists” (John M. Frame, Apologetics To The Glory Of God)

Baie jare gelede het ‘n man gevra: Wat is die waarheid? (Johannes 18:38). Hierdie man was natuurlik Pilatus tydens Jesus se verhoor.

Dit is ‘n vraag wat elkeen van ons moet vra. Die groot probleem is dat elkeen van ons dink dat ons die waarheid het. Mense wat glo aan die absolute waarheid voel dikwels so en beskerm  hulle posisie aggressief – hulle is absoluut seker dat hulle standpunt die waarheid is.

Dan is daar mense wat glo dat daar nie so iets soos die absolute waarheid is nie – en hulle is ook absoluut oortuig daarvan dat hulle reg is. Hoe nou gemaak? Wie is reg? Wie se “waarheid” is waar? Hoe hanteer ons dit?

Om die vrae te kan beantwoord, moet ons na die definisie van waarheid gaan kyk. Daar moet ‘n standaard wees anders kan ons nooit die aansprake op die waarheid meet nie. Elke mens kan tog nie sy eie standaard bepaal nie. Dan is die waarheid relatief sonder ‘n absolute standaard. Wat vir die een man die waarheid is, sal dan vir die ander een ‘n leuen wees.

Maar wat is hierdie standaard? Dit moet absoluut wees, want as die waarheid gedurig verander is daar in werklikheid geen waarheid nie – die doelpale is gedurig besig om te skuif. David Hume, die groot skeptikus het gesê niemand weet wat die waarheid is nie. Gelukkig weet ons wat die Bron van absolute waarheid is: God

The gospel kingdom is a kingdom of light, life and love. Opposite to light is ignorance and error. Opposite to life is a religion that consists of shows, dead rites, and empty ceremonies. Opposite to love is uncharitableness, malice, and especially hatred of the power of godliness – Thomas Manton

Wat is redding?

Ek skaam my nie oor die evangelie nie, want dit is die krag van God tot redding van elkeen wat glo, in die eerste plek die Jood, maar ook die nie-Jood (Romeine 1:16).

Hiervolgens is redding die finale oorwinning van die evangelie – dit bring gelowiges  na ewige veiligheid en vreugde in die teenwoordigheid van die heilige en genadige God. Hierdie definisie beklemtoon ‘n paar punte:

• Redding kom as ons die evangelie glo. Almal is kandidate vir redding. Die enigste vereiste is dat ons die goeie nuus van wie Jesus is en wat Hy aan die kruis vir ons gedoen het, glo. Paulus sê die evangelie is ‘n krag van God tot redding van elkeen wat glo. Maar hierdie glo is nie ‘n eenmalige gebeurtenis nie: Deur dié evangelie word julle ook gered as julle vashou aan die boodskap soos ek dit aan julle verkondig het. As julle aan iets anders vashou, het julle tevergeefs tot geloof gekom (1 Korintiërs 15:2). Ons moet vashou aan die evangelie en nie net die evangelie glo nie.
• Redding het gekom … en redding kom nog. Julle is inderdaad uit genade gered, deur geloof (Efesiërs 2:8). Tog lees ons dat ons deur die krag van God veilig bewaar vir die saligheid wat reeds gereed is om aan die einde van die tyd geopenbaar te word (1 Petrus 1:5). Paulus stel dit so: Want Hy (die Heilige Gees) het julle as die eiendom van God beseël met die oog op die verlossingsdag (Efesiërs 4:30). Ons is beseël vir redding, maar die dag van vervulling kom nog.
• Redding is veiligheid en vreugde voor ‘n heilige God. Ons is gered, maar van wat? In die Nuwe Testament lees ons van ‘n paar dinge waaraan ons gebonde is: bose magte, die korrupsie van ons liggame, sonde, ens. Aangesien ons nou vrygespreek is op grond van sy versoeningsdood, staan dit soveel vaster dat ons deur Hom ook van die straf van God gered sal word (Romeine 5:9). Die evangelie gee aan ons veiligheid van God se straf. Dit stel ons vry om die wonder van ‘n reddende God met vreugde te geniet – vir ewig.

Hierdie is John Piper se siening in een van sy preke. Ek dink dit maak die baie duidelik.

The ultimate measure of a man is not where he stands in moments of comfort and convenience, but where he stands at times of challenge and controversy.”  –  Martin Luther King Jr.

Is goeie werke belangrik?

Scot McKnight (The Sermon on the Mount – 2013) sê dat ons finale bestemming deur ons werke bepaal word. Ons word deur geloof gered, maar op ons werke geoordeel. Baie mense glo dat as hulle gebid en Jesus in hulle harte ingenooi het, is hulle gered … veilig. Hulle vertroue is op ‘n eenmalige besluit, maar daarna toon hulle geen tekens van dissipelskap nie. Die basis van ons Christelike geloof is: Ek word deur Jesus Christus gered om sy dissipel te wees.

Mense vra dikwels twee vrae oor werke:

• Watter soort goeie werke moet ek doen? Onmiddellik dink ek aan “groot” dinge soos wonders doen, preek of selfs demone uitdryf. Dit is nie wat Jesus sê nie. Hy vra: Het jy vandag barmhartigheid aan ‘n behoeftige bewys? Het jy vandag na iemand op die rant van die samelewing uitgereik of het ek opgetree soos die ryk man teenoor Lasarus wat by sy deur gelê het? By hierdie vrae kan ek nog baie byvoeg. Die basiese vrug van die Nuwe Testament is liefde – liefde vir God en liefde vir my naaste. Die basiese vraag is: Wat het ek vandag vir ander mense gedoen?
• Hoeveel van hierdie goeie werke moet ek doen? Sodra ons kwantitatief hierna kyk, slaan ons die bal mis. Dit gaan nie oor hoeveel nie, maar oor wat.

Werke kan natuurlik nagemaak word. Daarom is werke nie voldoende nie – stem my gedrag ooreen met dit wat van Jesus se volgelinge verwag word? Ek moet ook onthou dat die doen van eenvoudige dinge meer werd is as buitengewone gawes. Wat vir Jesus Christus belangrik is, is liefde, deernis en barmhartigheid.

Ek moet die evangelie hoor en aanvaar, maar dan moet ek doen. Hoor sonder doen is nutteloos.

Those who teach by their doctrine must teach by their life, or else they pull down with one hand what they build up with the other. —Matthew Henry

Lance Armstrong

Wat ‘n tragiese verhaal. Hier is iemand wat teruggeveg het na hy vir testikulêre kanker behandel is – ‘n verhaal wat baie mense aangegryp het.

Die opkoms en val van Armstrong moet ons daaraan herinner hoe maklik dit is om toe te laat dat sonde jou hele lewe vernietig. Ed Stetzer wys daarop dat die patroon in hierdie geval niks nuut  is nie:

• Ons interne begeertes is die basis vir ons eksterne sonde.

Maar ‘n mens word verlei deur sy eie begeertes wat hom aanlok en saamsleep (Jakobus 1:14). Die begeerte om te slaag, om te wen, om die beste te wees, kan hom op baie maniere voordoen. Die begeerte om te slaag is nie verkeerd nie, maar as dit die fokus van ons lewens word, mag dit lei tot gedrag wat God nie eer nie.

• Om ons selfsugtige begeertes te vervul, gebruik ons dikwels kortpaaie

Armstrong is nie die eerste atleet om verbode middels te gebruik nie. Veral in fietsry is dit ‘n groot probleem. Vir baie is hierdie kortpad na die toppunt van prestasie net te aanloklik om te vermy. As die begeerte om uit te blink dié prioriteit in ons lewens word, word kortpaaie die norm – reëls en wette word geïgnoreer. Dikwels word die opwinding om die geheim te verberg selfs belangriker as die doel self.

• Omdat ons bang is ons geheim word geopenbaar, grawe ons dikwels ‘n dieper gat

Koning Dawid is ‘n goeie voorbeeld. Hy gaan tot die uiterste om sy geheim ‘n geheim te hou. Batseba se man is weg op militêre diens; sy en Dawid begin ‘n verhouding en sy word swanger. Dawid kom nou met ‘n ingewikkelde plan na vore om sy betrokkenheid by Batseba geheim te hou. Hy reël selfs dat haar man doodgemaak word. Armstrong doen ook alles in sy vermoë om sy geheim te behou. Doen ons dit nie ook nie?

• Die geheim kom altyd uit – of nou of in die ewigheid

In Dawid se geval is dit die profeet Natan wat in die troonsaal verskyn en die koning se geheim openbaar maak. In Armstrong se geval is dit veral sy spanmaats en die U. S. Anti-Doping Agency. Op een of ander stadium word ons sondes geopenbaar – of in hierdie lewe of by die finale oordeel.

As ons nou die Lance Armstrong-debakel sien ontvou, moet ons dink aan ons eie lewens – die gevaar van sonde, maar ook die vergifnis deur Jesus Christus. ‘n Onbekende prediker het jare gelede gesê: “Sin will take you further than you want to go, keep you longer than you want to stay and cost you more than you want to pay.”