Who can take away great suffering without entering it? In our own woundedness, we can become a source of life for others – Henri J.M. Nouwen (The Wounded Healer)

Cliches om te vermy

[Cliche = Afgesaagde, holruggeryde uitdrukking – HAT]

Christian Piatt noem ‘n paar clichés wat Christene moet probeer vermy. Hierdie uitdrukkings mag iets vir ons beteken, maar nie-Christene hou nie hiervan nie.

• Alles gebeur vir ‘n rede. Om te glo is … om oortuig te wees van die dinge wat ons nie sien nie (Hebreërs 11:1). As ons geloof empiries kon bewys, sou dit nie geloof gewees het nie – dit sou ‘n teorie gewees het. Dink net hoe klink dit vir iemand wat verkrag is. Wil jy regtig vir hulle sê daar is ‘n rede daarvoor? Luister. Wees stil. Sit langs hulle. Dit is beter as so ‘n sinnelose uitdrukking.
• As jy vandag sou doodgaan, weet jy waar jy die res van die ewigheid gaan deurbring? Dit lyk so al of ons binnekennis het – kennis wat ander nie het nie.
• Hy/sy is in ‘n beter plek. Dit mag waar wees, maar hoe weet ons? Doen ons werklik iets aan die rou van diegene wat agterbly met so ‘n uitdrukking?
• Kan ek so ‘n bietjie van my geloof met jou deel? Dit vra ons voor ons hulle eers ken. Luister eers na hulle storie. Mense sien dit as opportunisme.
• Kom Sondag saam met my kerk toe. Natuurlik is dit ‘n goeie ding om mense uit te nooi om saam met ons kerk toe te gaan, maar dit doen ons nie pas nadat ons hulle ontmoet het nie. Bou eers ‘n verhouding met hulle op. Jy moet die reg om uit te nooi, verdien.
• Het jy al Jesus in jou hart genooi? Wat beteken dit? Hoekom jou hart en nie jou lewe nie? Dit laat geloof na ‘n suiwer emosionele ondervinding klink.
• Aanvaar jy Jesus as jou persoonlike Here en Verlosser?
• Dit kan die einde van die tye wees.
• Sal alle besoekers asseblief opstaan? Fokus die aandag op hulle – dit is die laaste ding wat hulle wil hê. Nee, stap na hulle, stel jouself bekend en leer hulle name.

Met party hiervan stem ek saam; party lyk my na hareklowery. Wat wel belangrik is, is dat ons baie versigtig met ons taalgebruik moet wees

Be careful when you give advice–somebody might take it.” Anoniem.

Konteks

Keith Whitfield het ‘n interessante artikel oor konteks geskryf.

 In 1 Korintiërs 9:20 – 22 spel Paulus sy benadering teenoor mense en kulture uit: Vir die Jode het ek soos ‘n Jood geword om Jode te wen. Hy doen dit sodat hy die evangelie sonder belemmering kan verkondig.

Kontekstualisering beteken dat ons die evangelie aanpas by die uitdrukkings van ‘n ander kultuur – die evangelie moet nie as vreemd vir ‘n kultuur beskou word nie. In die proses mag die inhoud van die evangelie nie verander word nie.

Ons kry dit veral by mense wat oor kultuurgrense werk (byvoorbeeld sendelinge). Maar soos samelewings verander, word dit ook nodig vir mense wat dieselfde kultuurkonteks deel. Almal wat die evangelie wil verkondig, kom voor hindernisse in kommunikasie te staan – taal, kultuur of beide.  ‘n Kultuurgroep is mense met dieselfde taal en sosiale identiteit. Hierdie identiteit word gevorm deur wat dit beteken om mens te wees, wat is verkeerd met die wêreld, moontlik oplossings, ens. ‘n Kultuur se wêreldbeeld beïnvloed logika, vooroordele en dikteer watter oplossings lewensvatbaar is. Die taak van kontekstualisering is om dit wat goed en mooi en reg in ‘n kultuur is te gebruik om hindernisse vir die verstaan van die evangelie uit die weg te ruim.

In Handelinge is daar heelwat voorbeelde van Paulus wat die evangelie in ‘n spesifieke konteks plaas. Hy kommunikeer die evangelie in ‘n sinagoge deur te verwys na die geskiedenis van Israel en Johannes die Doper (Handelinge 13:23 – 24). In Ikonium praat hy met nie-Jode en verwys na die algemene openbaring van God (Handelinge 14:16 – 17). In Handelinge 17 praat hy met heidense filosowe en vra hulle om hulle teenkanting teen die evangelie te heroorweeg.

In al hierdie gevalle wyk Paulus nie af van die inhoud van die evangelie nie, maar in elke geval evalueer hy die plaaslike kultuur en beklemtoon verskillende Christelike leerstellings. Dit stem ooreen met die oproep dat Christene die lig vir die wêreld moet wees. Om dit te wees, moet ons boodskap verstaanbaar wees.

The shop, the barn, the scullery, and the smithy become temples when men and women do all to the glory of God! —C.H. Spurgeon

Bonhoeffer (30)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Voorbidding is ‘n daaglikse diens wat Christene aan God en ander verskuldig is. Diegene wat voorbidding vir hulle bure nalaat, ontneem hulle van ‘n diens wat Christene geroep is om uit te voer.

Voorbidding is nie iets vaag en algemeen nie, maar iets baie konkreet. Dit gaan oor spesifieke persone met spesifieke probleme en daarom spesifieke versoeke. Hoe meer konkreet my voorbidding, hoe kragtiger is dit.

Voorbidding is ‘n gawe van God se genade vir elke geloofsgemeenskap en vir elke Christen. God maak hier ‘n groot aanbod, en ons moet dit in dankbaarheid aanvaar. Die tyd wat ons in voorbidding vir ander spandeer, sal ‘n daaglikse bron van vreugde vir God en die gemeenskap wees.

Bonhoeffer gee weer twee Bybelgedeeltes om ons te help:

• Ook sal ek nie teen die Here sondig deur op te hou om vir julle te bid nie (1 Samuel 12:23).
• Maar laat almal wat by U skuil, bly wees, laat hulle altyd jubel. U beskerm dié wat u Naam liefhet, en hulle juig oor U (Psalm 5:12).

In baie Christene en geloofsgemeenskappe is daar duidelik ‘n gebrek aan blydskap. Is dit dalk die gevolg van ‘n gebrek aan spesifieke, konkrete voorbidding?

Here, dankie vir die blydskap om mense in u teenwoordigheid te bring vandag en elke ander dag. Amen.

Our pleasure and our duty, though opposite before,

Since we have seen His beauty, are joined apart no more.
To see the Law by Christ fulfilled, to hear His pardoning voice,
Transforms a Slave into a Child, and Duty into Choice.

John Newton, die outeur van Amazing Grace.

Teologie van die kruis

Ons kultuur het ‘n afkeur aan lyding. Tullian Tchividjian het onlangs in Christianity Today hieroor geskryf.  

Om pyn te vermy is een ding, maar die totale onverdraagsaamheid of ontkenning van pyn is iets anders. Terugslae is vir ons onaanvaarbaar, want ons is behep met persoonlike beheer.

Al waarin die moderne mens belangstel, is vooruitgang, vooruitgang, vooruitgang. In baie kerke word ‘n Christelike geloof verkondig wat sê dat geloof lei tot persoonlike verbetering op alle gebiede. Daarom hoor ons dikwels die stelling dat lyding die gevolg is van ‘n gebrek aan geloof. In evangelisasie hoor ons dan: “Aanvaar Jesus Christus as jou Verlosser en al jou drome sal waar word.”

Lees ons egter die Nuwe Testament sien ons dat gelowiges sal swaarkry en ly. Om lyding met ‘n gebrek aan geloof te verbind kry ons in die Bybel … en dit word ten sterkste verdoem. Wat wel bevestig word, is dat God deur ons swaarkry werk.

‘n Teologie van die kruis verstaan dat die kruis ‘n stelling is van God se betrokkenheid by hierdie wêreld. Hierdie teologie aanvaar dit wat moeilik is. Luther sê dat God in lyding weggesteek is, en dat Hy aan die werk is in ons angs en twyfel. As jy nie meer hoop in jouself het nie, draai jy na Hom vir genade.