All happenings, great and small, are parables whereby God speaks. The art of life is to get the message – Malcolm Muggeridge

Lewe Versigtig

Wees baie versigtig hoe julle lewe (Efesiërs 5:15).

Paulus gebruik drie kontraste om dit vir sy lesers duidelik te maak wat hy hiermee bedoel:

• Nie soos onverstandige mense nie, maar soos verstandiges;
• Moet daarom nie onverstandig optree nie, maar probeer te wete kom wat die Here wil dat julle moet doen; en
• Moet julle nie aan drank te buite gaan nie … laat die Gees julle vervul.

In 5:19 – 21 gee Paulus drie gevolge van met die Gees vervul te wees: aanbidding, dankbaarheid en wedersydse onderdanigheid. Hierdie is die onderskeidende kenmerke van God se kinders.

Omdat wedersydse onderdanigheid vir die mense van daardie tyd (en ook vir ons) ‘n moeilike begrip was, gaan Paulus voort en pas dit op die Christelike huishouding toe:

• Man en vrou moet uit eerbied vir Christus aan mekaar onderdanig wees (5:21).
• Kinders moet hulle ouers gehoorsaam, maar vaders moet hulle kinders so behandel dat hulle nie opstandig word nie (6:1 – 4)
• Slawe moet aan hulle eienaars gehoorsaam wees, en eienaars moet hulle slawe goed behandel – Dink daaraan dat die Here in die hemel hulle Here en ook julle Here is, en hy trek niemand voor nie (6:5 – 9).

Is ons altyd versigtig hoe ons lewe? Luister na Paulus se raad en volg dit.

The doctrines of grace humble man without degrading him and exalt him without inflating him. —Charles Hodge

Bonhoeffer (25)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

[As Bonhoeffer van gemeenskap praat, bedoel hy enige byeenkoms van gelowiges, insluitend die gesin.]

Ons eerste plig aan ander in die gemeenskap is om na hulle te luister.

Net soos ons liefde vir God begin as ons na sy Woord luister, begin ons liefde vir ander Christene as ons leer om na hulle te luister. Ons doen God se werk vir ons broers en susters as ons leer om na hulle te luister. So dikwels dink Christene, veral predikers,  dat die enigste diens wat hulle kan doen, is om iets aan te bied. Hulle vergeet dat luister ‘n groter diens as praat kan wees. Baie mense soek ‘n simpatieke oor, maar kry dit nie by Christene nie, want Christene praat selfs as hulle moet luister. Maar Christene wat nie na mekaar kan luister nie, sal binnekort ook nie na God kan luister nie. Hulle sal aanhou praat … selfs in God se teenwoordigheid.

Bonhoeffer gee weer twee Bybelgedeeltes om ons te help:

• Luister goed na my woorde, neem ter harte wat ek te sê het (Job 13:17).
• Maar my volk het nie na my geluister nie, Israel wou niks met My te doen hê nie. Daarom het Ek hulle laat begaan in hulle koppigheid en hulle het hulle eie sin en wil gevolg. Ag, as my volk maar na My wou luister, as Israel maar my wil wou doen (Psalm 81:12 – 14).

Bonhoeffer maak hier ‘n belangrike stelling: die begin van my liefde vir ander Christene is as ek leer om na hulle te luister. Hoekom vind so baie mense dit so moeilik om te luister?

Here, gee aan my die genade om na U te luister en van U te leer; mag ek ook die genade ontvang om na ander te luister en van hulle te leer. Amen.

“To have a right to do a thing is not at all the same as to be right in doing it.” –  G. K. Chesterton

Bonhoeffer (24)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Mense wat nie alleen kan wees nie, moet oppas vir gemeenskappe. Hulle doen skade aan hulleself en aan die gemeenskap. Jy het alleen voor God gestaan toe Hy jou geroep het; jy staan alleen as jy sy stem moet gehoorsaam; alleen moet jy jou kruis opneem en bid; alleen sal jy rekenskap aan God moet gee. Jy kan dit nie vermy nie – God het jou uitgesoek.

Maar die omgekeerde is ook waar. Jy word geroep om deel van die geloofsgemeenskap te wees. Jy dra jou kruis en jy bid in hierdie geloofsgemeenskap. Jy is nie alleen as jy die dag doodgaan nie. Op die oordeelsdag is jy een lid van die groot geloofsgemeenskap.

Bonhoeffer gee weer twee Bybelgedeeltes om ons te help:

• Ons het baie lede in een liggaam, en die lede het nie almal dieselfde funksie nie. Net so is ons, al is ons baie, in Christus een liggaam en almal afsonderlik lede van mekaar (Romeine 12:4 – 5).
• Met my hele hart  wil ek die Here loof in die samekoms van die opregtes, in die gemeente. Die werke van die Here is groot, almal wat daarin vreugde vind dink daaroor na (Psalm 11:1 – 2)

Mense is vandag bang om alleen te wees. Baie gemeentes is ‘n versameling van individue en nie ‘n geloofsgemeenskap nie. Hoekom? Ons moet bid dat diegene wat alleen is die ware geloofsgemeenskap sal ontdek.

Here, as ek te alleen is, help my om deel van die geloofsgemeenskap te word. As ek te afhanklik van die gemeenskap is, help my om tyd opsy te sit sodat ek alleen kan wees. Amen.

I do believe, I really do believe, that we can be better than we are, but the price is enormous, and few of us are ready yet – James Baldwin

Kinderopvoeding

Susannah Wesley het 19 kinders gehad – tien sterf voor die ouderdom van twee jaar. Twee van dié wat oorleef het, het God gebruik om ‘n nasie wakker te skud. John en Charles Wesley het die evangelie verkondig, liedere geskryf en ‘n nuwe geloof  gevestig (die Metodisme) wat oor die Westerse wêreld versprei het.

 Luister wat sê Susannah Wesley van kinders grootmaak:

• Moenie toelaat dat hulle tussen etes eet nie.
• Leer elke kind bid sodra hy kan praat.
• Alle kinders moet doodstil wees tydens huisgodsdiens.
• Moenie vir ‘n kind iets gee waarvoor hy huil nie – gee slegs vir hom dit waarvoor hy beleefd vra.
• Om te verhoed dat hulle leuens vertel, moenie ‘n fout straf wat bely is en waarvoor hulle berou het nie.
• Moet nooit toelaat dat sondige optrede ongestraf bly nie.
• Moet nooit ‘n kind twee maal straf vir dieselfde oortreding nie.
• Beloon goeie gedrag.
• Prys enige poging om tevrede te stel – al word dit swak uitgevoer.
• Kom alle beloftes streng na.
• Moenie van ‘n dogter verwag om te werk voordat sy goed kan lees nie.
• Leer kinders om bang te wees vir die rottang.

Susannah het nie geleerdheid of titels gehad nie. Ons moet altyd onthou dat die belangrikste mense die kortste titels het: ma, pa, seun, dogter! Kort na sy bekering skryf Charles Wesley:

Amazing love, how can it be

That Thou my God would die for me!