Laat sy Liefde jou Lei: Hang skoon wasgoed in jou hart – Milanie Vosloo

Hang skoon wasgoed in jou hart!

Bo alles, wees versigtig met wat in jou hart aangaan. Wat jy dink, bepaal alles wat jy doen. Moenie lelike dinge sê nie. Spreuke 4:23 – 24a

Ons steek dikwels dit wat regtig in ons harte is, met vroom woorde weg. So bluf ons mekaar soms met mooi woorde terwyl ons eintlik iets totaal anders dink. En dan, op ‘n dag, stort ons daardie gedagtes in woorde teenoor iemand uit … wat groot en onnodige skade berokken. Die feit is dat ons nie vir baie lank vuil wasgoed van ons hart kan wegsteek nie. Een of ander tyd word ons ware kleure hoor- en sigbaar.

Salomo het geweet waarvan hy praat toe hy gesê het dat dit wat in ons hart gebeur, die allerbelangrikste basis van wysheid is. Dit is immers dié deel van ons menswees waaruit ons hele lewe vloei. En daar is maar een manier om te sorg dat ons harte suiwer is: ons moet dit elke dag onvoorwaardelik in die hande van die Gees van God plaas. Net Hy kan die vuil wasgoed in ons harte agter die wegsteekplekke uithaal, dit suiwer en dit netjies terug pak in die kas. Net Hy kan die ongenaakbare vlekke wat ons lewens so vervuil, uitwas en in die plek daarvan sy geur van liefde sit.

Bid dat die Gees jou ryklik met sy skoonheid sal vul sodat jy ánders oor mense sal dink, die beste van hulle sal glo en kraakvars suiwer in jou liefde sal wees.

 Skrywer: Milanie Vosloo

Laat sy Liefde jou Lei: Jy kan ‘n kragtige geesgenoot wees – Milanie Vosloo

Jy kán ‘n kragtige geesgenoot wees

Lei ‘n toegewyde lewe met geloof, liefde, volharding en deernis. Stry die goeie stryd van dit waarin ons glo. Hou stewig vas aan die ewige lewe wat God jou gegee het, en wat jy so opreg bely het voor baie getuies.1 Timoteus 6:11b-12

Paulus was vir baie mense ‘n ware geesgenoot. ‘n Rol wat hy met groot passie en verantwoordelikheid vertolk het. Jy kan gerus weer die twee briewe wat hy aan sy getroue vriend, Timoteus, geskryf het, gaan lees. Die vraag wat ons as medegelowiges in hierdie moderne eeu kan vra, is: Hoe kan ék ‘n ware geesgenoot wees vir die ander lede van geestelike familie? 

• Ons kan dit doen deur ons self elke dag met nuwe toewyding aan ons Vader toe te wy. Wanneer dit ons opregte begeerte is om sy liefde te leef en sy wil te doen, sal ons harte ingestel wees op die mense om ons en sal ons met liefde en deernis teenoor hulle optree.
• Ons kan elke oggend bid dat die Gees ons leeg sal maak van ons eie selfsug en eer en ons sal vul met sý soort begrip en deernis vir ander mense. Wanneer die Gees ons lewens beheer sál ons in geesgenote vir ander wees omdat liefde, vreugde, vrede, geduld, getrouheid, vriendelikheid, goedheid, sagmoedigheid en selfbeheersing deel van ons lewens is.

Wie weet of die Vader nie dalk vandag jóú geloof en jóú geesvervulde menswees in die lewe van ander wil gebruik nie?

Heilige Gees, mag my geloof vrugte dra wat by my bekering pas.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

Milanie Vosloo

Laat sy Liefde jou Lei: soms is die wind uit jou seile – Milanie Vosloo

Soms is die wind uit jou seile!

Hy het op sy knieё neergesak en hard uitgeroep: “Here, moenie hierdie sonde teen hulle hou nie!” Handelinge 7:60a

Het jy al gevoel asof iemand die wind uit jou seile neem?

Jy het nog ewe rustig op die see van die lewe gevaar, toe jy uit die bloute deur ‘n rukwind van aanvalle onkant gevang word en jy heeltemal van koers af gedwing word. Dis dan wanneer jy sprakeloos wonder hoe dit moontlik is dat mense mekaar so verkeerd kan hanteer. Meer as dit maak sulke ongevraagde optredes nogal vrek seer. Dis asof dit sommer sulke repe uit jou hart skeur.

Die vraag is dan: Wat nou? Kap jy terug, val jy aan, retireer jy of hanteer jy dit in stilswye. ‘n Klinklare antwoord is daar nie, want elke situasie en mens is immers uniek. Wat wél belangrik is om die Gees te vra om onmiddellik goddelike beheer oor die situasie te neem. Bid dat Hy aan jou die selfbeheersing sal gee om vir ‘n oomblik terug te staan, werklik te luister en te probéér verstaan. Vra dat Hy jou sal help om as’t ware in daardie mens se skoene te klim en met begrip na sy/haar situasie te kyk. Bid dan veral dat jy die wysheid sal hê om te weet hoe jy moet reageer.

Dis nooit maklik om moeilike mense en situasies te hanteer nie. Deur die Gees is dit egter wel moontlik om ook dán die liefde te laat seёvier.

Bly vandag in beheer van my emosies sodat ek sal wéét wat om te doen, Vader.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

Milanie Vosloo

Laat sy Liefde jou Lei: Ons is deel van mekaar – Milanie Vosloo

Ons is déél van mekaar!

Eerstens spoor ek jou aan om vir alle mense te bid. Terwyl jy jou versoeke rig, smeek God se onverdiende goedheid daaroor af en dank Hom. 1 Timoteus 2:1

Ons is nie gemaak om van vergeet te word nie. Ons wil almal op ‘n manier deur mense raakgesien, raakgehoor en raak-liefgehê word. Juis daarom is dit ons liewe Vader se wil dat ons van geboorte af tuis sal voel by ons eie “behoort-aan-iemand-kring”: by ouers wat ons koester, familie wat ons met liefde toevou en mense wat hand aan hand saam met ons loop. Klein-klein begin ons al die waarde van maats besef en soos ons ouer word, is dit vriendinne, ‘n lewensmaat, kollegas en ander kosbare hartsmense wat tot ons lewensvreugde bydra.

Wanneer ons Skepper ons nou régtig bederf, gee Hy aan ons ook wonderlike sielsgenote: Mense wat ons diepste wese verstaan en ons, ondanks alles, onvoorwaardelik aanvaar en liefhet. Dan natuurlik weet die Vader ook dat ons ander geesgenoot-engele nodig het om saam met ons deel te neem aan die wedloop van geloof. Van die vroegste tye van die kerk se geskiedenis was dit juis die verbintenis tussen opregte geloofsgenote wat ‘n verskil aan hul eie en anders se lewens gemaak het. Ook jy het opregte geloofsmaats bitter nodig. En ook jy kan ander geloofsvriende met jou ondersteuning, liefde, begrip, aanmoediging en gebede verryk.

Bid elke dag dat jou liefde ander in die binnekring van God se genade sal ontvang!

Dankie vir die onbreekbare band waarmee u bloed ons as gelowiges aan mekaar bind, Vader.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Milanie Vosloo