Category: Bybelstudie: JESUS PREEK - www.bybelkennis.co.za

JESUS PREEK – DIE BERGPREDIKASIE (2) – Jan van der Watt

Deel 2 – Jesus preek verder oor wat van sy mense verwag word

3. Ware godsdiens (en beloning – dit is nie wat Christenskap jou kos nie, maar die loon wat jy kry)

3.1 In hoofstuk 6 verander die tema van die Bergpredikasie. Die eerste sin (6:1) gee al ‘n aanduiding van waaroor dit gaan: “Moenie julle godsdienstige pligte in die openbaar nakom om deur mense gesien te word nie, want dan kry julle geen beloning van julle Vader wat in die hemel is nie”

Wat sou jy uit bogenoemde opmerking oor wat godsdiens presies is, aflei?……………………..

……………………………………………………………………………………………………………………………….

Godsdiens is duidelik iets tussen jou en God en nie om mense te beïndruk of om eie eer te soek nie.

3.2 Gebed… om met jou pa te praat (6:5-15)

Lees 6:5-15 en gee in jou eie woorde weer wat goeie opregte gebed beteken…………………

………………………………………………………………………………………………..

Hier word die klem weer op die verhouding tussen mens en God in plaas van eie eer geplaas.

Die ‘Ons Vader’ gebed is ’n gebed van ‘n kind aan sy/haar vader – daarom word dit aan die ‘Vader’ gerig. Vaders in daardie tyd het 3 belangrike funksies gehad: om die gesin na buite (in die publiek) te verteenwoordig, om die gesin te versorg en om die gesin te beskerm teen gevaar. Vir die drie dinge word daar in die Ons Vader gebid. Eers word daar gevra dat die publieke beeld van die Vader uitgebrei en sterker gemaak word (Laat….u Naam, u Koninkryk, u wil…). Dan word gevra vir brood, maar met die erkenning dat die Vader vir die brood sorg. Dan word daar gevra vir beskerming – bewaar ons van die bose en as ons foute gemaak het, moenie dit teen ons hou nie. Vergewe ons, want ons wil goeie kinders wees en bly. So is die gebed ‘n gebed van ‘n kind van God wat gelowig sy kindskap teenoor die Vader erken. Die gebed is dus meer as om te vra; dit is ook om te gee, jouself te gee.

3.3 Vas

Die meeste hedendaagse Christene vas nie meer nie. Waarom nie?

Lees Mat 6:16-18 en sê hoe jy dink hierdie verse verstaan moet word……………………………..

………………………………………………………………………………………………………………………………..

Lees dan ook Mat 6:19-21 en sê waar die werklike loon en skatte vir die gelowige gevind moet word……………………………………………………………………………………………….

…………………………………………………………………………………………………………….

3.4 Lojaliteit: Beginsel van die onmoontlikheid om twee here te dien

Lees Mat 6:24 en sê wat jy daaruit aflei vir die gelowige se alledaagse lewe?…………………..

………………………………………………………………………………………………………………………………..

3.5 Fokus in die lewe

Een van die wonderlikste dele in die Bybel kry ons in Mat 6:25-34. Belangrike mense soos Franciskus van Assisi is byvoorbeeld deur hierdie gedeelte beïnvloed, juis omdat dit die gedeelte God se sorg en ons absolute afhanklikheid daarvan so sterk beklemtoon.

Lees 6:25-34 en sê vir jouself wat dit beteken vir jou eie geloofslewe………………………………

………………………………………………………………………………………………………………………………..

4. Loop die reguit pad

In hoofstuk 7 verander die aanslag van Matteus weer. Hy verduidelik wat te midde van die lewe gevra word. Moenie op ander se foute konsentreer nie (7:1-6), maar vra liewer God om jou te help en te gee wat jy nodig het (7:7-12). Bly op die regte pad en oppas vir valse profete wat jou van die pad af wil kry (7:13-20). ‘n Mens sal immers aan jou vrugte geken word wat jou dade in ooreenstemming met die wil van God is. Wie wil oorleef, moet sy lewe op hierdie boodskap van Jesus bou.

Gaan deur hoofstuk 7 en kyk of jy alles wat in die boonste paragraaf gesê word, kan kry……….

……………………………………………………………………………………………………………………………

As jy 7:1-6 lees, dink jy jy mag vir ander sê waar hulle foute maak?Moet ‘‘n mens maar altyd stilbly? Motiveer jou opinie…………………………………………………………………………….

……………………………………………………………………………………………………………………………

Beteken 7:7-12 dat jy altyd alles gaan kry waarvoor jy vra? Motiveer jou antwoord………..

……………………………………………………………………………………………………………………………….

In hoofstuk 7:12 is daar ‘n belangrike opmerking wat eintlik alles opsom: ‘Alles wat julle dan wil hê dat die mense aan julle moet doen, net so moet julle aan hulle ook doen; want dit is die wet en die profete’. Dit staan bekend as die sogenaamde goue reël wat ook in die Jodedom bekend was. Jyself en jou eie belange word die maatstaf vir jou optrede teenoor ander. Die veronderstelling is dat jy jou eie belange so sterk op die hart dra, dat jy altyd die beste vir jouself sal wil hê. Hier word daardie ‘beste vir jouself’ op ander geprojekteer.

Skrywer: Prof Jan van der Watt

JESUS PREEK – DIE BERGPREDIKASIE (1) – Jan van der Watt

Deel 1 – Jesus preek oor die wet

Die Bergpredikasie is ‘n versameling van preke van Jesus. Markus noem dit nie eintlik nie, en in Lukas kom dit verspreid deur die Evangelie voor (6:20-23, 27–28, 32–36;11:2–4; 12:33–34; 14:34–35; 16:18, ens.).

Jesus preek op ‘n berg, daarom word dit die Bergpredikasie genoem. Lukas vertel ons nie van die berg nie, maar sê dat Jesus in die vlaktes gepreek het (Luk 6:17). Waarom? Kyk byvoorbeeld na hoofstuk 5. Daar word daar oor en oor van die Wet gepraat. Jesus kondig, soos Moses van ouds af die Wet van die berg af. Matteus, wat vir die Joodse Christene skryf wil Jesus met die nuwe Moses vergelyk. Soos Moses kondig hy weer die wet af.

1. Die saligsprekinge

In 5:3-12 lees ons hoe God na sy mense kyk en wat Hy dink is belangrik of nie.

Lees 5:3-12 en gee ‘n beskrywing van hoe jy dink dinge in die gemeente van God gebeur of moet gebeur. Hoe moet jy jouself, ander en die wêreld sien?…………………………………………..

……………………………………………………………………………………………………………………………….

Lees ook 5:13-16 – wat sê dit vir jou in die lig van wat jy nou net gelees het? ………………..

………………………………………………………………………………………………………………………………

2. Jesus en die wet

Soos ons weet, het Matteus waarskynlik hoofsaaklik vir Jode wat Christene geword het, geskryf. Vir die Jode het hulle godsdiens om die tempel en die wet gedraai. Deur die wet te gehoorsaam het hulle gevoel dien hulle God, omdat die hou van die wet die voorwaarde was vir hulle nakom van die verbond tussen hulle en God. Jesus het egter ander dinge op die sabbat begin doen wat hulle gedink het verkeerd is. Jesus het nie gevoel dat Hy die wet breek of verwerp nie, maar dat Hy die wet anders interpreteer. Hy hou dus nog die wet, maar op ‘n ander manier. Ons sien iets van die debat in hoofstuk 5.

Lees 5:17-20 en sê wat jy dink Jesus se houding oor die wet was…………………………………….

………………………………………………………………………………………………………………………………..

Jesus bevestig die geldigheid van die wet, maar soos Hy dit kom vervul het. Sy manier van die wet sien, sal lei tot geregtigheid wat groter is as die van die Fariseërs (die Joodse mense van die wet).

Wat dink jy beteken dit wat Jesus hier sê?……………………………………………………………………..

Jesus verduidelik dit in die gedeeltes wat nou volg. Hy gee ses voorbeelde van wat dit beteken om die wet te hou soos Hy dit bedoel het. In elke vergelyk hy die Joodse standpunt met die manier waarop Hy dit sien.

Lees die volgende gedeeltes oor die volgende temas deur en sê in elke geval wat presies die verskil is:

Moord (5:21-26)………………………………………………………………………………………………….
Egbreuk (5:27-30)……………………………………………………………………………………………….
Egskeiding (5:31-32)…………………………………………………………………………………………..
Eedswering (5:33-37)………………………………………………………………………………………….
Vergelding (5:38-42)…………………………………………………………………………………………..
Liefde vir jou vyand (5:43-48)……………………………………………………………………………..

Waarin dink jy lê die essensie hier van die verskil tussen die twee maniere van die wet sien?……………………………………………………………………………………………………………………..

…………………………………………………………………………………………………………………………….

Die verskil in die ses kontraste gaan oor die verskil in hoe ‘n mens na godsdiens en veral na mense kyk. In die geval van die Joodse siening word die vereistes mooi uitgestippel. Die letter van die wet is mooi uiteengesit en as jy die letter van die wet nakom, het die Jode gedink jou godsdiens is op die regte pad en jy is geregverdig.

In elke geval gee Jesus ‘n ander perspektief: moord beteken nie net om iemand fisies dood te steek nie, maar ook om die persoon sielkundig of geestelik seer te maak deur hom allerhande beledigings toe te snou. Wat is die beginsel hier? Wel, Jesus sien mense anders. Hulle is nie net liggame nie, maar het ook binnestes wat kan seerkry. As jy dus na ‘n mens kyk, moet jy nie net ‘n liggaam sien nie, maar jy moet ook die persoon se geestelike (onsigbare) sy sien, sy ‘binneste’. Of jy nou sy liggaam of sy ‘binneste’ seermaak, jy maak die persoon seer en volgens die manier wat Jesus die wet sien, is dit nie toelaatbaar nie.

Neem die voorbeeld van egskeiding. Volgens die Joodse wet was dit redelik maklik om te skei (daar was wel verskille van opinie tussen die verskillende groepe ook; party was strenger as ander) – as jou vrou jou nie behaag het nie, kon jy vir haar ‘n brief gee om vir die leiers van die gemeenskap te wys en dan was dit verby. Jesus ag egter die waarde van die menswees van die vrou hoër. Jy kan haar nie sommer wegstuur nie. Haar menswees moet ook in die huwelik deeglik beskerm word. Die beskerming neem volgens Jesus die vorm aan van die permanensie van die huwelik. Die man moet sy vrou eer en beskerm – dit is sy lewenslange taak.

So sien ons elke keer dat Jesus die mens as volledige mens voorop stel. Jy moet die mens as mens nie skade berokken nie, veral nie as die mens weerloos is nie. Respek en eer vir mekaar is dus een van die basiese vereistes van die wet. Of anders gestel: sien mense raak en nie wette nie.

Kyk of jy bogenoemde beginsel ook by die ander opmerkings oor die wet in Mat 5 kan kry…

…………………………………………………………………………………………………………………………………

Skrywer: Prof Jan van der Watt