Laat sy liefde jou lei: Volg Hom … ook in die mis – Milanie Vosloo

Vra na die wil van God in alles wat jy doen. Hy sal die regte pad vir jou wys. Moenie jouself oorskat nie. Hou eerder die Here voor oё … Spreuke 3:6-7a

Wonder jy ook soms, wanneer jy na ander Christene se verhale luister, waarom jy nie ook so ‘n direkte verbinding met God het soos hulle nie? Ons sou mos almal soms ‘n selfoonoproep van die Vaderhuis wou wees!

As jy soms sukkel om die Here se stem en sy wil vir jou lewe werklik te hoor, sal jy dalk vrede vind in die woorde van John Eldredge – ’n wêreldbekende kerkleier – wanneer hy sê: “Ek hoor hoogstens twintig dae van die jaar God se stem duidelik. Die ander 346 dae is God se wil vir my soos ’n digte mis waardeur ek moet worstel.”

Ons dierbare Here gee nie altyd klinkklare antwoorde en uitgespelde oplossings aan sy kinders nie. Hy gee aan ons wysheid, die Woord, die sagte influistering van die Heilige Gees en ons eie gesonde insig en oordeel. Wanneer ons egter in eerbied en ontsag sáám met God wandel, sál Hy vir ons op sy manier wél die regte pad wys. Op hierdie pad sal jy instinktief weet waar Hy is en Hom dan blindelings te volg.

Om God te volg is soms soos om in die mis te loop. Jy hou eenvoudig sy hand vas en loop tree vir tree agter Hom aan … selfs al kan jy nie die toekoms sien nie.

Here, ek volg U … onverpoos.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

  Skrywer: Milanie Vosloo

JESUS WORD GEKRUISIG EN BEGRAWE (1) – Jan van der Watt

Die kruis van Jesus vorm saam met die opstanding die kern waarrondom die identiteit van Jesus en die Christendom oor die eeue gebou is. Dit het oor die jare heen ook die vis (wat oorspronklik die belangrikste teken van die Christene was) as hoofteken vir die Christendom vervang. Dit is eintlik ‘n onwaarskynlike verloop van gebeure, aangesien ‘n koning of Messias wat aan ‘n kruis dood is (‘n skandelike dood) nie vir die destydse mense na die ideale messias sou klink nie.

In hierdie Bybelstudie gaan ons kyk a) na die verloop van die kruisgebeure en b) na die manier waarop die kruis geïnterpreteer is.

deel 1 – Hoe verloop die kruisgebeure?

Jesus se kruisiging word min of meer op dieselfde manier deur die verskillende evangeliste beskryf. Die verskille wat ‘n mens tussen die verskillende beskrywings kry, hang saam met die besondere klem wat elke skrywer wou lê (ons noem dit die redaksie van elke skrywer). Kom ons kyk na die verloop:

Lees nou eers Markus 14-15 waar die verhaal vir ons vertel word.

• Die gebeure voor die gevangeneming
  • Daar word planne gemaak om Jesus te vang deur van ‘n verraaier gebruik te maak
  • Jesus eet vir oulaas met sy dissipels saam en stel die nagmaal in.
  • Jesus gaan saam met sy dissipels na die tuin van Getsemane – daar bid Hy intens tot sy Vader

• Jesus word gevang en verhoor
  • Jesus word in Getsemane gevang nadat Judas Hom verraai het
  • Jesus word deur twee “howe” verhoor:
    • Die Joodse Raad
      • Hulle soek redes om Jesus dood te maak en gebruik tot vals getuies
      • Petrus verloën Jesus
    • Jesus voor die Romeinse heerser, Pontius Pilatus
      • Pilatus verhoor Hom op aanklag dat Hy laster en Homself koning van die Jode maak
      • (Intussen pleeg Judas selfmoord)
      • Nadat die Jode Barabbas kies, word Jesus oorgelewer om gekruisig te word, al dink Pilatus Hy is onskuldig

• Jesus word gekruisig
  • Die soldate bespot en slaan Jesus voordat Hy sy kruis na Golgota moes dra
  • Jesus word gekruisig
  • Jesus sterf en die Romeinse soldaat wat daar gestaan het besef dat Jesus regtig die Seun van God is
  • Daar vind wonders plaas (bv. donkerte en aardbewings)

• Jesus word begrawe
  • Jesus word deur Josef van Arimatea van die kruis afgehaal en begrawe
  • Romeinse soldate bewaak die graf

Op die oog af verloop die gevangeneming van Jesus volgens die prosedure wat destyds bekend was as iemand gevang word. Tog het die evangeliste nie net die feite weergegee nie, maar die verhaal gebruik om te “preek” ook. As jy tyd het vergelyk nou Markus 14-15 met Johannes 18-19 en kyk watter verskille jy kan raaksien…………………………………………………………………………………………..

………………………………………………………………………………………………………………………………………….

………………………………………………………………………………………………………………………………………….

Volgende keer kyk ons na ‘n aantal interessante dinge wat rondom die kruisiging van Jesus gebeur het.

Skrywer: Prof Jan van der Watt

DIE VERHAAL VAN JESUS DEUR DIE OË VAN MARKUS (11) – Jan van der Watt

Episode 9: Markus 14-16

Die kruis wat voorspel is, word nou ‘n realiteit – omdat dit so bekend is, hoef ons nie te veel daaroor te sê nie.

• Jesus word gesalf midde van planne om Hom te verraai en te vang (14:1-11)
• Die nagmaal (14:12-25)
• Petrus sal Jesus verloën en Jesus word dan ook in Getsemane gevang (14:26-52)
• Jesus verskyn voor die Joodse Raad en Petrus verloën Hom (14:53-72)
• Jesus voor Pilatus en Hy word oorgelewer om gekruisig te word (15:1-15)
• Jesus word bespot en gekruisig (15:16-41)
• Jesus word begrawe (15:42-47)
• Jesus staan op en verskyn aan sy dissipels (16:1-20)

Jesus word gekruisig, maar staan weer op.

Dit is nie presies seker waar die Evangelie van Markus eindig nie. Volgens sommige grondtekste (dit is nou die ou Griekse tekste) eindig die Evangelie by Markus 16:8. Ander het 16:9-20 by. Dit laat mense nou wonder of 16:9-20 nie later bygevoeg is nie.

As die Evangelie by vers 8 eindig, is dit ‘n baie interessante einde, want dit eindig “stomp”: Hulle het vir niemand anders iets daarvan gesê nie, want hulle was bang…Tog is die einde nie so stomp as wat dit lyk nie. Die “bang” is nie ‘n bang vir spoke of vreesagtige bangwees wat jou wil laat weghardloop nie. Dit is “bangwees” omdat jy weet iets groots lê voor, maar jy weet nie wat nie. Dit is om bang te wees met ‘n “bungee jump” – jy weet dit gaan lekker wees, maar jy hart klop in jou keel… van bang antisipasie. So eindig Markus ook. Die dissipels weet nou dat niks weer dieselfde gaan wees of kan wees nie. Jesus het opgestaan… ‘n nuwe toekoms, die nuwe lewe het aangebreek en niemand kan die klok meer terugdraai nie.

Slot

Nou, nadat die Evangelie voluit gelees is, kan daar oor Jesus gepraat word. Hy is die Seun van God wat wonders doen, maar ook die Seun van God wat as losprys vir ons aan die kruis sterf. Sy glorie lê ook in sy opofferende lyding vir ons. Die glorieryke Seun is ook die lydende Seun. As jy dit verstaan, verstaan jy die Evangelie van Markus. 

Skrywer: Prof Jan van der Watt

DIE VERHAAL VAN JESUS DEUR DIE OË VAN MARKUS (10) – Jan van der Watt

Episode 8: Markus 11-13

Jesus betree nou die hartland van die Joodse geloof. Hy gaan na die tempelstad toe, die stad van die Joodse geloof met hulle Joodse leiers.

Die temas verskuif nou, meer na ‘n tipe debat toe oor die godsdiens van die Jode in Jerusalem vs. die godsdiens wat Jesus bring. Die groot temas gaan oor die tempeldiens en reinheid, die godsdienstige gesag waarmee daar opgetree word en hoe gesag in verskillende vorms lyk, hoe die wet verstaan moet word, wat skynheiligheid is en hoe dit hanteer moet word, hoe ware godsdiens lyk. Markus 11-12 moet dus in die lig van die konflik van twee godsdienstige groepe gelees word. Kyk of jy ‘n aanvoeling vir die debat kan kry en dan vir jouself kan sê waar die Christendom van die Jodendom verskil.

• Jesus trek die grootstad Jerusalem triomfantelik in (11:1-11)
  • Daar hang maar doodsheid in die stad (11:12-14)
  • En die tempeldiens moet skoongemaak word (11:15-19)
  • God se krag deur gebed speel nou ‘n rol (11:20-26)
• Gesag op verskillende maniere
  • Wie gee Jesus die gesag? (11:27-32)
  • Wat se gesag het die Joodse leiers? (12:1-12)
  • Hoe lyk dit met die Romeinse gesag (12:13-17)
• ‘n Groot debat:
  • Is daar ‘n opstanding? Die Jode stem nie oor alles saam nie (12:18-27)
  • Nog ‘n groter vraag: Hoe moet die wet verstaan word? (12:28-34)
  • Is Christus familie van Dawid (12:35-37)
• Oppas vir skynheiligheid (12:38-40)
• Ware godsdiens op ‘n ander manier – soos die arm weduwee (12:41-44)

Hoofstuk 13 is ‘n baie spesiale hoofstuk. Dit gaan oor die groot profesie van wat in die laaste tye gaan gebeur – ons noem dit apokaliptiese materiaal. Die klem val veral op die oordeel en die wederkoms. Met Jesus  se koms het die koninkryk van God gekom en bly die finale oordeel nog oor. Dit is aan die kom en gaan nie lekker wees nie.

‘n Groot profesie:

• Rampe, vervolging en groot verdrukking (13:1-23)
• Die Seun van die mens sal kom (13:24-27)
• Tekens van die wederkoms (13:28-31)
• Die uur van die wederkoms (13:32-37)

Jesus het die Joodse manier van God te dien radikaal kom verander en Hy het die gesag om dit te doen. 

Skrywer: Prof  Jan van der Watt