Laat sy Liefde jou Lei: “Geduld o, geduld wat so baie kan dra ..”

Laat sy Liefde jou Lei: “Geduld o, geduld wat so baie kan dra ..” – Milanie Vosloo

“Geduld o, geduld wat so baie kan dra ..”

Maar as die Gees ons lewe beheer, is die gevolg: …geduld … Galasiёrs 5:22 

Geduld is ‘n omvangryke woord. HAT omskryf dit as die vermoë om veel te verdra; om moed te hou; die vermoё om te wag sonder om te kla; om rustig met iets om en voort te gaan; lydsaamheid; verdraagsaamheid en volharding. Sjoe, wat ‘n mondvol! Geen wonder ons sukkel so om hierdie vrug van die Gees  te leef nie. Hoe dikwels kan ons droogmaak-optrede nie toegeskryf word aan die gebrek van geduld nie!

Wanneer jy, soos ek, een van daardie mense is wat met ‘n streep van ongeduld gebore is, is die aanleer van hierdie eienskap slegs moontlik wanneer ons in totale afhanklikheid aan die Gees leef. Net Hy kan van ongeduldige mense wat dinge altyd vinnig gedoen wil hê, wat gou kwaad word en wat ‘n haastige geaardheid het, geduldige mense maak. Net die Gees kan die trots (wat dikwels die oorsaak van ongeduld is) vervang met ‘n nederige en sagte hart waarin ander én die werking van God ruimte het.

Bid vandag saam met my die gebed uit my boek, Woorde wat Leef*:

Here van tyd, leer my geduldig wag op u volryp tydsberekening en groter plan met my lewe, U maak my deurentyd ook gereed vir die oes, volrond en sterk, sodat ek die vol mandjies goedheid ook aan ander kan uitdeel. Leer my die seёn van die woord “wag”, en die genade van die woord “genade”.*

Ja, Here, ek wag op ontvangs van u soort geduld.

 

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

milanie_boeke_advertensie

 

Skrywer: Milanie Vosloo




Laat sy Liefde jou Lei: Die oorsprong van vrede … is liefde

Laat sy Liefde jou Lei: Die oorsprong van vrede … is liefde – Milanie Vosloo

Die oorsprong van vrede … is liefde

Maar as die Gees ons lewe beheer, is die gevolg: …vrede … Galasiёrs 5:22

Toe moeder Teresa haar Nobelprys ontvang het, is daar aan haar gevra: “Wat kan ons doen om wêreldse vrede te bevorder?” Haar antwoord was: “Gaan huis toe en wees lief vir jou gesin. As ons nie vrede het nie, is dit omdat ons vergeet het dat ons aan mekaar behoort.”

Hoe waar is dit nie. Dink maar aan dié kere wanneer jy onvrede in jou hart het. Dis gewoonlik in tye wanneer jy kwaad, wrokkig, omgekrap en te na gekom, voel. Dan is dit mos of die gebrek aan vrede plek maak vir negatiewe en aanvallende gedagtes wat gewoonlik uitloop op woorde en optredes waaroor ons later spyt is. Die oomblik egter wanneer ons toelaat dat die Gees ons onrustige gemoed met sý vrede vul, kom daar rustigheid oor ons wat ons help om begrip vir en deernis met ander te hê. Dan gee Hy sélf aan ons perspektief en insig in ons eie én ander se emosies. Dan staan Hy ons in ons swakheid by en help Hy ons om vrede te maak met ons eie en ander se tekortkominge … en om weer met liefde uit te reik. Die uiteinde daarvan is dikwels twee mense wat mekaar met nuwe oё sien en met ‘n gees van toegeneentheid koester.

Gaan leef vandag met ‘n hart wat gevul is met die ingesteldheid van vrede. Dis áltyd die moeite werd!

Here, ek wil vrede dink, doen en leef. Help my asseblief daarmee.

 

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

milanie_boeke_advertensie

 

Skrywer: Milanie Vosloo




Laat sy Liefde jou Lei: Waar’s ons vreugde heen?

Laat sy Liefde jou Lei: Waar’s ons vreugde heen? – Milanie Vosloo

Waar’s ons vreugde heen?

Maar as die Gees ons lewe beheer, is die gevolg: …vreugde … Galasiёrs 5:22

Soms wonder ek, waar is ons vreugde heen? Het ons toegelaat dat die wêreldse dinge en ons alledaagse bestaansdinge ons so besig hou dat ons nalaat om ons siele – die plek waar vreugde gebore word – ordentlik te voed? Is dit waarom ons so soms sommer net “af en misrabel” voel?

Ware en vervullende vreugde is nie moontlik sonder Christus – die bron van hemelse blydskap nie. Om God dus te vra vir ‘n gelukkige lewe is ‘n nuttelose gebed wanneer ons ons lewens sonder Hom leef. Slegs wanneer ons onsself volkome aan Hom oorgee en toelaat dat sy wil deur ons geleef word, sal ons ware vrede-vreugde beleef.

As jy dus voel of jou lewe vreugdeloos geword het, kan jy jouself vra of jy nie té veel probeer om op jou eie reg te kom nie. Dalk het jy vir ‘n tyd lank buite die sfeer van God se genade en leiding geleef en het dit weer tyd geword om sommer net voor Hom te kniel en te sê: Here, Ek is jammer dat ek soms vergeet om my lewe op U te bou. Vandag bid ek Psalm 86:4: Gee tog vir my blydskap, want na U is my verlange, Here.

Word elke dag minder jý en laat toe dat die Gees jou meer Hý maak. Gou sal jy ervaar dat jou mismoedigheid verdwyn en vreugde op ‘n verrassende manier jou lewe binne stroom.

Trooster-God, wees in beheer van my hart, denke en emosies asseblief.

 

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

 

milanie_boeke_advertensie

 

Skrywer: Milanie Vosloo




Laat sy Liefde jou Lei: Wees ‘n bron van hoop

Laat sy Liefde jou Lei: Wees ‘n bron van hoop – Milanie Vosloo

Wees ‘n bron van hoop

Mag julle insien hoe enorm groot die krag is wat God gebruik in ons wat glo. Efesiёrs 1:19a

Elke keer wat iemand op staan vir ‘n ideaal of iets doen om ander te lewens te verbeter, stuur daardie mense ‘n rimpeling van hoop wat oor die hele wêreld uitkring.

Miskien mag jy wonder hoe, waar en aan wie jy ‘n bepaalde vorm van hoop kan oordra. Want, soos jy, probeer elke mens op aarde om binne sy konteks te oorleef en streef almal daarna om vreugde en lewensvervulling te geniet. Wanneer ons dit besef, sal ons oё en harte waarskynlik ánders begin dink oor ander mense. Dis dan wanneer ons besef dat ons huismense, vriende, kollegas, die kassier, die motoroppasser, die persoon voor jou by die ATM … almal mense is wat hoop soek. Meer nog is dit mense aan wie jý op jou unieke manier ‘n stukkie hemelse lewensmoed kan gee. En rimpel-effek-hoop hoef nooit net groot dinge te wees nie, want hoop kom dikwels in die vorm van ‘n spontane glimlag, ‘n opbouende woord, positiewe kommentaar of ‘n opregte vorm van omgee-liefde. Hoop gee liefde aan omdat dit geduldig, vriendelik en opbouend is. Dit, soos 1 Korintiёrs 13:5 ons leer, tree nie onwaardig op, stel nie eie belang voorop nie, is nie kort van draad nie en hou nie boek van die kwaad nie.

Jy kan vandag ‘n klippie hoop in iemand anders se hart plaas deur bloot die liefde te gaan leef!

Here, ek wil hoop aangee … ek wil vandag ‘n positiewe rimpeleffek-mens wees.

 

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

milanie_boeke_advertensie

 

Skrywer: Milanie Vosloo