Van God kan jy niks weet nie en niks oor Hom sê nie, of so dink party mense (agnostisisme)

Daar is mense wat net hulle skouers optrek as dit by God kom. Hulle sal vinnig vir jou sê dat ons niks van God kan weet nie en ook nie enigiets oor Hom kan of moet sê nie. Vir hulle is niks seker nie, ook nie God nie. Niemand weet regtig nie, sê hulle. Ons noem sulke mense agnostisiste.

Die Bybel vertel ŉ ander storie. Jesus is die ware weg na God (Johannes 14:6), die Een wat vir ons kom vertel het hoe God regtig is (Johannes 1:18). Hy is die beeld van God (Kolossense 1:15) in en deur wie ons God kan leer ken. Hoe kan ŉ mens dan nog sê dat jy God nie kan leer ken nie, behalwe om ŉ streep deur Jesus te trek? Jesus het dan vir ons presies kom wys hoe Hy lyk en wat Hy van ons verwag. Dit is immers wat Jesus kom doen het. Wat meer wil ons hê?

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Demone wat in ŉ mens klim (Duiwelbesetenheid)

Die Bybel steek nie die bestaan van die duiwel en bose magte weg nie.

Net so min word die bose magte as skadeloos vir die mens beskryf. Nee, die duiwel wil mense hê… ja, hy, of sy demone, kan in mense klim en hulle in besit neem. Hulle neem dikwels die persoonlikhede van die mense oor en laat hulle snaakse dinge doen. Ons sien hoe Jesus toe hy hier op aarde was, mense met sulke demone in hulle moes help deur die demone uit te dryf.

Duiwelbesetenheid kan vandag nog voorkom… maar nie in Christene nie. Christene het die Heilige Gees in hulle; en die Heilige Gees deel nie sy “huis” met ŉ demoon nie, nie eers die buitekamer van sy huis nie. Om dus te wil voorgee dat demone in ŉ Christen is, is ŉ ernstige mosie van wantroue in die krag van Jesus en die Heilige Gees. Waar duiwelbesetenheid vandag nog voorkom, is dit in mense wat die Here nie ken nie.

Nou moet Christene nie gerus raak nie. Die duiwel kan wel nie meer in ŉ gelowige klim en hom of haar besete maak nie. Tog kan hy die gelowige nog verlei, weg van God af. Hy kan vir hulle strikke stel, soos ŉ brullende leeu wag om hulle te verslind, soos ŉ wolf in skaapsklere of ŉ engel van die lig aan hulle verskyn om hulle te probeer bedrieg, sodat hulle verkeerde dinge doen. Daarom moet gelowiges die geestelike wapenrusting aantrek (Efesiërs 6). Die hart van hierdie wapenrusting is om naby God te bly en in sy krag die duiwel teen te staan.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Om in niks te glo nie (Nihilisme)

Daar is mense wat hulle neus optrek vir hierdie lewe. Hulle ontken dat daar ŉ God, of enige groter mag is, dat daar enige werklike sin in die lewe is, dat daar nie regtig so iets is soos “reg” of “verkeerd” nie, ook nie wat ons optrede betref nie. Daar is nie regtig waarheid en egtheid in hierdie wêreld nie en ŉ mens kan nie sê die een manier van leef is beter as ŉ ander nie. Dit hang alles maar af wat jy self uit die ou deurmekaarspul van ŉ lewe wil maak.

Die houding is presies die teenoorgestelde van wat die Bybel sê. Die Bybel sê daar is ŉ God en Hy het ons nog lief ook. Hy wil deel wees van ons lewe en wil ons lewe vir ons lekker maak. Hy het vir ons ŉ doel en sin in die lewe. Ons is nie maar net sommer hier op hierdie aarde vir niks nie. Nee, Hy het ons hier geplaas om ŉ verskil te maak. Hy het vir ons elkeen ŉ doel wat ons saam met Hom moet ontdek en najaag. Boonop is daar dinge wat reg is en ander wat verkeerd is. Dinge waarvan die Here nie hou nie, kan nie reg wees nie. Aan die ander kant is dinge waarvan die Here hou, reg. Immers, die Here het ons gemaak… en soos die firma wat jou TV gemaak het weet dat dit nie vir die TV goed is as jy dit saam met jou in die bad sit as jy bad nie (moet dit asseblief nie probeer nie!), net so weet die Here wat vir jou goed en reg is en wat nie.

As jy begin wonder oor dinge, gaan sit gerus op die skoot van God. Daar kry ŉ mens nogal baie antwoorde. As jy egter eenkant, weg van God af gaan sit en wonder, gaan jy op die ou einde maar net in jouself en jou eie tekortkominge vaskyk, soos die nihiliste.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

Daar is net een God (Monoteïsme)

Monoteïsme is ŉ woord wat afgelei is van die Griekse woorde, mono (wat “een” beteken) en teïsme (wat “God” beteken). Dit is dus die naam wat vir godsdienste gegee word wat aan net een God glo. Die Christendom is byvoorbeeld een so ŉ godsdiens. Ons glo daar is net een God en dit is die God wat alles gemaak het.

Monoteïsme staan gewoonlik teenoor politeïsme (“poli” is weer die Griekse woord vir “baie”). Die woord politeïsme dui op godsdienste met baie verskillende gode (sien by politeïsme). In die Tien Gebooie verbied God mense baie duidelik om enige ander gode behalwe die ware God te aanbid. Enige poging om meer as een god te aanbid, word deur die ware God gesien as ŉ verwerping van Hom. Jy mag die ware God dus nie saam met ander gode aanbid nie. Jy moet Hom alleen aanbid en dien. Ja, om so in net een God te glo en Hom alleen te dien, is monoteïsme.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy