‘n Leser vra,

Ek wil die Bybel in hoofstuk volgorde leer ken en verstaan, ingesluit waar op die wereldkaart hierdie gebeure plaasvind, die storie, die verspreiding van mense asook die geloofskennis wat uit elke hoofstuk spruit

Dr Johann Voges Antwoord

Die beste boek wat jy hiervoor kan gebruik is Die Bybel A tot Z by CUM Boeke onder redaksie van prof Jan vd Watt.

Vervolgens ‘n kort uiteensetting waaroor hierdie boek gaan…

Die Bybel A-Z is ’n omvattende hulpmiddel vir élke gelowige. Dit is ideaal vir elke gelowige wat erns maak met sy geloof en die Bybel beter wil verstaan. Dis die ideale kaart vir enige leser se ontdekkingsreis deur die Bybel, van A tot Z!
Dit sluit die volgende in:
• ’n Skrifgetroue vertelling van elke boek van die Bybel.
• Tydlyne wat perspektief bied op Bybelse inligting en hedendaagse gebeure.
• Kaarte wat plekke in die Bybel lewe gee.
• Verrykingsblokkies oor allerlei interessanthede, hedendaagse teologiese kwessies, karaktersketse en agtergrond van die Bybel.
• Indekse vir maklike naslaan.
• Lyste van plante en diere in die Bybel.
• Die gang van die geskiedenis, van Adam tot by Zen-Boeddhisme.
• Vergelyking van belangrikste godsdienste in SA.
• Die literatuursoorte in die Bybel prakties verduidelik.
• Geloofswaarhede en toepassings op die lewe.
• Kort Bybelstudies oor spesifieke temas.
• ’n Eenjaar-Bybelleesprogram en bemoedigende teksverse vir krisistye.
• Omvattende woordelys.
• Dit verduidelik waar die Bybel vandaan kom en hoe dit geskryf is.
• Skakeling tussen Ou en Nuwe Testament.

Skrywer: Dr Johann Voges

JG VRA:

Ek is op soek na ‘n Afrikaanse tydlyn van die Bybel. My kinders het ‘n behoefte om te tydsverloop visueel te verstaan ter ondersteuning van die jong-aarde argument. Natuurlik kan baie gebeurtenisse nie akkuraat tot op die dag bepaal word nie, dis nie waarna ek soek nie. Ek is eerder op soek na iets wat die korrekte volgorde van gebeure aandui, met ‘n geskatte tydstip daarby. Skrifverwysings saam met die gebeure sal wonderlik wees! Bestaan so iets?

 Antwoord

 Prof Jan van der Watt antwoord:

In die Bybel A-Z is daar aan die begin van elke boek wat bespreek word ‘n tydlyn wat by die boek pas. Dit help om die geskiedenis met die betrokke boek te verbind. Ek is nie seker of die tydlyne presies is wat gesoek word nie. Verder weet ek nie van iets wat kan help nie. Ek wil net waarsku teen tydlyne wat op die internet geplaas word. Dit is dikwels nie korrek nie, is spekulasie en wil ‘n betrokke standpunt ondersteun. Gebruik die gegewens maar versigtig. 

Skrywer: Prof Jan van der Watt

Jan vra:

Waarom word, Here op party plekke geskryf, en HERE op ander plekke?

Antwoord

Prof Jan van der Wat antwoord:

Di hoofletters HERE word net in die Ou Afrikaanse vertaling van 1933/53 gebruik en feitlik ook net in die Ou Testament (en nie eers oral in die Ou Testament nie). Die resente Afrikaanse vertalings gebruik Here. Die rede daarvoor hang saam met die naam van God  in die Ou Testament. Die mense van die Ou Testament wou uit respek en vrees dat hulle God (Jahweh) se naam ydelik mag gerbuik nie die naam van God (Jahweh) uitspreek of hardop gese nie. As hulle by die naam kom, het hulle ‘adonai’ gese, wat heer beteken (hulle het ook die klinkers van die woord ‘adonai’ by die letters JHWH gesit wat daartoe gelei het dat sommige vandag nog van Jehova praat). In die Ou 1933/53 vertaling wou die vertalers probeer aandui dat die woord JHWH wat met HEER vertaal die naam Jahweh weergee en onder andere daarom die hoofletters gebruik. Dit is dus ‘n besluit van die vertalers. In die jonger vertalings is besluit om die eervolle aanduiding (in hoofletters) nie meer te gebruik nie, maar eenvoudig Heer met ‘n hoofletter te skryf.. 

Skrywer:  Prof Jan van der Watt

Vraag

‘n Leser vra

Waar in die Bybel staan die woorde: As die Here dan vir my Here gesê het…..

Antwoord
Prof Jan van der Watt antwoord:

Ps 110:1; Mat 22:44; Mk 12:36; Dit is dus ‘n Nuwe Testament aanhaling uit die Ou Testament

Skrywer: Prof Jan van der Watt