Rom 8:1-25 (fokus 8:1-17)

 As ons nie erken dat ons foute maak nie, is daar nie plek vir groei in ons lewens nie. Geestelike groei kom as ons ons swakhede leer ken en iets daaraan doen. Hoe meer swakhede jy sien en uitskakel, hoe sterker word jy geestelik.

Een van die belangrikste dinge wat sonde doen, is om ons oë vir ons eie sonde toe te druk – daarvoor moet Christene oppas (Rom 8:5-8). Dit is soos iemand wat op die verkeerde pad is sonder om dit agter te kom. Sonder of te vra of te dink of te wonder gaan hy maar net aan.

Maar daar is darem hoop vir die Christen. Die Heilige Gees los ons nie sommer maar net nie. Rom 8 vertel vir ons dat die Heilige Gees in die middel van ons pad staan en arms swaai. Hy wil ons waarsku om te kyk op watter pad ons is en saam met wie ons reis. As ons ‘n slag mooi na die pad en ons reisgenoot gekyk het en skrik, moet ons dadelik omdraai… sonder die reisgenoot. Ons moet liewer saam met die Gees op reis gaan sodat hy vir ons die pad begin wys. Dan sal jy nie net ʼn splinternuwe pad vat nie, maar ook ʼn splinternuwe mens word.

Die plek om te so nuwe pad te begin is om jou foute te erken, want dan kom daar plek vir groei. As jy nie meer skinder nie, sal daar kans wees om mooi dinge te sê. As jy nie jou humeur verloor nie, sal daar plek wees vir vriendelikheid. As die sonde nie jou ore doodskreeu nie, sal daar ʼn kans wees om na die Gees te luister. En dit is groei.

Gee jouself ʼn kans. Kyk mooi hoe jou lewensreis lyk. Kies dan die regte pad en die regte reisgenoot.

Rom 7:1-25 (fokus 7:7-25)

 Het jy al op jou lip gebyt omdat jy  “ja” gesê het toe jy eintlik “nee” wou sê? Het jy al gewens jy kan die horlosie terugdraai om te kan regmaak wat jy opgemors het? Paulus ken daai gevoel (7:18-25). Sonde het die styl om onverwags op jou af te kom. Dit vang jou onkant en voor jy jou kan kry land jy vierkantig daarin. Baie keer is dit nie asof jy daarvoor gesoek het nie. Voor jy jou kon kry, was dit daar – die sonde het jou gesoek.

Paulus weet hoe om sulke onaangename verrassings uit te skakel sodat jy nie onkant gevang word nie. Daarvoor het jy iemand nodig om jou die regte taktiek te leer: Jesus (7:25). Jy en Jesus kan dit saam doen. Maar hoe? Jy moet op jou hoede wees, en daarvoor help beplanning. Jy moet saam met Hom ʼn plan uitwerk om met die sonde in jou lewe klaar te speel, ja, op so manier klaar te speel dat jy glad nie onkant gevang kan word nie. Jy moet die sonde uitoorlê in plaas van andersom.

Dit is nie iets wat sommer oornag gebeur nie, want jy moet die regte taktiek aanleer. Nie alleen jou wil nie, maar ook jou deursettingsvermoë en toewyding moet gevorm word deur die regte taktiek, God se taktiek. Jy moet leer om te kan luister en reg te kies. Jy moet met toewyding luister wat Jesus wil hê en dan met deursettingsvermoë te gaan doen wat Hy vra. Maar jy moet ook so doof soos ‘n kwartel wees en so onwillig soos ‘n steekse donkie… as dit by die sonde kom. Jy moet ‘n “sesde sintuig” ontwikkel wat sonde kan uitruik voor dit nog by jou uitkom. Dit is ʼn kwessie van “los wat verkeerd is om plek te maak vir wat reg is”. As jy bereid is om Jesus toe te laat om jou sy taktiek te leer, is daar vir jou hoop!

SAAM met Jesus KAN jy regtig WEES wat jy as Christen WIL wees.

Rom 6:11-23 (fokus 6:11-23)

Baie mense deel hulle lewens in hokkies in, veral as dit by die kerk of godsdiens kom. As hulle Sondae by die kerk klaar is, bêre hulle die “dinge van die siel” in ‘n hokkie en gaan met ander dinge in die lewe aan. Dan kom jy nie eers agter hulle is in die “dinge van die siel” geïnteresseerd nie.

Dis nie die idee wat die Here van die lewe het nie, in alle geval nie vir jou as Christen nie. Om Christen te wees beteken nie net om die hokkie van jou “siel” vir die Here te gee en so vir die res van die week sy invloed uit die ander hokkies uit te hou nie; nie eers as jy dit onbewustelik doen nie. Rom 6:13 praat van elke liggaamsdeel van jou, ja, die héle jy, wat die Here s’n moet wees, elke dag, die hele dag.

Jy kan maar by jou kop begin. God wil ons nie net van ons nek af onder toe hê nie. Hy soek nie net ons harte nie. Nee, Hy wil ook, maar veral ons koppe hê. Ons moet anders dink, ja, soos Hy begin dink. Want as ons anders begin dink, gaan ons anders begin doen. Dan gaan ons tong anders begin praat en ons ore anders begin luister. Dan gaan ons hart anders begin klop, meer nog, vir God se dinge begin klop. Ons lewe vir die Here kan nie in ʼn hokkie toegesluit word nie, nie in die kerk nie, nie in ons stiltetyd nie, nêrens nie. Dit wat ons vir die Here Sondae in die kerk sê moet Maandag en Dinsdag ook ons lewensleuse wees.

Gooi die hokkies in jou lewe weg – leef voluit saam met God.

Rom 5:12-6:10 (fokus 6:1-10)

 Die evangelie is soos om deur ʼn vreemde land te reis. Daar is verrassings om elke hoek en draai. Waarskynlik een van die grootste verrassings op reis deur die evangelie is God se genade – nie net dat Hy ons genadig is nie, maar omdat sy genade so groot is. Rom 5:21-6:10 is een van die stilhouplekke op ons reis saam met God waar ons dit die duidelikste sien.

Wat sien ons hier? Wel, kan ons soveel sonde doen dat God se opgaartenks van genade sal leegloop? Of anders gestel: kan ons God ooit bankrot maak aan genade? Nooit!

As daar een ding is waarvan God genoeg het, dan is dit genade. Al kan ʼn mens al die sonde wat gelowiges ooit gedoen het, aan een kant van die skaal pak, sal die kant met God se genade nog altyd swaarder bly weeg.

Maar, al is daar so baie genade mag ons dit nooit mors nie. Ons mag nooit dink dat ons maar net kan aanhou sondig omdat God maar net weer en weer genadig sal wees nie. Dit is waar God die krane toedraai. Hoewel daar baie genade is, is dit nie goedkoop nie. Jesus het elke druppel daarvan vir ons met sy bloed verdien. Al is daar baie genade, raak dit tog skaars of droog selfs op as jy dit begin mors.

Jy mag nooit God se genade goedkoop maak nie. Vir die wat verstaan hoe kosbaar genade is, is daar ‘n oorvloed. Dit kan net nooit opraak nie. Maar vir die wat dit goedkoop maak deur te dink dat dit maar net sal aanhou omdat dit verniet is, sal verbaas wees hoe gou genade klaar raak.