DIE VERHAAL VAN JESUS DEUR DIE OË VAN MARKUS (9) – Jan van der Watt

Episode 7: Markus 10

Nuwe lewensreëls geld in die skadu van die kruis – die menslike waardesisteme word op hulle kop gedraai. Christene dink anders oor krag, status en belangrikheid. Hoe sien jy dit uit Markus 10? …

………………………………………………………………………………………………………………………………………….

………………………………………………………………………………………………………………………………………….

Kom ons kyk hoe lyk Markus 10:

• Neem as voorbeeld egbreuk en skei – in God se koninkryk lyk dit anders (10:1-12)
• Jy moet soos ‘n kind word (wat die ryk jongman nie wou doen nie – 10:13-31)
  • Jesus se kruis wys Hy is gehoorsaam (10:32-34)
  • Die belangrikste posisies geld nie (10:35-45)
  • Dis bedelaars by wie Jesus stop en hulle oë gaan oop (10:46-52) 

As daar staan dat ons soos ‘n kind moet word, beteken dit nie dat ons soos babatjies in die kot moet gaan lê nie. Kinders is destyds op ‘n spesiale manier gesien. Hulle is as wordende persoonlikhede gesien. ‘n Mens kan dit vergelyk met ‘n glas. As die kind gebore word, is sy basiese karaktertrekke daar, soos die glas. Soos die kind grootword, moet hy/sy water in die glas kry – dit is die onderrig, lewenslesse ens. wat die kind van sy ouers en die gemeenskap kry. Soos die onderrig (die ‘water”) die glas voller maak, groei die persoonlikheid en word dit al meer volwasse. So “word” die kind wat hy moet wees. In die proses moet die kind dus soos die glas “oop” en ontvanklik wees. Hy moet gehoorsaam luister (die water toelaat om die glas vol te maak). Hy moenie self die glas probeer volmaak of dink hy het nie die water nodig nie – hy moet in afhanklikheid en gehoorsaamheid die onderrig en leiding ontvang. As Jesus hier sê dat ons soos kinders moet word bedoel Hy juis dit: ons moet in gehoorsame afhanklikheid voor die Here staan en ons deur sy voorbeeld en onderrig laat “volmaak”. Ons moenie teëpraat of dink ons weet self nie. Gehoorsame ontvanklikheid en navolging is die sleutelwoorde. Juis daarvoor het die ryk jongman nie kans gesien nie!

Markus 10:45 is die samevatting van alles: “Die Seun van die mens het ook nie gekom om gedien te word nie, maar om te dien en sy lewe te gee as losprys vir baie mense”. So moet sy dissipels en volgelinge ook hulle lewens inrig. Christenskap is dienslewering in gehoorsaamheid aan Jesus.

Jesus bring ‘n nuwe manier van lewe… soos ‘n kind van God 

Skrywer: Prof Jan van der Watt

DIE VERHAAL VAN JESUS DEUR DIE OË VAN MARKUS (8 – Jan van der Watt

Deel 3 – die inhoud van Markus 8:22-16:20

Die eerste deel van Markus (1:1-8:21) het Jesus geteken as die Seun van God wat wonders doen en kragtig optree. Hy is ‘n suksesverhaal – so lyk die eerste “wip van die wipplank” – dit wip op. Nou kom die tweede “wip” en hierdie keer gaan dit vanuit menslike oogpunt ondertoe.   

Episode 6: Markus 8:22-9:50

Kyk noukeurig na 8:22-9:29. Watter tekens van “skynbare mislukking” kan jy hier sien? …………

………………………………………………………………………………………………………………………………………..

………………………………………………………………………………………………………………………………………..

Die draaipunt – ‘n verhaal wat anders lyk, want dit dra die tekens van lyding:

• Jesus genees ‘n blinde… twee maal! (8:22-26)
• Petrus bely en Jesus kondig sy dood aan (8:27-33)
• Navolging deur die dissipels beteken kruisdra (8:24-9:1)
• Die verheerlikte Jesus is die lydende Jesus (9:2-13)
• Selfs die dissipels sukkel – die bose geeste wil nie na hulle luister nie, maar met Jesus is dit anders (9:14-29)

Kyk net na die volgende:

1. Met sy vorige genesing (7:31-37) het Jesus twee siektes met een slag gesond gemaak – Hy het alles goed gedoen! Nou (8:22-26) moet Hy twee probeerslae vat om een siekte te genees. Dit is Markus se subtiele manier om vir ons as lesers te wys dat die verhaal nou draai… wipplank wip af.
2. Ander draai ook – Petrus word ‘n instrument in die hande van die duiwel (8:33) omdat hy nie verstaan nie… Jesus moet ly, want dit is God se wil. Jesus se dissipels verstaan eenvoudig nie wat aangaan nie. Jesus sal die pad alleen moet loop, want of sy dissipels kan Hy nie werklik staatmaak nie (9:14-29).
3. Christenwees is nie net maanskyn en rose nie – dit is nie net wonders doen en skares trek nie. Dit is ook diens en lyding. Jy moet soos Jesus jou kruis dra (8:24-9:1)

Op die manier word ‘n ander sy van Jesus en Christenskap geteken: Jesus moet ook ly. Dit gaan nie net om glorie nie, maar ook om lyding… Die verheerliking op die berg trek alles egter net mooi in perspektief – die Een wat gaan ly, is steeds die verheerlikte Seun van God (9:7). Dieselfde Jesus wat wonders doen en mense genees is ook die Seun van God wat aan die kruis moet sterf.

In die wipplank wat begin af gaan, skitter daar tog ligpunte wat ‘n mens help om die “afgaan” behoorlik te verstaan – dit “geskitter” het al begin toe Jesus die bose gees uit die seun uitgejaag het wat sy dissipels nie kon nie (9:14-29). Hoewel Jesus aan ‘n kruis vasgeslaan gaan word, beteken dit alles behalwe magteloosheid. Die Seun wat aan die kruis hang, bly die Seun wat kragtige wonders kan doen. Dit is nie volslae mislukking nie – inteendeel, dit is deel van God se plan. Sterwe gaan verander in opstanding. Kyk na Markus 9:30-50: 

• Die ligpunt… Jesus gaan sterf, maar gaan ook opstaan (9:30-32)
• Hoe verstaan ek dit alles… deur die regte waardes te hê – Jesus se waardes: Byt vas en moenie dit vir ander swaarder maak nie (9:42-50)
  • wie is die belangrikste? Dinge word op hulle kop gedraai (9:33-37)
  • wie’s ons mense? Wie nie teen ons is nie, is vir ons (9:38-41)

Ja, daar is ook ‘n ander kant aan die suksesvolle Jesus – Hy gaan sterf, maar nie in hopeloosheid nie. 

Skrywer: Prof Jan van der Watt

DIE VERHAAL VAN JESUS DEUR DIE OË VAN MARKUS (7) – Jan van der Watt

Episode 5: Markus7:1-8:21

Wat is oud en wat is nuut? Ja, Jesus se boodskap is nou uit. Mense het dit gehoor… die koninkryk is aan die kom. Maar hoe verander dit die alledaagse lewe?

Alledaagse lewe vir Jode?… ons moet onthou dat die Jode hulleself as verbondsmense gesien het. As jy dus as Jood “binne die verbond” gebore word, hoef jy nie gered te word nie, want jy is mos klaar binne. Jou belangrikste doel was nou om binne te bly! En as Jood is daar mooi vir jou vertel hoe om binne te bly: jy moet die wette nakom, nie net die Tien Gebooie (verbondswet) nie, maar ook al die reinheidswette. Deur al die wette te hou, het hulle geredeneer, het jy jou verhouding met God suiwer gehou. Jesus het egter ‘n probleem hiermee: die mense is so gepla met die wette, dat hulle van God vergeet. Hulle verloor hulle verhouding met God in hulle pogings om die wette te hou. Op die ou einde klop jy jouself op die skouer in plaas daarvan om van God afhanklik te wees en dit deur jou toewyding vir Hom te wys.  

Kom ons kyk wat sê die teks (lees die teks van Markus saam met die volgende opsomming):

• Wat van die Joodse gebruike?
  • Hulle is in reëls en wette vasgevang (7:1-13 lees vers 9)
  • Reinheidswette en werklike reinheid (7:14-23)
    • Onrein Jode word rein (7:24-30)

• Jesus tree kragtig op
  • Die hoogtepunt van sy sukses: Hy genees ‘n doof-stomme (7:31-37)
  • Hy voed sy mense en stuur hulle huistoe (8:1-10 oorgangstuk) 

• Die Joodse leiers kragteloos en vals in die teenwoordigheid van Jesus (8:11-21)
  • Die Joodse leiers wil ‘n spesiale hemelse teken hê – want hulle kyk die groot Teken mis (8:11-13)
  • Die motiewe van die Joodse leiers is verkeerd en kan mense negatief beïnvloed. Die dissipels moet altyd onthou dat Jesus die een is wat in oorvloed gee (8:14-21)

Kyk veral na die volgende: hoe verander Jesus die opvatting van hoe ‘n mens rein word of is? Stel jouself voor jy is ‘n Jood wat voel jy moet al die reinheidswette hou (gereeld ritueel was, net sekere kos eet, sekere tye moet jy jou heilig hou, jy mag aan sekere goed nie vat nie, ens.) en nou kom Jesus en Hy sê wat hy in Markus 7 sê. Hoe dink jy gaan dit jou houding teenoor godsdiens verander?…………………………………………………………………………………………………………………………….

…………………………………………………………………………………………………………………………………………..

Die dele (7:31-37;  8:1-10 en 8:11-21) is in die opbou van Markus belangrik:

• Die verhaal van die doof-stomme (7:31-37) is die toppunt van die suksesverhale van Jesus. Kyk net: Hy maak twee siektes (doofheid en ‘n spraakgebrek) gesond. “Alles wat Hy doen is goed” (7:37). Hier sien ons die Seun van God in krag! Die Koning van die koninkryk is hier.
• Dan voed Hy mense en stuur hulle huis toe, as teken van sy versorging. Wie Hom volg sal voor gesorg word (8:1-10).
• Die Joodse leiers is op die verkeerde pad – hulle soek verkeerde tekens en beïnvloed mense verkeerd (hulle werk soos suurdeeg). Pasop vir hulle (8:11-21).

Jesus is God se krag in die wêreld wat mense rein maak en versorg. Wette kan dit nie doen nie.

Ons het nou tot by Markus 8:21 gevorder – tot by die skanier. Volgende keer gaan ons verder.

Skrywer: Prof Jan van der Watt

DIE VERHAAL VAN JESUS DEUR DIE OË VAN MARKUS (6) – Jan van der Watt

Episode 4 – Markus 6

Die woorde van Jesus moet uit… maar die reaksies wissel.

As jy tyd het, teken die verskillende reaksies op Jesus aan…………………………………………………….

………………………………………………………………………………………………………………………………………

Wat dink jy moet ‘n mens daaruit leer?……………………………………………………………………………….

………………………………………………………………………………………………………………………………………

Nasaret ontken Hom, maar die woord tref baie wyer deur sending (6:1-13)

Reaksies wissel (6:14-29)

• Die mense (6:14-16)
• Selfs Johannes die Doper (6:17-29)

Die dissipels kom terug met suksesverhale (6:30-34)

Jesus versorg sy mense wat sy woord aanneem

• Met fisiese en geestelike voedsel (6:35-44)
• Met sy nabyheid (6:45-52)
• Sommer almal (6:53-56)

Jesus is nie deur almal met ope arms ontvang nie, maar tog het die saad in baie se harte gegroei. Dit vertel hierdie episode vir ons.

Wat veral hier interessant is, is hoe die einde van die episode Jesus se reaksie teken – die verkondigde Here word hier die versorgende Here (6:35vv.). As jy bereid is om die pad saam met Jesus te stap, moet jy weet Hy stap die pad saam met jou ook. HY sal vir jou sorg, op baie maniere, maar veral deur sy teenwoordigheid. Dit is wat hom so anders maak as gewone mense – Hy kan vir jou sorg, sal vir jou sorg omdat Hy die Seun van God is.

Kyk na Mk 6:35-56 en kyk hoe versorg Jesus sy mense……………………………………………………………

Jesus se woord is vir almal, hoewel nie almal dieselfde reageer nie. Party verwerp Hom sowaar. Hier sien ons dus hoe lyk geloof en ongeloof in die praktyk.  Die wat positief reageer, word deur Hom versorg.

Skrywer: Prof Jan van der Watt