Katie
vra:

Is wedergeboorte n voorvereiste om die
Heilige Gees te ontvang of is die heilige gees ook in mense wat gelowig groot
geword het maar nie die “oomblik” van wedergeboorte beleef het nie.
As die Heilige Gees in ons is, kan dit gebeur dat hy ons ook kan verlaat?Ook:
is dit die Heilige gees wat met ons praat in drome. Ook: ek kry skieliik n
gedagte en wonder “wat sal gebeur” as ek n sekere ding sien in my
gedagtes. Dan gebeur dit wat ek gesien het. Dit gebeur nie daagliks nie. Dae of
weke kan verbygaan voordat dit gebeur. Is dit die Heiliige Gees wat met my
gepraat het?

Antwoord

Prof Francois Malan antwoord:

1 Oor jou vraag: Is
wedergeboorte ’n voorvereiste om die Heilige Gees te ontvang…

Die Heilige Gees is God wat in ons
werk om ons te verbind aan Jesus Christus en sy liefdesoffer vir ons sonde en
met sy opstanding uit die dood. Hy skep ons wedergeboorte deur ons tot geloof
in Jesus te lei (Joh 15:26 en 16:8). Efesiërs 2:8 ‘Want uit genade is julle
verlos deur geloof. En dit kom nie uit julleself nie, dit is die gawe van God.’

Wedergeboorte is God se werk in
ons. In Johannes 1:12-13 sê Jesus: aan almal wat in sy Naam glo, het Hy die reg
gegee om kinders van God te word, dié wat uit God gebore is. In Johannes 3:3 sê
Jesus: ‘Voorwaar, voorwaar, Ek sê vir jou: As iemand nie van bo weer gebore
word nie, kan hy die koninkryk van God nie sien nie’ (die oorspronklike Griekse
woorde gennêthêi ánōthen beteken ‘weer gebore
word van bo af’). In Johannes 3:6 ‘wat uit die Gees gebore is, is geestelik.’

Paulus gebruik die Griekse woord palingennesía vir ‘weergeboorte’ in Titus 3:4-7: ‘Maar
toe die goedheid en menseliefde van God, ons Verlosser, verskyn, het Hy ons
verlos – nie op grond van werke wat ons uit geregtigheid gedoen het nie, maar
op grond van sy ontferming – deur die afwassing deur die wedergeboorte en
vernuwing deur die Heilige Gees, wat Hy ryklik oor ons uitgegiet het deur Jesus
Christus, ons Verlosser. So het ons, geregverdig deur sy genade, erfgename
geword van die ewige lewe waarop ons hoop.’  

In 1 Petrus 1:3 en 23 word die
Griekse woord anagennáō ‘weergebore laat word’gebruik:

            1 Petr 1:3-4 ‘Lofwaardig
is die God en Vader van ons Here Jesus Christus! Dit is Hy wat ons in groot
ontferming, deur die opstanding van Jesus Christus uit die dood, opnuut verwek het sodat ons ’n lewende hoop mag hê op
’n erfenis wat nooit vergaan, besmet word of verwelk nie, en wat vir julle in
bewaring gehou word.’ 
            1
Petr 1:23 ‘Julle is immers weer gebore,
nie uit verganklike saad nie, maar uit die onverganklike saad – deur die
lewende en blywende woord van God.’ God herskep ons persoonlikheid tot ’n
radikale omkeer om nie meer vir onsself te wil lewe nie, maar vir God. En dit
doen Hy deur die Heilige Gees wat ons oortuig van die woord van God wat ons
hoor of lees, sodat ons in Jesus glo as God wat vir ons sonde gesterf het en
dat ons saam met Hom sal opstaan uit die dood.

2 Jou vraag oor mense wat
gelowig groot geword het maar nie die “oomblik” van wedergeboorte
beleef het nie.

Die Heilige Gees werk in ons om ons
tot geloof in Jesus te lei. Dit is nie in die eerste plek ’n belewenis nie,
maar ’n saak van geloof. As jy glo in Jesus as jou Verlosser kan jy seker wees
dat die Heilige Gees jou daarvan oortuig het. Vir sommige mense is hulle geloof
in Jesus as hulle Verlosser ’n vreugdevolle ontdekking. Ander mense het van
kindsbeen af in Jesus geglo, omdat die Heilige Gees reeds in babatjies van
gelowige ouers kom woon het.

3 Jou vraag: As die Heilige Gees
in ons is, kan dit gebeur dat hy ons ook kan verlaat?

Hebreërs 6:4-6: ‘Dit is immers
onmoontlik om hulle wat eenmaal verlig is, wat die hemelse  gawe gesmaak, en deel gekry het aan die
Heilige Gees, en wat die goeie woord van God gesmaak het, en ook die kragte van
die komende bedeling, en tog afvallig geword het, weer opnuut tot bekering te
bring, aangesien hulle wat hulleself betref, die Seun van God opnuut kruisig en
openlik tot skande maak.’ Volgehoue verwerping van Jesus as jou Verlosser kan
lei tot verlating deur die Heilige Gees.

4 Jou laaste vraag oor die Heilige Gees wat met jou praat: die Heilige Gees kom woon in ons en lei ons elke oomblik van ons lewe, en nie slegs om toekomstige dinge te sien of te verwag nie. Maar dan verwag Hy dat ons op Hom sal wag om ons te lei en nie ons eie wil te probeer deurvoer as dit teen sy wil is nie, maar dat ons sal kyk hoe Hy vir ons deure toemaak en ander oopmaak. Want God is vír ons, Hy het ons vrygespreek, Christus tree vir ons in by God, en geen swaarkry of ellende kan ons skei van God se liefde wat daar in Christus Jesus ons Here is nie (gaan lees Romeine 8:31-39).

Skrywer: Prof Francois Malan

Vervulling met die Gees – Kobus Kok

Ronel Pistorius vra:

 

“Kan iemand asseblief vir my verduidelik wat is die verskil tussen die “indwelling of the Holy Spirit” en “being filled by the Holy Spirit”? Is daar ‘n verskil?”

 Antwoord

Prof Kobus Kok antwoord:

Is daar ʼn verskil tussen die “indwelling of the spirit” en die “being filled with the spirit”?

Ons moderne maniere om oor die saak te praat is dikwels verwarrend, veral omdat verskillende tale die begrippe anders uitdruk omdat hulle ander woorde het om bepaalde konsepte mee uit te druk. Verder is baie van die maniere waarop ons vandag, veral in die Charismatiese kringe daaroor praat, vreemd aan die wyse waarop die Bybel self daaroor gepraat het. So is die gedagte dat mens die Heilige Gees nooi om deel te word van die erediens eintlik heeltemal vreemd aan die Bybel self. Die vroeë Christene het geglo dat hulle die Gees ontvang het, en dat die volheid van God se Gees reeds in die kerk teenwoordig is. Lees maar net Efesiërs 1:23. Die beste is om na die oorspronklike Bybelse tekste in die Grieks self te gaan kyk, en die begrippe en terme wat die Bybel self gebruik, jou eie te maak en nie vreemde konsepte in die proses “in te voer” nie.

In Johannes 20 lees ons hoe Jesus na sy opstanding oor die dissipels blaas en gee dan vir hulle die opdrag om die Heilige Gees te “ontvang” (labete). Die wat glo het ook die Gees ontvang – hulle is vervul met die Gees.  Ons lees in Handelinge 2:4 Lukas se weergawe van die gebeure en Lukas gebruik weer ander woorde om dieselfde saak mee te beskryf. Lukas sê dat die dissipels vervul is met die heilige Gees wat soos wind die vertrek gevul het, en toe soos vuurtonge op die dissipels se koppe  gaan rus het. In Handelinge 4:2 sê Lukas dat hulle toe vervul is met die Heilige Gees en dat hulle in ander tale begin praat het wat die hoorders erken het – synde dat hulle almal die evangelie in hulle eie taal gehoor het. Die woord vir vervul wat Lukas in Hand 4:2 gebruik is eplêsthêsan (hulle was vervul) wat in die Aoristos (verlede) Indikatief (feit) Passief (God doen die aksie) vorm van die werkwoord voorkom. ʼn Werkwoord in Grieks wat in die passief voorkom, dui aan dat die subjek nie die aksie van die werkwoord verrig nie, maar dat die aksie van die werkwoord (om te vervul) deur iemand anders aan die subjek gedoen word. In hierdie geval is hulle deur die Heilige Gees vervul.   Dit wat daar in Handelinge 2 met die dissipels gebeur was so effens anders as wat later met ander gelowiges gebeur. Dit verwys na die eerste uitstorting van die Gees. Gelowiges wat later tot bekering kom, ontvang die Heilige Gees. Gelowiges wandel in die dampkring van die Gees – hulle is mense wat reeds van die bestaanstoestand van dood na die bestaanstoestand van lewe oorbeweeg het (vgl. Joh 5:24). Volgens die Bybel werk die heilige Gees in en deur die gelowige. Die Gees wat reeds in die gelowige is, lei die gelowige in waarheid en bemagtig die gelowige om die vrug van die Gees te doen (vgl. Gal 5:22). In Galasiërs sê Paulus mens moet “wandel in die Gees” en nie die begeertes van die vlees bevredig nie. Die woord vir “wandel in die Gees” word in die Grieks uitgedruk met die woorde “pneumati [Gees] peripateite [wandel]” (Gal 2:16). Die woord peripateite in die Grieks kom voor in die Praesens Imperatief Aktiewe vorm van die werkwoord. Dit beteken dat Paulus vir hulle die opdrag gee (imperatief) om self (aktief) as ʼn gewoonte/permament (praesens) te wandel (dwell) in die Gees. Die Gees is immers in die gelowige, maar ʼn gelowige moet ook daarvolgens wandel. ʼn Beeld wat ons daarmee kan help is die van ʼn akteur op ʼn donker verhoog in die staatsteater. Indien die lig op die akteur skyn, wandel hy/sy in die lig. Die persoon is beide vervul met die lig, maar wandel ook in die lig. Net so moet gelowiges, op wie God se lig skyn, en in wie die Gees reeds teenwoordig is, binne die dampkring van die lig wandel.

Die gedagte dat mens op een of ander mistieke wyse meer indwelling van die Gees kan kry is eintlik vreemd aan die Bybel self. Dit is wel so dat indien mens vas en bid dat mens nader aan die Here voel, maar dit moet nie verwar word met die “indwelling” van die Gees nie. Gelowiges het reeds die volheid van God se Gees wat in en deur hulle werk. Deur geloofsgewoontes verbind jy jouself net sterker aan God, maar dit beteken nie dat jy soos ʼn houer is waarin die Gees minder of meer teenwoordig kan wees nie. Jy het die Gees ontvang of jy het nie die Gees ontvang nie. Gelowiges wat nie in die Gees wandel nie kies egter teen God en verwerp die werking van God se Gees in hulle.

Bestudeer gerus die volgende tekste wat verbind word met die ontvangs van die Gees:

•         Luk 1:35; 11:13

•         Joh 20:22

•         Hand 8:15, 17:19; 19:2

 

Skrywer: Prof Kobus Kok