If it be asked what cause induced him (God) to create all things at first, and now inclines him to preserve them, we shall find that there could be no other cause than his own goodness – Calvyn

Die kerk (5)

Ons het nou na drie beelde van die kerk gekyk: die huisgesin, die liggaam en die kudde. Ons kom nou by die laaste beeld wat ek gaan beskryf.

Beeld #4: Die bruid van Christus

 In enige huweliksverhouding moet daar liefde en trou wees. Maar wat behels hierdie beeld van die bruid?

• Reinheid. Ek waak oor julle met ‘n ywer wat van God kom, want julle is soos ‘n jongmeisie wat ek aan een man toegesê het as sy bruid en wat ek vlekkeloos na hom toe wil bring. Die man is Christus (2 Korintiërs 11:2). Ons weet tog dat die bruidegom, Christus, sonder sonde is. Christus het die vermoë om sy bruid – die kerk – sonder vlek of rimpel of iets dergelik, heilig en onberispelik te maak (Efesiërs 5:27).
• Beskerming. Dit is ‘n seën vir ‘n bruid om te staan en wag vir haar bruidegom. Jy kan tog nie die bruidegom (Christus) liefhê en die bruid haat nie.

Ek het hierdie paar blogs geskryf, want ek is bekommerd oor mense wat gedurig die kerk afkraak. Ons moet ons liefde vir die kerk weereens verklaar. Die kerk is nie volmaak nie … ons ook nie. Ons moet die mense en leiers van die kerk liefhê. Ons kan nie ‘n verlore en sterwende wêreld liefhê as ons nie God  se bruid – sy kerk – liefhet nie.

In die laaste blog kyk ons na ‘n artikel van Ben Witherington III oor hierdie saak.

How richly does he supply us with the means of contemplating his mercy when, as frequently happens, he continues to visit miserable sinners with unwearied kindness – Calvyn

Die kerk (4)

Ons het na tweede beelde van die kerk gekyk: die kerk as huisgesin van God en die kerk as liggaam van God. Ons kom nou by die derde beeld.

Beeld#3: Die kudde van God

 Hierdie beeld van die Herder en sy kudde is aan ons goed bekend. Ons kry hierdie beeld in verskeie boeke van die Bybel. Waarskynlik die mooiste beskrywing kry ons in Johannes 10. Jesus is die Herder van die kerk.

Hy is ‘n opregte Herder: Ek is die goeie herder. Die goeie herder lê sy lewe af vir sy skape.  Jesus is die hekwagter: niemand kom in die kraal as die hekwagter nie die hek oopmaak nie. Die enigste veiligheid vir die kudde is in Jesus Christus.

‘n Belangrike beeld vir kerke vandag is die herder wat sy verlore skape soek. Ons is meer gemaklik om om te sien na die skape in die kraal en doen niks aan dié buite die kraal nie. Christus se voorbeeld dring ons om uit te gaan en verlore skape te soek. Dit is nie maklik om hierdie verlore skape in die midde van die gemeente te ontvang nie. Ons vreugde moet wees as ons een wat afgedwaal het weer vind.

Natuurlik moet ‘n herder sy kudde versorg. In Psalm 23 lees ons van skape wat rus in groen weivelde en gebring word na waters waar rus is. In Johannes 10 sê die skrywer dat die skape die herder se stem ken en daarom volg hulle hom. Die kudde kan onderskei.

Volgende keer kyk ons na die laaste beeld: Die kerk is die bruid van Christus.

In seeking God, the most direct path and the fittest method is, not to attempt with presumptious curiosity to pry into his essence, which is rather to be adored than minutely discussed, but to contemplate him in his works – Calvyn

Die kerk (3)

In die vorige blog het ons na die kerk as huisgesin van God gekyk. Ons kyk nou na ons tweede beeld.

Beeld #2: Die liggaam van Christus

Ons kry hierdie beeld in verskeie van Paulus se briewe. Hierdie beeld dra kenmerke soos interafhanklikheid en aktiwiteit oor. Aktiwiteit is lewensnoodsaaklik vir die kerk. Die verskillende liggaamsdele pas bymekaar en vorm saam ‘n eenheid. Elkeen van hulle vervul sy funksie en so bou die liggaam homself op in liefde (Efesiërs 4:16). Elkeen het ‘n funksie en moet dit vervul. Gebeur dit nie, kan die kerk nie optimaal funksioneer nie.

In Efesiërs 4:4 – 13 beskryf Paulus die gawes wat God aan die liggaam gegee het. Hoekom gee Hy hierdie gawes: Sy doel daarmee was om die gelowiges toe te rus vir hulle diens en vir die opbou van die liggaam van Christus. So sal ons uiteindelik almal kom tot die werklike eenheid in ons geloof en ons kennis van die Seun van God. Dan sal ons, sy kerk, soos ‘n volgroeide mens wees, so volmaak en volwasse soos Christus. As Christus se liggaam is ons sy versorgingsagente op aarde.

Hierdie beeld maak dit duidelik dat daar nie “mindere” lede van die liggaam is nie. Vir optimale funksionering moet alle lede betrokke wees. Kerke moet beklemtoon dat hulle een doel het – al verskil hulle van mekaar.

Dit bring ons nou by die derde beeld van die kerk in die Bybel: die kudde van God.

For in regard to the fabric and admirable arrangement of the universe, how few of us are there who, in lifting our eyes to the heaven, or looking abroad on the various regions of the earth, ever think of the Creator? – Calvyn

Die Kerk (2)

In die vorige blog het ek probeer aantoon dat die kerk ‘n belangrike plek in God se plan vir die wêreld speel. Ons kyk nou na ‘n paar beelde van die kerk soos ons dit in die Bybel kry. Dit word beweer dat daar meer as negentig beelde van die kerk in die Bybel beskryf word. Dit is omdat geen enkele beeld die volle belang van die kerk kan beskryf nie. Ons gaan in die volgende blogs na vier van hierdie beelde kyk.

Beeld #1: Die huishouding van God

Mense wat saam in ‘n huishouding leef, is ‘n intieme toneel van liefde. Paulus skryf aan Timoteus: Ingeval my koms vertraag word, sal jy dus weet hoe iemand hom moet gedra in die huisgesin van God, dit is die gemeente van die lewende God. Die gemeente is die draer en beskermer van die waarheid (1 Timoteus 3:15). In Efesiërs 2:19 verwys hy na die gelowiges as lede van die huisgesin van God. Liefde in die kerk straal uit hierdie beeld van die kerk as huisgesin. In ‘n huisgesin is dit belangrik dat lede mekaar moet liefhê.

‘n Ander aspek van die kerk as huisgesin is sy verhouding met die Vader. En omdat ons sy kinders is, het God die Gees van sy Seun in ons harte gestuur, en in ons roep Hy uit: “Abba!” Dit beteken: Vader!  In die Misjna beteken Abba ‘n gesinsverhouding waarin die kinders versorg word. Dit beteken ook dat die gelowiges die erfgename van sy koninkryk is. Soos ons probeer vasstel wat dit beteken om lede van God se huisgesin te wees, word die verantwoordelikheid wat ons het om God se begeertes te vervul, duidelik.

Ons moet ons medegelowiges liefhê, maar ons moet ook maniere vind om te verseker dat ander mense ook die goeie nuus van ons Vader hoor. In die huisgesin sorg ons vir diegene wat minder bevoorreg as ons is. Dien ons nog die minder bevoorregtes in ons gemeenskappe?

Wat nou van al die gevegte in die kerk? Gesinslede baklei ook. Solank as wat ons nog hier op aarde is, is die kerk ‘n disfunksionele gesin. Dit is omdat gesinslede staan op hulle regte en hulle eie voorkeure wil afdwing – in plaas van ons oë op die oes gerig te hou.

Volgende keer gaan ons na die tweede beeld van die kerk in die Bybel kyk: die liggaam van God.