12 Julie: Moet op mense nie vertrou nie. – Jan van der Watt

image_pdfimage_print

1 Kor 1:1-17 (fokus 1:10-17)

 Iewers in die Psalms staan daar dat ons nie op prinse of magtiges moet vertrou nie (Ps 146:3). Hulle sal jou keer op keer teleurstel. Dit is nou maar eenmaal so – mense se voete is van klei gemaak, ook predikante en pastore s’n.

Dit gebeur nogal dat mense te maklik van dominees geestelike helde maak. Die dominee of pastoor praat dan so mooi en is altyd so vriendelik. Daarom is die teleurstelling soveel groter as die dominee ook maar sy sonde en broosheid voor die gemeente moet bely, ja, as hy moet erken hy is nie die superheld van God wat die mense gedink het nie.

Die medisyne teen sulke teleurstellings is om nie in die strik te trap om in dominees vas te kyk as jy eintlik vir Jesus moet raaksien nie (1:10-17). Los die dominee dadelik wat te veel aandag op homself wil vestig en te min van Jesus wil wys. Hy self verstaan te min van die evangelie om jou regtig op die goeie pad te kan help. Niemand kan die plek van Jesus vat nie, nee, niemand kan eers in sy skaduwee staan nie. As jou pastoor nie die hele tyd vir Jesus laat skitter en jou sy goeie nuus laat hoor nie, kry ‘n ander een. Hierdie pastoor gaan jou nie red nie, al probeer hy. Jy het vir Jesus nodig om jou te red en as die pastoor in Jesus se pad staan, systap hom.

Moenie jou godsdiens aan mense bind nie; nie eers aan pastore of dominees nie. Bind dit aan Jesus. Dan sal jy ten minste nie teleurgestel word nie.

image_pdfimage_print

You may also like...