Die Eerste Brief van Johannes (6) – Jan van der Watt

Deel 2: ‘n Geesvervulde lewe – in die gesin van God

Ons begin nou met die tweede deel van ons Bybelstudie.

Hoofstuk 5: ‘n Vader duisend? Duisend maal meer!

Niemand minder as God self sê dat Hy na jou sal omsien as jy sy kind is nie. Glo jy dit? Waarom is daar dan nog twyfel en vrees by jou?

 ’n Klein, klein wêreld … jóú wêreld?

Hoewel ons op die maan en ander planete land en met teleskope dieper die ruimte inkyk as ooit tevore, is ons wêreld geneig om al hoe kleiner te word. Hoe dan so?

Die rede is omdat ons die grense al hoe nouer om onsself as mense trek. Alleen dit wat sogenaamd bewys kan word, met die oog gesien en met die verstand uitgeredeneer kan word, glo ons regtig en is vir ons waar! Dinge wat ons nie mooi kan verstaan nie, bestaan volgens ons eintlik nie regtig nie. Ons leer ons kinders op skool dat iets alleen “wetenskaplik” en dus “waar” is as ons dit met ’n eksperiment kan bewys—en so kyk ons self na die lewe.Die gevolg is dat ons wêreld “klein” geword het—net so groot as wat ons verstand kan begryp of ons oë ver kan sien … en dit is nie so baie ver nie.

“Ons wêreld” te klein vir God

Hierdie houding van ons het egter een vernietigende gevolg: ons het God so uit ons wêreld begin uitsluit. Ons kan God nie met die verstand verklaar of met die oog sien nie. Hy is te groot daarvoor! Omdat ons egter net glo wat ons kan verklaar of kan sien, plaas ons God so buite die wêreld of realiteit wat vir ons geloofwaardig lyk.

Ons sit wel miskien in die kerk, maar ek glo nie werklik dat God my finansiële probleem sal kan oplos nie. Ek vertrou Hom nie heelhartig vir ’n besluit wat ek moet neem nie. Dit is vir my te onseker en te onverklaarbaar. Ek wil liewer die beheer in my eie hande neem… En so word my wêreld klein omdat dit sonder God is.

Stel nou eers vas hoe “groot” of “klein” jou wêreld regtig is:

1. Vertrou jy gewoonlik vir alles blindelings op God? Wat sê jou antwoord vir jou oor jou “wêreld”
2. Hoe lyk jou gebedslewe? Bid jy byvoorbeeld met oorgawe omdat jy iets verwag?. Wat sê jou antwoord vir jou oor jou “wêreld”?

 

God is ons Vader

Ons het uit die vorige Bybelstudies gesien dat God die Vader van die Christelike gesin is. Lees weer die gedeelte oor die antieke gesin in die vorige Bybelstudie deur.

1. Wat is die funksies van die pa volgens daardie beskrywing?

1. Wat kan jy van God, die Vader, verwag veral as jy onthou dat Hy baie beter as ’n gewone pa is?

Wat ’n groot gedagte is dit om te dink dat God jou Vader is; Hy wil jou so naby aan Hom hê dat jy jou geestelike arms om Hom kan slaan, jou vrese in sy oor kan fluister, jou probleme met Hom kan bespreek, alles met die wete dat Hy HOOR en die beste laat gebeur. As ons Vader versorg en beskerm Hy ons immers!

1. Lees die vorige sin weer en word ’n minuut of wat stil terwyl jy die wonderlike gedagte oordink. Dink mooi wat dit presies vir jou beteken. Leef jy so?

 

God is liefde

As ons God wil verstaan, moet ons eers verstaan wat liefde is.

1. Wat is Goddelike liefde presies volgens 1 Joh. 4:9–10?

2. Wat is die gevolg hiervan vir jou alledaagse lewe? Byvoorbeeld: dink jy God sal sommer enigiets onnodig (pynliks) met jou laat gebeur? En indien so iets gebeur, hoe moet jy dit sien?

3. Nog ’n voorbeeld van die gevolg op Vraag 1 hierbo: Sal God jou in die steek laat? Indien iets gebeur wat jou so laat voel, hoe moet jy dit verwerk?

God het sy liefde vir jou aan die kruis bewys; sy liefde vir jou lê nie daarin dat dit net altyd met jou goed gaan volgens die manier wat jy dit sien en dat alles gebeur soos jy dit wil hê nie.

IMMERS: God se liefde is nie soos die wind wat nou waai en netnou gaan lê nie. Ons situasies mag wissel van goed na sleg, maar die bewys van liefde aan die kruis bly vas en seker deur al ons situasies heen.

WEET VERSEKER EN VOEL VERTROOS: In die geskiedenis het God sy liefde met die bloed van Jesus aan sy kinders verklaar!

God is getrou en regverdig

Is God buierig en wispelturig? Enigiemand wat iets van God af weet, sal die antwoord sommer dadelik kan gee. Nee, God is nie buierig en onvoorspelbaar nie.

Hy het wel die mag om soms die onvoorspelbare te kan doen. Kyk net hoe verslaan Hy Satan op die onwaarskynlikste plek, naamlik aan die kruis, toe Satan begin dink het dat hy ’n kans het om te wen! Soms gebruik God wel die Gideonsbende of die skaapvelletjie met die dou op.

God is nie Iemand wat sy Woord breek nie! Soos Hy Homself aan ons openbaar het, so is Hy!

Juis hierdie gedagte beklemtoon Johannes met die woorde in 1 Joh. 1:9 as hy God getrou en regverdig noem. God is getrou aan Homself en sy beloftes. Hy is alles wat ons van ’n getroue en regverdige Vader kan verwag!

Dink oor die volgende paar situasies. Verduidelik elke keer jou antwoord.

As God getrou en regverdig is, wat beteken dit vir my as

1. Ek ’n troetelsonde het waarvan ek bewus is, maar nie van ontslae wil raak nie?

2. Ek gevaar loop om my werk te verloor of gebrandmerk te word omdat ek nie oneerlik wil wees in my werk soos die baas verwag nie?

3. Ek nie meer met my huweliksmaat oor die weg kan kom nie?

4. Iets vreesliks met my gebeur, soos as ek my werk verloor of ek ’n geliefde aan die dood afstaan?

 

Skrywer: Prof Jan van der Watt

Die Eerste Brief van Johannes (5) – Jan van der Watt

Deel 1: Uit god se hart van liefde—’n kerk gebore

Hoofstuk 4: Nuwe mense, ‘n nuwe gesin

’n Gesinsaamtrek is gewoonlik ’n fees. En ’n gelukkige gesin trek gereeld saam. Maar God se gesin en gesinsaamtrek is onvergelyklik—of so moet dit wees! Vir elke gelowige.

Nie sommer net gebore en gelos nie!

Die vraag: “Wat gebeur as ek ’n Christen word?” is uit Hoofstuk 2 so beantwoord: Jy word as kind in die gesin van God gebore.

Soos geen pa sy kind sommer net so sal los nie, net so los God ook nie die gelowige maar net so nie. Hy neem die gelowige ten volle in sy gesin op met alles wat dit beteken.

Kortom, as ’n mens Johannes sou vra wat ’n gemeente presies is, sou hy gesê het dat hulle die geestelike gesin van God is. Die dinge wat van ’n gewone antieke aardse gesin waar is, is op geestelike vlak van die Goddelike gesin waar. Dit is dan ook die sleutel om te verstaan wat in 1 Johannes oor die gemeente gesê word.

Een ding moet ons egter onthou: Die antieke gesin waarmee Johannes die gemeente vergelyk, verskil baie van die moderne gesinne wat ons ken. Om dus presies te weet waarmee Johannes die gemeente vergelyk, moet ons eers verstaan hoe antieke gesinne gewerk het. (Hierdie inligting is vir feitlik al die hoofstukke wat gaan volg van groot belang—daar sal telkens hierna terug verwys word.)

Die antieke gesin

Die antieke mense het nie aan hulleself as indiwidue gedink nie, maar as groeplede. Dit was byna soos in die ou-ou dae op die plaas waar die oumas en oupas, ooms en tannies, broers en susters en so aan saam gebly en saam gewerk het. Hulle het na mekaar omgesien, mekaar gehelp en hulle goed met mekaar gedeel.

Net so het die indiwidu in die Bybelse tyd sy identiteit van sy groep gekry. As hy wou weet hoe hy moes optree, het hy vir die groeplede gevra. As daar keuses gemaak moes word, is die voordeel van die groep gesoek. Die groep se belange het altyd eerste gekom. Jou broer se belange is jou belange. “Sonde” was iets wat die belange van die groep benadeel. Die gesinslede was dus met hegte bande van lojaliteit en liefde aan mekaar verbind.

 

Die pa was die hoof van die gesin. Die gesin het opgetree volgens die tradisies van die voorouers en die pa moes daarvoor sorg. Hy was gevolglik verantwoordelik vir die dissipline van die gesin wat volgens die tradisies moes optree. Hy het egter nie die hele tyd met die sweep in die hand gestaan nie. Hy moes ook vir die gesin sorg en hulle beskerm. Die kinders moes weer in gehoorsaamheid volgens die wil van die pa optree.

Dit is in so ’n “geestelike gesin” met sy hegte bande van lojaliteit teenoor mekaar waar die weergebore mens opgeneem word.

Let op hoe Johannes die “lede” van die geestelike gesin beskryf:

• God is die Vader van die gesin: 1 Joh. 2:14, 23; en 5:1.
• Die Vader het ’n spesiale Seun: 1 Joh. 1:3; en 2:23.
• Die Vader het ook kinders: 1 Joh. 3:1, 2, 9; 4:7; en 5:1.

Die manier waarop Johannes dus oor God, Jesus en die gelowiges praat, wys duidelik dat hy die gemeente as die groot gesin van God beskryf. Daarom noem ons mekaar ook “broers” en “susters”!

Dink oor die volgende in die lig van die “gesin van God”: As ’n mede-Christen jou ’n “broer” of “suster” noem, wat sê hy daarmee vir jou oor jouself, die ander persoon en God?

1.  Almal vir een en een vir almal

’n Klomp sake kenmerk die gesin of gemeente van God en is deel van die nuwe identiteit van die gelowige. Die gelowige moet sy lewe inrig volgens hierdie kwaliteite—wat eie aan die gesin van God is.

Gemeenskap

Volgens 1 Joh. 1:3 is die doel van die verkondiging van Jesus sodat mense deel kan hê aan die gemeenskap van gelowiges.

1. Gebruik die inligting wat hierbo oor die antieke gesin verskaf is en verklaar hoe ons in dieselfde asem oor gemeenskap onder mekaar én met God kan praat (1 Joh. 1:3)

GEMEENSKAP beskryf die onderlinge verbondenheid en lojaliteit wat Christene as lede van dieselfde gesin teenoor mekaar moet hê.

’n Christen staan nooit alleen nie, maar altyd in verbondenheid en verantwoordelikheid teenoor ander gelowiges.

Nou moet dit ook waar wees van julle gemeente. Maar hoe gaan dit regtig in julle gemeente; in watter mate bestaan hierdie basiese gemeenskap tussen julle gemeentelede?

• Watter voorstelle kan jy aan die hand doen om die ervaring van die gemeenskap in die gemeente te verbeter?
• Verduidelik in jou eie woorde waarom die “bly in God” noodwendig die optrede van die mens moet beïnvloed.
• Is daar werklike gronde vir ’n Christen om te sê dat sy godsdiens sy privaat saak is? Waarom sê jy so?

 

Onderlinge verbondenheid

Johannes is lief om te sê dat God in die gelowige bly en die gelowige in God, om so die band tussen God en sy kinders uit te druk. Dit kan ook die verbondstaal van Johannes genoem word.

(i) Lees die volgende gedeeltes en maak ‘n lys van sake wat met die wedersydse verbondenheid tussen gelowiges en God te doen het:

• 1 Johannes 2:6:

• 1 Johannes 3:6:

• 1 Johannes 3:24:

• 1 Johannes 4:16:

Hierdie sake gaan almal oor die manier waarop die gelowige moet lewe.

(ii)  Verduidelik in jou eie woorde waarom die “bly in God” noodwendig die optrede van die mens moet beïnvloed.

(iii) Sou jy dink dat Johannes reg het om te sê dat as ’n mens se lewenstyl en optrede nie reg is nie, jy nie in God, oftewel in sy gesin is nie? (Vgl. 1 Joh 3:6.) Verduidelik waarom jy so sê.

 

Op die skoot van jou Vader

Kennis in die Bybel is baie meer as wat ons vandag onder “verstandelike kennis” verstaan. Om destyds te gesê het jy “ken” iemand, het beteken dat jy en daardie persoon goeie vriende was wat mekaar se persoonlikhede geken het, geweet het hoe die ander een dink en voel en wat die ander persoon in omstandighede sal verwag of doen. Om mekaar te ken, het beteken om as persone baie naby aan mekaar te beweeg.

1. Wat sê 1 Joh. 2:14 en 5:20 oor die verhouding tussen gelowiges en die Vader en Seun?

• Verduidelik in jou eie woorde wat ’n gelowige presies sê as hy of sy sê: “Ek ken God”.

Die status van die gemeentelid is om God te ken, om soos ’n kind op sy Pa se skoot te sit en met Hom te praat en alles met Hom te deel; maar ook soos ’n kind wat sy Pa bewonder en Hom ten alle koste tevrede wil stel.

1. ’n Persoonlike vraag: Ken jy God so goed dat Hy vir jou so naby is dat dit vir jou voel of jy op sy skoot sit? (Dink ’n paar oomblikke na oor hierdie verhouding van jou met jou Vader).

 

Gesonde samesyn

1. Hoe sien ek my rol in ons gemeente (sodat God “darem” ook tevrede sal wees)?

2. Watter “medisyne” kan ek aanbeveel (wat ek uit ondervinding weet werk) as ek die gemeenskap met God in my persoonlike lewe verwaarloos en begin mis.

 

 

Skrywer: Prof Jan van der Watt

Die Eerste Brief van Johannes (4) – Jan van der Watt

Deel 1: Uit God se hart van liefde—’n kerk gebore

Hoofstuk 3: Gebore in ‘n nuwe gesin

God het jou nie sommer vir niks gemaak nie. Hy het jou gemaak om waarlik te lewe! Beleef jy genoeg van hierdie lewe? Kan jy dit raaksien, dra jy die regte bril?

Die wêreld in lig en donker

’n Mens kan die wêreld op baie maniere beskryf, afhangende van watter “bril” jy opsit. Jy kan die “natuurbril” opsit of miskien die “politieke bril”.

Johannes sê dat as jy die “godsdienstige bril” opsit, (die bril waarmee God na die wêreld kyk) sien jy net lig en duisternis … dan sien jy dat die wêreld eintlik net in twee kontrasterende dele gedeel kan word. Daar is die deel wat aan God behoort en die deel wat aan die Bose behoort. Die deel wat aan God behoort, kan aan sekere eienskappe uitgeken word, terwyl die deel wat aan die Bose behoort net die teenoorgestelde eienskappe vertoon.

• Hoe praat Johannes daaroor in sy brief? Kyk in die genoemde verse hieronder watter twee kontrasterende woorde daar gebruik word om die twee “godsdienstige wêrelde” van mekaar te onderskei. Let daarop dat dit in elke geval oor spesifieke kwaliteite van die wêreld gaan.

(Maak twee kolomme in jou boek. Aan die een kant skryf jy God se wêreld en aan die ander kant die Bose se wêreld.) Hier volg die teksverse:

1 Joh. 1:5:

1 Joh. 3:14:

1 Joh. 2:21:

1 Joh. 4:20:

• Stel jou die volgende denkbeeldige situasie voor: Jy bou ‘n huis en vind uit dat die bouer sekere dinge nie gedoen het waarvoor jy betaal het nie. Na ‘n telefoonoproep belowe hy om dit te kom doen, maar niks gebeur nie. Jy gaan sien hom en vind uit dat hy ernstige finansiële probleme het.

• Sê hoe iemand wat aan God se wêreld behoort die situasie volgens die eienskappe in Vraag (1) hierbo sal hanteer?

• Sê dan hoe iemand wat aan die Bose se wêreld behoort ’n soortgelyke situasie sal hanteer?

• Sê ook waar die verskil lê. (Hiervoor gebruik ons weer twee kolomme – God se wêreld en die Bose se wêreld en teken die verskille aan.)

ONTHOU: Hierdie is God se manier waarop Hy na die wêreld kyk! As jy regtig sinvol wil leef, moet jy naby God lewe! Dit beteken om die wêreld deur sy oë te bekyk en so te lewe!

 

Hoe kom iemand in God se wêreld?

Lees Joh. 3:1–8. (Let op dat ons hier uit die Evangelie lees. Onthou ook dat die “Bybel” van daardie gemeentes die Evangelie was, soos in Hoofstuk 1 gesê is).

1. Hier word God se wêreld as ’n koninkryk beskryf. Hoe kom ’n mens in die koninkryk (3:3)?

1. Hoe verstaan Nikodemus Jesus se woorde (3:4)?

1. Verduidelik in jou eie woorde wat Jesus volgens 3:6 wil sê.

Elke mens het op presies dieselfde manier in die wêreld gekom: hy of sy is in die wêreld gebore. Omdat hy of sy gebore is, het dit vir hulle moontlik geword om in die wêreld te leef, dinge te doen, ’n gesin te hê en so aan. Sonder geboorte is hierdie “deelneem aan die wêreld” nie moontlik nie.

As Jesus nou wil verduidelik wat met ’n mens gebeur as jy ’n Christen word—met ander woorde, as jy deel van God se wêreld word—sê Hy jy word geestelik gebore. Die geboorte maak dit dan vir jou moontlik om in God se wêreld te kan leef, optree, ’n hemelse Vader te kan hê, en so aan.

Dit is egter nie ’n gewone geboorte nie. Dit is ’n geestelike geboorte. Hoe dit werk, verstaan ’n mens nie (Joh. 3:8), maar dit verhoed ’n mens nie om te weet as dit met jou gebeur nie.

En wat presies gebeur met jou? Jy is nie soos Nikodemus wat nie die boodskap van Jesus verstaan nie (Joh. 3:9–10). God gee vir jou ’n “bril” om die geestelike wêreld te verstaan—jy word op daardie golflengte ingestel. (Dit is wat dit beteken om “gees te wees”—Joh. 3:6).

Nou kan jy in Jesus van Nasaret die Seun van God raaksien.

Die kruis is nie die vernederende einde van Jesus nie, maar die plek waar Hy Satan finaal verslaan het.

Jesus se woorde is nie ydel laster nie, maar die wysheid van God.

Die boek in die Nuwe Testament waar die meeste na die geestelike geboorte verwys word, is 1 Johannes. (As jy belangstel, vergelyk 1 Joh. 2:29; 3:9; 4:7; 5:1, 4 en 18). Iemand wat geestelik gebore is, word met “kind van God” in die Nuwe Vertaling weergegee, maar in Grieks staan daar eintlik: “Uit God gebore”.

 

Geloof sluit aan by weergeboorte

Geloof sluit nóú aan by die gedagte van weergeboorte. Die een kan nie sonder die ander verstaan word nie.

As ons 1 Joh. 5:1 lees, sien ons dat elkeen wat in Jesus glo, is “uit God gebore,” hy of sy is dus weergebore. (Onthou: “kind van God” is in Grieks “uit God gebore”).

Geloof is dus om oorgegewe aan God te aanvaar wat Hy jou deur sy geestelike “bril” laat “sien” het, veral wat Jesus betref.

Kom ons kyk watter verskil dit maak om “deur die oë van God,” oftewel op ’n geestelike manier, na alles te “kyk”.

Hoe beïnvloed die perspektief waarmee ‘n mens na ‘n saak kyk die manier waarop jy daardie saak verstaan ? Vul jou gedagtes by elkeen van die sake hieronder in. Skryf eers in die linkerkolom neer hoe ‘n doodgewone mens dit sal sien – iemand wat nie weergebore is nie. Skryf dan in die regterkolom hoe iemand wat weergebore is, met ander woorde wat deur die oë van God kyk, dit sal sien. Die sake waarna jy moet kyk, is:

• Die kruis van Jesus

• Jesus self.

• Lyding

• Jou vyand

• Opoffering vir ander

’N INTERESSANTE INSIG: ’n Mens kan weet dat jy weergebore is as die wêreld met alles wat gebeur vir jou begin lyk soos God dit sou sien!

 

 Om weergebore te wees, beteken…

In 1 Johannes word daar heelwat gesê oor wat met ’n mens gebeur as jy weergebore word. Dit gaan immers oor ’n totale verandering van die manier waarop jy jouself en die lewe sien.

Kom ons kyk wat alles met die weergeboorte saamhang.

. Jy het kontak met God

Weergeboorte bring die mens in direkte kontak met God self.

1Joh 3:9 –‘n Weergebore mens (‘n kind van God) het die Gees van God in hom

1 Joh 4:7 ‘n Kind van God het ander lief en ken God.

’n Mens kan weet dat jy weergebore is as die wêreld met alles wat gebeur vir jou begin lyk soos God dit sou sien!

Dit beteken dat ’n mens in gemeenskap met die Vader—altyd in sy teenwoordigheid—kan leef (1 Joh. 1:7).

1.  Jy tree anders op

Weergeboorte verander die mens se optrede.

1. 1 Johannes 3:9, 5:4 en 18: ’n Kind van God leef nie meer ’n lewe van sonde nie.
2. 1 Johannes 4:7, 5:1: ’n Kind van God se lewe word deur liefde gekenmerk.
3. 1 Johannes 2:29: Aan ’n regverdige lewe kan die kind van God uitgeken word.

1.  God bewaar jou

Weergeboorte plaas ’n mens diep in die bewarende hand van God.

• 1 Johannes 5:18: Die Seun van God bewaar die kind van God.

• 1 Johannes 5:18: Die duiwel kry die gelowiges nie in sy greep as hy naby die Seun bly nie.

Leef bewus van jou weergeboorte

Dink na oor die volgende:

• Dink jy dat ’n mens in jouself kan weet en ervaar dat jy weergebore is? Skryf jou gedagtes neer.

• Indien jou antwoord op Vraag 1 hierbo “ja” is, verduidelik presies wat ’n mens in homself ervaar.

• Dink nou oor jou eie lewe in hierdie verband na.

• Dink jy dat ’n mens wat weergebore is, sal heeltemal onverskillig kan leef? Waarom sê jy so?

 

Die Dooie See – Coen Slabber

Reeds in Genesis 14:3 lees ons van die Soutsee. Soos met die See van Galilea staan die Dooie See bekend onder verskillende name: Die See van Araba, die Oostelike See (Esegiël 47:18). In buite-Bybelse geskrifte word daar ook verwys na Die See van Sodom, Die See van Lot en die See van Asfalt. Die Dooie See ’n meer geleë tussen Jordanië en Israel.

Die oppervlak en kuslyn is 423 meter onder seevlak; dit is 377 meter diep. Die water bevat 33,7% sout – 8,6 maal meer as die see self. Geen diere kan hier oorleef nie en daarom die benaming die Dooie See. Klein hoeveelhede bakterieë en swamme word wel in die water gekry, maar geen vis of waterplante nie. Weens die hoë digtheid van die water is dit moeilik om in die See te swem – jy kan egter heel ontspanne dryf op die water. Die See, geleë in die skeurvallei van die Jordaanrivier, is 67 km lank en 18 km breed op sy breedste punt. Die hoof invloei is uit die Jordaanrivier. Daar is geen uitvloei nie. Hier is ‘’n satellietfoto van die See van Galilea en die Dooie See. (Verskyn in Wikipedia)

 

Volgens die Bybel was dit ‘’n plek waarheen Dawid gevlug het (1 Samuel 23:29 – 24:1). Dit was ook een van die wêreld se eerste gesondheidsoorde – vir Herodes die Grote. Die hele jaar skyn die son en is dit droog – minder as 100 mm reënval per jaar. Een van die belangrike produkte wat hier verkry word, is asfalt. Dit is veral deur die Egiptenare vir mummifisering gebruik.

Net noord van die Dooie See is Jerigo geleë. Waarskynlik aan die suid-oostelike kus van die Dooie See was Sodom en Gomorra geleë en die stede waarvan ons in Deuteronomium 29:23 lees – Adma en Sebojim. Soar is gespaar, want Lot het uit Sodom daarheen gevlug. Nog ’n belangrik dorp was Machaerus waar, volgens Josefus, Johannes die Doper aangehou en vermoor is. Masada was waarskynlik die bekendste van hierdie dorpe. Hier het ’n klein groepie Jode die mag van die Romeinse leërs van 70 – 73 uitgehou.

Esseners het hulle aan die weskus van die Dooie See gevestig. Of hulle en die Koemraan-gemeenskap dieselfde mense was, is onseker. In grotte naby waar hulle gewoon het, is die Dooie See-rolle gekry.

In Esegiël 47:8 – 9 lees ons ’n interessante profesie: Wanneer dit (die water in die Jordaanvallei) in die Dooie See inloop, sal die water van die Dooie See vars word. Waar die stroom ook kom, sal dit wemel van al die soorte diere en sal daar baie vis wees. Ons kry ’n soortgelyke profesie in Sagaria 14:8.

Wat baie interessant is, is dat die Nuwe Testament geen melding van die Dooie See maak nie.

 

Skrywer: Dr Coen Slabber