Fall in love with Jesus, stay in love with Jesus and that will decide everything – Pedro Arrupe

My identiteit (2)

Ek gaan ‘n aantal blogs aan Tim Keller se nuwe boek Making Sense of God: An Invitation to the Skeptical spandeer. Hy wys dat die Christelike geloof in alle opsigte – emosioneel, kultureel en rasioneel – meer sin maak as die siening van ons moderne wêreld.

Identiteitsvorming in ons moderne kultuur is nie sonder sy probleme nie. Kom ons kyk na ‘n paar.

1. Moderne identiteit is onsamehangend

As jy in jou hart kyk om jou diepste begeertes te vind, gaan jy baie van hulle kry. Jy gaan nog iets ontdek – van hulle weerspreek mekaar. Nie alleen is ons begeertes teenstrydig nie, maar hulle is ook ontwykend en verander voortdurend. Daarom is die tradisionele manier om jou identiteit te vorm deur met iets solied buite jouself te verbind die korrekte een.

2. Moderne identiteit is bedrieglik – ‘n illusie

Ons kultuur sê vir ons dat ons in onsself moet kyk en so ons begeertes en drome ontdek. Jy moet dit self doen en nie na iemand van buite kyk om dit te bevestig nie. Moenie na standaarde van buite kyk nie; jy self bepaal jou eie betekenis. Dit is onmoontlik. Jou identiteit moet tot ‘n groot mate van ander kom. Ons het iemand van buite nodig om te sê dat ons waardevol is. Die mens is ‘n sosiale wese. Ons moet eers buite onsself kyk en met iets verbind voordat ons in onsself kan kyk en ‘n beoordeling maak. Dit is ‘n illusie om te dink dat jou identiteit slegs ‘n uitdrukking van jou innerlike begeertes en gevoelens is. Jy mag baie gevoelens hê, maar dit beteken nie dat jy aan almal uitdrukking kan gee nie. Ons gebruik ‘n filter om te besluit watter ons in ons identiteit gaan insluit. Waar kry ons hierdie filter? By mense wat ons vertrou. Ons moet ons oortuigings van iewers kry. Meestal tel ons dit onbewus by ons kultuur of gemeenskap op. Ons kan nie ‘n identiteit ontdek of skep in isolasie nie Ons kry dit deur ‘n dialoog met die morele waardes en oortuiging van ons gemeenskap.

3. Moderne identiteit is vernietigend

Die oënskynlike vryheid van  wêreldse identiteit bring ‘n neerdrukkende las vir ons. Moderne mense sien dit as ‘n verleentheid om getrou en nie suksesvol te wees nie. Sukses of mislukking word as slegs die individu se verantwoordelikheid gesien. Daarom moet ons onsself bevorder. Hierdie selfgemaakte identiteit wat op ons prestasies berus, veroorsaak dat ons selfwaarde meer breekbaar is as gevolg van mislukking.

4. Moderne identiteit veroorsaak breuke

In tradisionele kulture is ons belangrikste verhoudings belangriker as individuele selfbelang, want ons identiteit hang daarvan  af of ons die verhouding eer. In ons moderne kultuur is ons belangriker as enige sosiale band. As jy tevrede is met die verhouding, hou jy dit net so lank as dit jou tevrede hou. Onvoorwaardelike verhoudings wat veronderstel is om lewenslank te hou, maak dus nie sin nie. Gemeenskappe word nou sosiale netwerke – mense verbind met mense soos hulleself op ‘n verbygaande basis. Ons sien dit in huweliks- en familiebande wat vandag selde lank hou.

Maar as die moderne identiteit soveel probleme skep, wat is dan die alternatief? Daarna kyk ons volgende keer.

Dag 10: As die wonder van die goeie nuus alles anders stil maak.

Die Billy Graham Center for Evangelism het ‘n aantal leraars gekry om vir 25-dae stukkies te skryf vir Advent. Ons gaan oor die volgende 25 dae elke dag een van hierdie stukkies plaas.

[Advent word gewoonlik toegepas op die vier weke voor Kersfees. Latyn: ad – na + venire – kom. Dit dui dus op die naderende koms van Christus – sy eerste en tweede koms.]

Advent (advenrus = aankoms in Latyn) is die eerste seisoen van die kerkjaar. Dit lei tot Kersfees en sluit die voorafgaande vier Sondae in. Klem val op wag. Soos ons as gelowiges wag vir sy wederkoms, maar ook soos ons Jesus se geboorte in herinnering roep, wag ons in afwagting vir die wonder wat Christus gaan bring: hoop vir die wêreld. Soos hierdie storie ontvou, wag ons vir die hoogtepunt: Moenie bang wees nie, want kyk ek bring vir julle ‘n goeie tyding van groot blydskap wat vir die hele volk bestem is. Vandag is daar vir julle in die stad van Dawid die Verlosser gebore, Christus die Here (Lukas 2:10 – 11).

Jesus bring vir ons die goeie tyding. Die hoop van die wêreld rus in hierdie kindjie, Jesus. Hierdie nuus is so oorweldigend dat die engele uit die hemele in lofprysing uitbars – hulle vertel van die wonder wat gebeur het. Die afwagting van Advent is dat Jesus gekom het en weer sal kom. Hy is die hoop van die wêreld – niks kan met Hom vergelyk word nie.

Advent is vir ons ‘n wonderlike aansporing, maar ook ‘n unieke geleentheid om hierdie goeie tyding met almal om ons te deel. As ons Jesus se koms vier en verlang vir sy terugkeer, wat is ons storie? Wat inspireer jou so baie dat jy hierdie storie met die wêreld moet deel? Ons het hierdie goeie tyding wat die engele in lof laat uitbars. Dra hierde goeie tyding hierdie jaar uit.

Daar was skaapwagters  in daardie omgewing wat in die oop veld gebly en in die nag oor hulle skape wag gehou het. Meteens staan daar ‘n engel van die Here by hulle, en die heerlikheid van die Here het rondom hulle geskyn. Hulle het baie groot geskrik.         Toe sê die engel vir hulle: “Moenie bang wees nie, want kyk, ek bring vir julle ‘n goeie tyding van groot blydskap wat vir die hele volk bestem is (Lukas 2:8 – 10).

Most of us go through life worrying people will think too little of us. Paul worried people would think too much of him. —D.A. Carson

My identiteit (1)

Ek gaan ‘n aantal blogs aan Tim Keller se nuwe boek Making Sense of God: An Invitation to the Skeptical spandeer. Hy wys dat die Christelike geloof in alle opsigte – emosioneel, kultureel en rasioneel – meer sin maak as die siening van ons moderne wêreld.

Ons het reeds na dinge soos betekenis, tevredenheid en vryheid gekyk waarsonder die mens nie kan lewe nie. Ons kom nou by nog so ‘n item: identiteit. Dit is die antwoord op die vraag: Wie is ek? Wat is jou identiteit? Dit bestaan uit ten minste twee dinge:

• ‘n Sin van jouself. Jy is lid van ‘n familie, ‘n vriend, ‘n kollega by die werk, ens. Om ‘n identiteit te hê is om iets te hé wat waar is van jouself op elke terrein. Wat van jou verander nie van plek tot plek nie?
• ‘n Sin van waarde – ‘n bepaling van jou eie waarde. Selfkennis is een ding, maar selfagting is iets anders. Dit is een ding om te weet hoe jy is; dit is ‘n ander ding om dit te waardeer. Wat omtrent jouself laat jou voel jou lewe is sinvol en die moeite werd.

Identiteitsvorming is ‘n proses wat elke kultuur op sy lede afdruk – kragtig maar tog onsigbaar. In die moderne kultuur word aanvaar dat elke persoon ‘n kern van gevoelens en intuïsie het wat uitgedruk moet word. Die moderne samelewing glo dat ons onsself kan ontwikkel net deur na binne te kyk – ons moet ons eie keuses maak en self bepaal wie ons is. Jy moet jouself bevestig, want jy doen wat jy graag wil doen. Wees wie jy wil wees en dit maak nie saak wat ander mense dink nie.

In tradisionele kulture is die narratief selfopoffering – jou selfwaarde word bepaal deur die gemeenskap waarin jy sekere verantwoordelikhede het. In die moderne kultuur is die narratief selfgelding – jy is jou drome en begeertes. Ons moet ons van die gemeenskap losmaak om ons identiteit te ontdek. Die bron met wie ons moet verbind, is nou binne in onsself.

Maar identiteitsvorming in die moderne kultuur is nie sonder sy probleme nie. Daarna gaan ons in die volgende blog kyk.

A proud man is always looking down on things and people, and, of course, as long as you’re looking down, you can’t see something that’s above you – C. S. Lewis

Die skaapwagters

As jy vandag na Kersfees sou kyk, wat sou jy dink is die doel daarvan? As jy na al die aktiwiteite en voorbereidings kyk, mag jy dalk dink Kersfees gaan oor partytjies, Kersvader, geskenke en versierings. Sou jy vir een oomblik gedink het dit het iets met godsdiens te doen? Waarskynlik nie. Meeste mense weet dat Kersfees ‘n godsdienstige verbintenis het, maar die fokus is op kultutele tradisies en nie die geestelike betekenis van Kersfees nie.

Maar wat van ons as gelowiges? Hoeveel tyd spandeer ons om na te dink en bly te wees oor die wonder van God wat na die wêreld gekom het? Kom ons kyk weer na daardie toneel waar die eerste boodskap van Kersfees gegee is (Lukas 2:12 – 20). Dit lyk nou nie vir ons soos wat Kersfees behoort te lyk nie – geen bome en liggies nie. Daar is net ‘n groep skaapwagters wat oor hulle skape die wag gehou het. Hulle was nie belangrik of invloedryk of magtig nie. Die Jode het hulle as vuil en van ‘n laer sosiale klas gesien. Tog kies God juis vir hulle om die belangrikste geboorteaankondiging in die geskiedenis van die wêreld te verkondig. Wat was hierdie boodskap wat die wêreld so radikaal verander het?

1. Dit was ‘n boodskap uit die hemel

Meteens staan daar ‘n engel van die Here by hulle, en die heerlikheid van die Here het rondom hulle geskyn. Hulle het baie groot geskrik (2:9). As God ‘n boodskap vir sy mense gehad het, het Hy gewoonlik ‘n profeet gestuur. Hierdie gebeurtenis was so belangrik dat Hy sy boodskap direk uit die hemel met ‘n engel gestuur het. Die heerlikheid van God was sigbaar – dit het rondom hulle geskyn. Dit is ‘n bewys dat die boodskap uit die hemel uit kom.

2. Die boodskap van die engel was ‘n universele boodskap

Ek bring vir julle ‘n goeie tyding van groot blydskap wat vir die hele volk bestem is. Vandag is daar vir julle in die stad van Dawid die Verlosser gebore, Christus die Here! (2:10 – 11). [Die King James verwys na all people en nie na die hele volk nie. Die NIV na all the people.] Hierdie is dus goeie nuus vir alle mense van alle tye. Hierdie baba gaan die verlossingspad vir alle mense oopmaak. Let wel die engel gebruik drie titels vir hierdie baba:

• Verlosser – anders as vorige aanspraakmakers op hierdie titel was Hy werklik die ware Verlosser.
• Christus – die Gesalfde, die langverwagte Messias. Uiteindelik het Hy gekom.
• Here – hierdie baba was Goddelik. Die skaapwagter moes die verbinding gemaak het, want die Jode het hierdie titel aan God gegee.

3. Die boodskap van die engel kondig vrede aan

Skielik was daar saam met die engel ‘n menigte engele uit die hemel wat God prys en sê: “Eer aan God in die hoogste hemel, en vrede op aarde vir die mense in wie Hy ‘n welbehae het (2:13 – 14). Vanuit ‘n Joodse perspektief sou vrede net moontlik wees as die Messias die Romeine oorwin het. Maar politieke vrede is nie wat die engel in gedagte gehad het nie. Daardie soort vrede kom eers as Jesus Christus weer kom en oor die aarde heers. Daar is drie soorte vrede wat Christus se lewe, dood en opstanding moontlik maak:

• Omdat ons van God vervreem is deur die sonde bring Jesus se versoenende dood ons terug na vrede met God.
• As ons Hom deur geloof aanvaar het, gee Hy aan ons die interne vrede. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus (Filippense 4:70.
• Deur God se inwonende Gees het ons ook vrede met ander mense. Hierdie vrede is vir almal wat Jesus Christus as Verlosser ontvang, want hulle is die mense in wie Hy ‘n welbehae het.

‘

4. Hierdie boodskap moet gedeel word

Toe hulle Hom sien, het hulle vertel wat oor hierdie Kindjie aan hulle gesê is Almal wat dit gehoor het, was verwonderd oor wat die skaapwagters hulle vertel het (17 – 18). Hierdie was nie ‘n aankondiging wat hulle vir hulleself kon hou nie – die hoop van die mensdom lê in daardie krip.

Dit is vandag steeds waar. Jesus is die enigste Een wat ons kan red. So baie mense moet hoor waarom Hy aarde toe gekom het. Ons wat die boodskap gehoor en aanvaar het, het die verantwoordelikheid om ander daarvan te vertel – daar is geen beter geleentheid as juis op Kersdag nie. Ons kultuur het die ware betekenis van Kersfees vergeet. Daarom is dit die ideale geleentheid om God se Seun in die feesvierings terug te bring.