“Once abolish the God, and the government becomes the God.” – G. K. Chesterton

‘n Belangrike hulpbron vir uitreike

Lee Strobel, die bekend skrywer, sê dat daar in elke gemeente baie evangelistiese potensiaal is – en tog gebruik ons hulle selde. Hulle raak gefrustreer. Wie is hulle? Die Christelike eggenotes van mans wat nie glo nie. Thom Rainer bevind in sy navorsing dat die vrou die belangrikste verhouding is om mans wat nie glo nie, te bereik. In een-derde van gevalle sê mans dat hulle eggenotes die belangrikste faktor was om hulle weer in die kerk te kry.

Hoekom het gemeentes nie ‘n benadering om hierdie eggenotes te bemoedig en op te lei nie? Maar wat nou van 2 Korintiërs 6:14: Moenie met ongelowiges in dieselfde juk trek nie? Hierdie is ‘n waarskuwing van Paulus dat Christene baie versigtig moet wees om met ongelowiges te trou. As dit egter gebeur, moet gemeentes alles moontlik doen om die Christen eggenote by te staan.

Petrus skryf ook hieroor: As daar van julle is met mans wat nie die woord van God glo nie, en die mans sien hoe godvresend julle is en hoe voorbeeldig julle julle gedra, sal hulle vir Christus gewen kan word deur die gedrag van hulle vrouens. Dit sal nie eens vir hulle nodig wees om ‘n woord te sê nie (1 Petrus 3:1 – 2).

Hoeveel sulke paartjies is daar in julle gemeente? Waarskynlik ‘n klompie. Wat doen die gemeente om voordeel te trek uit hierdie unieke vermoë van vroue om hulle maats te beïnvloed? Hierdie is ‘n kragtige manier van uitreik. Gebruik dit.

Lee Strobel en sy vrou, Leslie, het ‘n boek hieroor geskryf: Surviving a Spiritual Mismatch in Marriage om Christene op te lei om doeltreffend uit te reik na hulle maats wat nie glo nie.

Geestelik

So verklaar ons geestelike dinge aan mense wat die Gees het (1 Korintiërs 2:13). Geestelik is vandag ‘n baie gewilde woord – ook in Paulus se dae was dit so. Hulle het ook geestelikheid begeer. Maar nie alles geestelik is waarlik geestelik nie.

As ons die woord geestelik hoor, kom sekere beelde in ons gedagtes op. Jy dink aan iemand wat stil en nadenkend is; jy dink aan iemand met sy hande omhoog tydens aanbidding. In ons dae beteken geestelik om vaagweg belang te stel in die bonatuurlike. Jy beoefen ook die praktyke soos gebed en meditasie. John Edwards noem hierdie dinge “nie-tekens.” Hulle bewys niks na enige kant toe nie. Dit is nie sleg om na te dink of jou hande op te steek in aanbidding nie; daar is niks mee verkeerd om belang te stel in gebed, wondertekens of ‘n hoër mag nie. Volgens Paulus is hierdie dinge nie geestelik nie.

Die geestelike persoon verstaan geestelike waarhede – hy ontvang wat die Gees oordra. Andersom: Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin. Hy kan dit ook nie verstaan nie, omdat dit geestelik beoordeel moet word (2:14). Paulus onderskei hier tussen twee kategorieë mense: geestelike mense wat geestelike dinge aanvaar en “ongeestelike” mense wat nie geestelike dinge aanvaar nie. Wat ‘n mens geestelik maak, is die aanvaarding van geestelike dinge.

Wat is hierdie geestelike dinge waaraan Paulus dink? Kom ons kyk na die konteks. Paulus het pas verduidelik dat die boodskap van die kruis onsin is vir diegene wat verlore gaan (1:18). Sy prediking lyk ook nie soos wysheid vir die slim mense nie. Maar: Ek het my voorgeneem om met julle oor niks anders te praat nie as oor Jesus die Christus, en wel oor Hom as die gekruisigde (2:2). Baie mense sien hierdie boodskap as dwaas, maar Paulus sê dit is wysheid, maar net vir dié wat daarvoor ryp is (2:6).  Die heersers van die wêreld verstaan dit nie, maar in werklikheid is die boodskap van die kruis die wysheid van God, die verborge waarheid wat bedek was en wat God van ewigheid af vir ons voorbestem het tot ons ewige heerlikheid (2:7). Die geestelike dinge verwys na die verkondiging van die evangelie soos deur die Gees geopenbaar en aan Paulus en sy mense toevertrou is.

Die geestelike persoon is dus die persoon wat die boodskap van die kruis aanvaar. Ons is net geestelik as die Gees aan ons die vermoë gegee het om die goeie nuus aangaande Jesus Christus se dood en opstanding te aanvaar. Maak nie saak of jy van engele hou of hoe baie jy bid nie of hoe dikwels jy nadink nie of hoeveel jy in wonderwerke glo nie, as jy nie die kruis aanvaar nie, is jy nie ‘n geestelike persoon nie. Die geestelike persoon onderskei geestelike dinge beginnende by die offer van Christus aan die kruis vir mense soos ons. As ek die boodskap van die kruis verwerp, verwerp ek ook die Gees se werk om dinge vir ons te openbaar. Dan is ons nie geestelik nie.

“Human beings by their very nature are worshipers. Worship is not something we do; it defines who we are. You cannot divide human beings into those who worship and those who don’t. Everybody worships; it’s just a matter of what, or whom, we serve.” ― Paul David Tripp

Bonhoeffer (12)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Jesus se volgelinge word opgeroep om vredemakers te wees. Toe Jesus hulle geroep het, het hulle vrede gevind. Hulle het nie alleen vrede nie … hulle moet ook vrede maak. Daarom moet hulle geweld en stryd afsweer. Hierdie dinge bevorder nie Jesus Christus se saak nie. God se koninkryk is ‘n ryk van vrede waarin die mense mekaar met ‘n vredesgroet groet. Jesus se dissipels bewaar die vrede deurdat hulle kies om self te ly sodat ander nie hoef te ly nie. Hulle bly stil ten spyte van haat en ongeregtigheid wat op hulle gerig is. Dit is hoe hulle die bose met die goeie oorwin. Dit hoe hulle vredemakers is in ‘n wêreld vol haat en oorlog.

Bonhoeffer gee weer twee Bybelgedeeltes om ons te help:

• Geseënd is die vredemakers, want hulle sal kinders van God genoem word (Matteus 5:9)
• As iemand die lewe liefhet en ‘n lang lewe begeer om die goeie te geniet, moet hy sy tong weerhou van kwaadpraat en sy lippe van leuens. Bly weg van die kwaad af en doen wat goed is, soek vrede en jaag dit na (Psalm 34:13 – 15).

Dink net aan die impak wat gelowiges en kerke op ‘n wêreld vol oorlog en stryd sou hê as hulle weer vredemakers word. Geweld bevorder nooit die saak van God se koninkryk nie. Daarom moet ons vir al die politici en regeringsleiers bid dat hulle vredemakers sal wees.

God van vrede, U gee aan my vrede – leer my om ‘n vredemaker te wees. Amen.

“If there were no God, there would be no atheists.” – G. K. Chesterton

 Jesus offer sy liggaam op

Henri Nouwen was ‘n bekende akademikus. Hy het onder ander poste by Harvard en Yale beklee. Hy verlaat die akademiese lewe om in die L’Arche-gemeenskap naby Toronto te gaan bly. Hier woon fisies normale en mense met fisiese gestremdhede saam – hulle deel hulle lewens. In sy boek, Road to Daybreak, vertel hy hoe hy as akademikus kosbare lesse geleer het by diegene met gestremdhede: “When I look critically at my life I give some of my money, some of my time, some of my energy, and some of my thoughts to God and others, but enough money, time, energy, and thoughts always remain to maintain my own security. Thus I never really give God a chance to show me his boundless love.“

In sy bediening van drie jaar op aarde het Jesus gewys wat dit beteken om jou volkome aan God en ander te gee. Hy leer: So sal die laastes eerste wees, en die eerstes laaste (Matteus 20:16); Hy wat sy lewe wil behou, sal dit verloor; en hy wat sy lewe ter wille van My verloor, sal dit vind (Matteus 10:39).

Jesus beloof nie wêreldse sekuriteit nie. Wat Hy wel sê, is dat diegene wat Hom wil volg, bereid moet wees om op te offer – selfs hulle eie lewens. Ons sê ons wil saam met Jesus loop, maar intussen klou ons vas aan dinge wat ons glo ons sekuriteit sal waarborg. Omdat ons nie ons greep op hierdie dinge los nie, ondervind ons nie die Vader se grenslose liefde nie.

Jesus vra van ons om ons tyd en energie en hulpbronne vir sy Naam en heerlikheid op te offer.