Laat sy Liefde jou Lei: Wees jy die een wat uitreik – Milanie Vosloo

Wees jý die een wat uitreik!

Mag ons Here Jesus Christus se onverdiende goedheid julle geestelik versterk. Filippense 4:23

Vriende van Christus is mense wie se harte warm vir Hom klop. Dis mense wat iets van sy grootheid en genade tasbaar in hul lewens ervaar het en wat daarom ‘n passie vir Hom het.

Daarom is dit ook vir hulle lekker om tussen ander gelowiges te wees en die gerusstelling van geestelike kameraadskap te ervaar. Ek en jy kan deur net ‘n paar dinge te doen, ‘n aktiewe rol speel in die versterking van die gemeenskap van gelowiges:

• Bid vír ander. Ons kan deurentyd vir die geloofsfamilie – hulle wat ons ken én die wat ons nie eens ken nie – bid. Ons Vader hoor mos elke gebed van sy opregte kinders. Verál ook dié wat ons vir mekaar bid.
• Bid sáám met ander. Gelowiges het mekaar se gebedsondersteuning en bevestiging so nodig. Die blote feit dat ons saam kan hande vat wanneer ons voor sy troon staan, is outomaties vir almal geloofsversterkend.
• Reik uit na ander. Mede-gelowiges het mekaar se liefde en omgee nodig. Ja, ook in jou kring is daar mense wat voel dat hulle die stryd alleen stry. En wie weet, dalk is jy die een wat ‘n wonderlike verskil kan maak in daardie enkel-gelowige se lewe.

Moenie wag dat ander gelowiges jóú hand neem nie. Wees jy die Christus-vriend wat ander versterk en ondersteun met jou toegewyde gebede en onvoorwaardelike liefde.

Vader, wys aan my hoe ek ‘n vriend-in-U vir ander kan wees. 

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

 Skrywer: Milanie Vosloo

Laat sy Liefde jou Lei: Waarheen gaan jy onder druk? – Milanie Vosloo

Waarheen gaan jy onder druk?

Maar Jesus sê vir hulle: “Waarom is julle so verskrik? Is julle geloof dan regtig so klein?” Daarna het Hy opgestaan, die wind en die see streng aangespreek en daar het ‘n groot kalmte gekom. Matteus 8:26

Soms plaas die lewe ons onder geweldige druk. Ons moet dalk meer doen as waartoe ons in staat is, ons moet ‘n pad loop waarvoor ons nie kans nie of ons moet dalk selfs vir ons lewe vlug. Soos Saddam Hoessein en Martin Luther al moes doen. Albei van hulle moes op ‘n stadium vir die twee magtigste leiers van hul tyd, gaan wegkruip. Toe Saddam vir George Bush en Tony Blair vlug, gaan kruip hy in ‘n rioolpyp weg. Daarteenoor lees ons hoe Martin Luther, in ‘n tyd toe die pous en keiser hom agtervolg het, in ‘n kasteel gaan werk. Daar, terwyl sy lewe bedreig word, besluit hy om die Nuwe Testament in Duits te vertaal.

Hoe ironies dat die vlugteling wat sonder die Here leef, in sy krisistyd net verder in die moeras afsak terwyl die kind van God net nog stérker op sy pos staan.

Onthou dat, watter druk jy ook al ervaar, jy as gesalfde van die Here, nooit alleen is nie. In jou grootste nood is God se genade sterker as ooit. Daar waar jy nie meer kan nie, sal Hy die pad vir jou oop maak en wanneer jy val, is sy hand reeds onder jou. 

Here van die Heelal, maak die storms in my stil en lei my asseblief na stille waters.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

 Skrywer: Milanie Vosloo

Laat sy Liefde jou Lei: Jou spanmaats het jou nodig – Milanie Vosloo

Jou spanmaats het jóú nodig

Versterk daarom daardie hande wat slap geword het en die knieё wat knak, en laat julle voete reguit vorentoe hardloop. Dan sal die beseerde voete nie ingee nie, maar eerder gesond word. Hebreёrs 12:12

Hoe meer ons dink dat ons uniek is, hoe meer kom ons agter dat daar ‘n duisend ooreenkomste tussen ons as mense is. Dit maak nie saak hóé vol selfvertroue iemand lyk nie, diep binne in hom/haar lê daar ook maar ‘n stukkie vrees, onsekerheid, twyfel en ‘n paar bondels wegsteek-bagasie.

Met kinders van God is dit niks anders nie. Elkeen van ons ervaar – ongeag die diepte van ons geloof – tye waarin ons ver van God voel, onseker is oor sy liefde is en skaam is oor ons eie sonde-swakheid. Juis daarom het ons as gelowiges mekaar so nodig. Ons kan bloot deur ons eie skanse te laat sak vir ander sê: “Dis okay. Ek verstaan. Ek weet hoe jy voel, want ek het ook al geloofskrisisse en sondeskuld ervaar. Maar … ek is daar vir jou. Ek is daar om na jou te luister, jou moed in te praat of sommer net vir jou te bid.”  

Dalk is daar mense in jou kring wat smag na begrip, na iemand wat sommer net bereid is om hul hart se roep te hoor. En miskien is jý juis die een wat die wêreldse verskil aan jou spanmaat se lewe kan maak.

Mag die Gees jou sensiteer om jou geloofsmaats se hande … en harte hoog te hou.

Maak my hart oop vir ander se broosheid, Vader.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

 Skrywer: Milanie Vosloo

Laat sy Liefde jou Lei: Sê in die storm: Ek glo! – Milanie Vosloo

Sê in die storm: Ek gló!

Tog was dit ons swakhede wat hy gedra het. Hy het swaar gedra aan ons pyn. Jesaja 53:4a

Soms ruk lewensomstandighede ernstig aan ons geloofsbootjies. Veral wanneer daar slegte dinge met goeie mense gebeur wat glad nie sin maak nie. Dan is dit nie vreemd om te hoor dat mense voel of hulle geloofsoortuigings wil sink nie.

Sulke tye moet ons onthou: Ons is nie God nie. Daarom sál ons sy weё nooit kan verstaan nie. Die feit dat Hy God en ons mens is, beteken egter dat ons nie hóéf te verstaan nie! Ons kan egter altyd vashou aan die volgende waarhede:

• God se hart is saam met ons s’n seer oor enige vorm van onreg, wreedheid en verwoesting. Hy het elke mens op aarde so lief dat Hy sy lewe gegee het. Waarom sal Hy dan genoegdoening uit ons pyn kry?
• Die stukkend van hierdie wêreld kan nie voor God se deur gelê word nie. Dis Satan wat elke greintjie skoonheid en volmaaktheid probeer afbreek. En as gevolg van die sonde wat hy skep, leef ons, tot en met die wederkoms, in ‘n gebroke wêreld.
• Om God te ken, waarborg nie aan ons ‘n uitgesonderde pynlose en immer-gelukkige lewe nie, máár kinders van God kry midde in hulle ergste pyn troos in die wete dat God se genade in alle omstandighede vir hulle genoeg sal wees.

Glo vandag – ondanks alles – dat jou God steeds in beheer is.

Redder van my lewe, help my om te glo … en te wéét: U blý die God van liefde!

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za 

 Skrywer: Milanie Vosloo