MATTEUS SE VERHAAL OOR JESUS (6) – Jan van der Watt

3.7 Matt 13: Koninkryksgelykenisse

Die verhaal het nou in ‘n groot mate sy gang gegaan. Jesus is gebore… hy is vir sy openbare bediening gesalf en het sy vyand ontmoet. Hy kies toe vir hom dissipels en begin oral preek en wonders doen – ons het mooi gesien wat hy gepreek het (Bergpredikasie) en watter wonders hy gedoen het. Toe stuur hy sy dissipels om dit aan almal te gaan vertel. Hulle het dit gedoen en die reaksies was wisselend. Elkeen, ook jou reaksie tel….

Hoofstuk 13 vorm die middelpunt van die Evangelie. Hier vertel Matteus ons wat presies die koninkryk van God (die hemele) is wat Jesus bring. Wat is dit en hoe werk dit? Weer bring Matteus vir ons ‘n klomp van die verhale (gelykenisse) bymekaar wat Jesus verkondig het. Elke gelykenis vertel ‘n storie. Al hierdie klein stories saam vertel weer ‘n groter storie.

Gaan nou Mat 13 deur en lys die verhale/gelykenisse wat vertel word. Sê in elke geval wat jy dink die gelykenis beteken. As jy al die betekenisse gelys het, kyk of jy kan sien wat die verhaal van die gelykenisse saam is……………………………………………………………………………..

……………………………………………………………………………………………………………………………….

Miskien het jy by min of meer die volgende uitgekom:

Kyk of jy die gelykenisse met die volgende uiteensetting kan verbind:

Die saaier (verkondiger) verkondig die woord, wat nie deur almal op dieselfde wyse ontvang word nie (dit is ook die boodskap van die Evangelie tot nou toe, het ons gesien). Die Christene, wat die evangelie aanvaar het, word egter nie uit die wêreld weggeneem nie, maar leef saam met die ongelowiges in die wêreld tot met die finale oordeel. Die koninkryk begin ook nie groot nie, maar die inherente krag van die koninkryk is so groot dat dit oor die hele wêreld sal groei. Daarom is dit die heel kosbaarste skat wat jy kan soek en kry. Jy moet alles wat jy het daarvoor opoffer. Aan die einde, met die finale oordeel, sal die Christene van die nie-Christene geskei word. Dan sal die beloning kom.

 4 Die res van die Evangelie

Jy het nou heelwat kennis oor hoe Matteus skryf. Gaan nou die res van die Evangelie op jou eie deur (of lees dit ten minste net deur). Jy sal sommer baie skatte kry. Kyk veral na die gedeeltes oor wat mens moet doen voor die wederkoms (jy moet wakker wees) en ook hoe die wederkoms beskryf word. (Hoofstukke 24-25). 

Skrywer: Prof Jan van der Watt

MATTEUS SE VERHAAL OOR JESUS (5) – Jan van der Watt

3.4  Matt 10: Jesus stuur die 12 uit en berei hulle voor.

Volgens Matteus weet die wêreld nou wat Jesus se boodskap is, en Jesus het wys dat Hy betroubaar is en van God af kom deur die wonders wat Hy gedoen het. Nou weet sy dissipels genoeg en is hulle reg om die boodskap verder te gaan verkondig.

In hoofstuk 10 stuur Jesus sy dissipels dus uit. Soos in die geval van hoofstukke 8-9 help Matteus ons ook hier om sommer ‘‘n klomp inligting oor sendingwerk hier bymekaar te bring.

Lees hoofstuk 10 en skryf al die ‘eienskappe’ van sendingwerk wat jy hier sien neer………….. ………………………………………………………………………………………………………………………..

3.5 Matt 11: Reaksies op die boodskap van die dissipels

Die dissipels het toe gaan preek en nou wonder ‘n mens hoe suksesvol hulle was – die reaksies was egter verskillend. Weer stel Matteus ons nie teleur nie. Hy versamel vir ons van die reaksies op Jesus se boodskap in hoofstuk 11.

Lees Hoofstuk 11 en maak ‘n lys van al die reaksies op die boodskap van Jesus wat Matteus daar vir ons beskryf……………………………………………………………………………………………………

………………………………………………………………………………………………………………………..

3.6 Matt 12: Aan wie behoort jy?

In hoofstuk 12 word dit al hoe meer persoonlik…

• Daar is eers die konfrontasie oor die Sabbat, wat eintlik ‘n konfrontasie is met Jode wat dink dat om die Sabbatswette presies te hou soos dit in die Jodedom verstaan word, noodsaaklik is om God se kind te wees. Jesus is nie so nie. Hy is die Heer van die Sabbat – dit is belangriker om hom te dien as om wette te probeer navolg. Hier sien ons dus hoe Jesus wetsgodsdiens na verhoudingsgodsdiens verskuif.
• Dan is daar die konfrontasie met die mense wat dink Jesus is van die duiwel… Lees 12: 22-31. Wat is die hoofprobleem hier en hoe word dit opgelos?……………………..

………………………………………………………………………………………………………………….. Lees nou 12:33-36 en 43-44 en sê hoe dit inpas by hierdie konteks.

• Hf 12 eindig met ‘n belangrike opmerking rondom die vraag aan wie jy behoort: in 12:46-49 word Jesus se ware familie beskryf – nie sy fisiese familie nie, maar almal wat hom navolg is sy familie, God se familie. Jy kan dus ook deel daarvan wees.

In die laaste bespreking van Matteus gaan ons na die gelykenisse van die koninkryk kyk.

Skrywer: Prof Jan van der Watt

MATTEUS SE VERHAAL OOR JESUS (4) – Jan van der Watt

Deel 2: Die boodskap van Matteus

3.3 Jesus begin preek en werk

Nou lees ons iets belangriks wat ons sommer baie van Matteus se Evangelie leer:

Vergelyk Mat 4:23 met 9:35 Wat val jou op?Kyk nou waaroor gaan hoofstukke 5-7 en 8-9 respektiewelik. Kan jy enige verband sien tussen wat in hoofstukke 5-7/8-9 gebeur en wat in die verse staan wat jy gelees het?………………………………………………………………………………..

………………………………………………………………………………………………………………………….

Mat 4:23 en 9:35 ‘omraam’ hoofstukke 5-9. Die twee verse sê dieselfde: Jesus het gepreek en Jesus het wonders gedoen. As ons nou na hoofstukke 5-7 kyk, is dit die Bergpredikasie – een lang preek van Jesus, terwyl in hoofstukke 8-9 die wonders van Jesus in ‘n ry bespreek word. Wat in hoofstukke 5-9 staan illustreer dus hoe Jesus gepreek het en wat se wonders hy gedoen het.

3.3.1 Matt 5-7: Die Bergpredikasie

Ons het reeds in detail kyk na die bergpredikasie gekyk. Dit wys vir ons hoe Jesus se preke gelyk het.

3.3.2 Matt 8-9: Wonderverhale (3-3-3)

Gaan hoofstukke 8-9 deur en skryf neer wat jou opval………………………………………………………………

……………………………………………………………………………………………………………………………….

Die volgende val op as mens hierdie hoofstukke lees.

Daar is ‘n patroon – daar word eers drie wonders vertel, dan word dit onderbreek, weer drie met nog ‘n onderbreking en dan nog drie. Dit wys vir ons dat Matteus bewustelik die wonders so georden het. Hy het wonders wat Jesus op verskillende tye gedoen het, bymekaar gemaak en dit so saam vir ons aangebied. Onthou, die groot belangstelling vir hulle was die boodskap en nie noodwendig die feite soos dit agter mekaar gebeur het nie. Matteus wil vir ons die ‘gevoel’ gee van wat dit beteken dat Jesus wonders doen.

Die wonders het beslis iets te doen met die preke (boodskappe) van Jesus, soos ons dit ook in die Bergpredikasie gelees het. Wat is die verhouding? Hoekom dink jy was dit belangrik vir Jesus se preke dat Hy wonders gedoen het?

Wel, om iets te sê is een ding, maar om iets te bewys is ‘n ander. Jesus kom beweer dat Hy van God af kom, die Messias is en mense kan red. Wie sê dit is waar? Die funksie van die wonders is om die boodskap te ondersteun en waar te maak. Die Jode het geweet dat goeie dinge van God af kom. As Jesus nou goeie dinge doen wat gewone mense nie kan doen nie moet dit beteken dat God op ‘n spesiale manier in Hom werk. Dit bewys die wonders. Gewone mense kan dit nie doen nie en dit bewys dan dat Jesus nie sommer ‘n gewone mens is nie. Hy kom van God af.

Daar is nog meer – die Jode het die Messias verwag. Hy was aan die kom, maar hoe het hulle geweet wie is hy? Hoe kon hulle hom herken? Twee dinge was belangrik: a) die profesieë van die Ou Testament moes waar word, met ander woorde, hulle het na die Bybel gaan kyk; b) hy moes wys dat hy van God kom, God se krag deel en dit het Jesus deur die wonders ook gedoen. Jesus het dus aan beide eise voldoen en daarom was die Christene seker hy is die Messias.

Jesus het nie net wonders gedoen ter wille van wonders nie, maar om te wys dat Hy werklik die Messias is. 

Volgende keer gaan ons voort by Matteus 10.

Skrywer: Prof Jan van der Watt

MATTEUS SE VERHAAL OOR JESUS (3) – Jan van der Watt

3. Matteus vertel die verhaal van Jesus op sy manier

Matteus het sy verhaal baie sistematies opgeskryf. Hy het verhale met toesprake afgewissel. Ons gaan die eerste deel van Matteus van nader bekyk.

3.1  Matt 1-2: Geboorte van Jesus

Ons het reeds na die geboorteverhale gekyk. Dit sou miskien goed wees om jouself te verfris en terug te gaan om net weer te gaan kyk wat daar alles oor die geboorteverhaal van Jesus in Matteus staan. Kyk net weer in die lig van wat hierbo staan hoe groot rol die Ou-Testamentiese aanhalings speel. Die verhaal konsentreer ook nie op die herders en skape soos Lukas nie, maar op politieke dinge – Herodes, die koning wat nie van Jesus hou nie, mense uit ander lande, politieke moord op onskuldige kinders, ens. Daar moet ‘n nuwe koninkryk kom… en dit bring Jesus…

3.2 Matt 3-4: Voorbereiding         – Johannes die Doper, die versoeking en die eerste dissipels

Matteus 3-4 is Matteus se manier om jou in die verhaal van Jesus ‘in te lei’. Matteus is nie so geïnteresseerd in die kindertyd van Jesus nie, maar val – na die geboorteverhaal – sommer met die deur in die huis. Maak ‘n lysie van al die dinge wat Jesus volgens hoofstuk 3-4 gedoen het.

Die doop van Jesus kan vergelyk word met sy ‘salwing’ (soos die konings of profete van die ou tyd). Van nou af is Hy dus gereed en moet die werk waarvoor hy gekom het, begin. Die eerste ding wat Jesus doen is om sy grootste vyand vierkantig in die oë te kyk.

Die versoeking  van Jesus

Dat Jesus se openbare  bediening met die versoeking begin is belangrik – daar sien ons wie die werklike vyand is:  nie Herodes of die Romeine nie, maar die duiwel en die bose magte. Jesus kom nie om die Jode polities te verlos van die Romeine nie, maar om die wêreld geestelik te verlos van die mag van die bose. Die verhaal van Jesus begin dus by sy konfrontasie met die duiwel en eindig daarmee as hy gekruisig word en opstaan. Dit vorm die ‘raam’ van die Evangelie. Deur die hele Evangelie probeer die duiwel Jesus dwarsboom, maar sonder sukses. Hy verloor elke keer.

‘n Lekker bybelstudie sal wees om te kyk waar die duiwel, demone of bose magte in Matteus bespreek word en wat elke keer gebeur. As jy lus is, doen dit gerus.

Jesus begin preek kry vir hom ‘n gemeente

Jesus begin daarna met sy openbare bediening en Matteus gee ook sommer vir ons die tema van sy preek: “Bekeer julle, want die koninkryk van die hemel het naby gekom.” (4:17). Twee belangrike dinge word gesê: a) die mense moet hulle bekeer, met ander woorde, hulle moet hulle na God toe draai soos Hy in Jesus na hulle toe kom, b) God se finale heerskappy (koninkryk) is naby. Dan sal hy al sy vyande vernietig en vir ewig heers. Dit is wat Jesus se koms beteken. As hy sy dissipels roep, sê hy dit presies vir hulle: “Kom hier! Kom saam met My, en Ek sal julle vissers van mense maak.” (4:19) – hulle moet mense gaan ‘uitvis’ uit die wêreld om hulle so deel van die koninkryk te maak.

In die volgende gedeelte gaan ons na die boodskap van Matteus kyk.

Skrywer: Prof Jan van der Watt