Die Here kan alles doen (Almag)

Die Here kan alles doen (Almag)

God word die Almagtige genoem (Grieks = Pantokrator, panto beteken alles en krator krag). Hy het al die krag en kan dus enigiets doen.

Juis hieroor is daar al baie gestry. Byvoorbeeld:

  • As God dan almagtig is en al die krag het, hoekom is daar dan nog sonde, of hoekom is daar soveel swaarkry en hongersnood in die wêreld? As God dan so sterk is, hoekom doen Hy nie iets daaraan nie? Waarom kry baie Christene so swaar, selfs as hulle God mooi vra om hulle te help. As God dan almagtig is, waar is Hy?

  • Dan is daar die filosowe onder ons… hulle vra byvoorbeeld vrae soos of God so ʼn groot klip kan maak dat Hy dit nie self kan optel nie; of is daar ʼn beperking aan die aantal engele wat God op die punt van ʼn naald kan laat dans?

Om al die vrae reg te beantwoord, moet ʼn mens maar die Bybel ernstig neem. Openbaring beskryf byvoorbeeld dat God op die troon van die heelal sit en dus almagtig is (Hoofstuk 4). Tog gebeur daar nog slegte dinge ook (Hoofstuk 12-13). Dit is nie omdat God nie mag het om met die slegte dinge af te reken nie; Hy kan en gaan dit in elk geval met die laaste oordeel doen. Dit is eerder ʼn geval dat God in sy almag besluit het om hierdie dinge toe te laat om hulle loop te neem.

As ʼn mens dan vra waarom God dit toelaat, loop jy in jou eie beperkinge vas. Ons is nie God nie en weet ook nie wat God weet nie. God is nie ʼn mens nie en ons is nie God nie. Hy is soveel groter as ons dat ons nie moet dink ons weet alles van Hom nie. (Lees maar Romeine 11:33-36). Hy redeneer buitendien nie soos ʼn mens nie, omdat Hy baie verder kyk en baie meer weet as ons. Daarom moet ons nie te veel vrae vra as dit by God kom nie, want ons gaan nie al die antwoorde nou al kry nie. Ons moet maar net weet: God IS almagtig, maar juis daarom gebruik Hy ook sy almag soos Hy wil. Ons moet Hom nie probeer voorskryf nie. Nee, ons moet eerder rustig en gelowig op Hom bly vertrou

 

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy