Jy behoort aan God. Hy het duur vir jou betaal (Loskoping)

Jy behoort aan God. Hy het duur vir jou betaal (Loskoping)

Die Bybel gebruik gewoonlik beelde om te verduidelik wat met ons gebeur as ons byvoorbeeld gered word.

Een so ʼn beeld is “loskoping”. Slawerny was destyds baie algemeen. Om ʼn slaaf te wees beteken om nie meer jou eie baas te wees nie; ja, jou vryheid is daarmee heen, jy is die eiendom van iemand anders. Amper soos met ʼn tafel of ʼn stoel kon jou baas met jou maak wat jy wil. Daar was tog maniere waarop ʼn slaaf destyds kon vrykom, en een van die maniere was deur “loskoping”. As iemand (sê maar ʼn familielid of vriend) die slaaf se prys vir die baas teruggee, kon die slaaf vrygelaat word. Of daar was ʼn ander gebruik. Die slaaf kon self geld spaar… en raai waar? In die tempel (kerk). Die priester moes dit vir hom hou tot hy genoeg gehad het om sy koopprys vir sy baas terug te betaal. Dan was die slaaf vry!

Hierdie alledaagse beeld pas die Bybel nou op gelowiges toe. Mense is soos slawe van die sonde en die duiwel. Hulle is nie vry nie. Die prys word egter vir ons betaal – Jesus self koop ons los! Dan is ons weer heeltemal vry. Die sonde speel nie meer baas oor ons nie, want ons is nou kinders van God.

 

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy