R. C. Sproul – Jan van der Watt

Vraag

Kan Ek as NG-Lid luister na R.C. Sproul. Hi, jammer om te pla maar ek wil net by julle hoor ek is mal Oor Teologie en ek wil graag my kennis van Christenskap En God Verbreed, Ek is ń Trotse NG-Lid en ek wil nie sommer na ander denominasies luister nie, ek wil net by julle hoor of ek as NG-Lid Kan luister na R.C. Sproul, hy is ń Prebyterian Teoloog, julle Hulp en Bladsy word opreg waardeer.

Antwoord

Prof Jan van der Watt antwoord:

Dankie vir jou navraag. Jy kan gerus na RC Sproul se goed luister. DIe NG Kerk se wortels le sterk in die Presbiteriaanse tradisie waarin Sproul ook staan. Hy sal baie dieselfde se as wat tradisioneel in die NG Kerk gese word. 

Skrywer: Prof Jan van der Watt




Esegiël – Jan van der Watt

Esther vra:

Goeiedag! Ek het ‘n Bybelstudiegroep en moet navorsing doen oor boeke wat ons behandel of ‘n studiegids gebruik aangesien ek nie oor genoeg kennis beskik nie. Ons vind die Bybelkennis oor Romeine baie leersaam en verstaanbaar. Die volgende boek wat ons wil behandel, is Esegiël. Ek kry egter nie genoeg inligting daaroor nie. Is daar enige literatuur of Youtube besprekings wat jul kan aanbeveel asseblief?

Antwoord

Prof Jan van der Watt antwoord:

Dankie vir jou epos en ek hoop dit gaan sommer goed met julle Bybelstudiegroep. Esegiel is ‘n moeilike boek en daar is nogal baie vreemde teoriee oor die boek veral van mense wat dit (veral die profesiee) direk op vandag wil toepas.Wees baie versigtig daarvoor, veral op Youtube. As julle voel die persoon pas die dinge en profesiee sommer op vandag toe en maak allerhande teoriee, los dit dan maar liewer. ‘n Mens moet probeer om die boek eers in sy konteks van destyds te probeer verstaan. Daarom is dit belangrik om die omstandighede en tyd van skrywe mooi in gedagte te hou.  Ek gee maar ‘n paar wenke. a) Biblehub.com het nogal handige inligting. b) as een van julle Die Bybel A-Z of die Eenvolumekommentaar (Bybelenium) het, is daar bruikbare inligting in. c) Op Youtube is daar ‘n mooi beskrywing van Esegiel wat die loop van die boek beskryf: dit is ‘Oorsig: Esegiel 1-33 en deel 2 34-48. Ek hoop dit help ‘n bietjie.

Skrywer:  Prof Jan van der Watt




Het God Jesus letterlik verlaat? – Jan van der Watt

Het God Jesus letterlik verlaat?

Vraag

Pieter vra:

Het God Jesus na aanleiding Markus 15:34 letterlik verlaat aan die kruis?

Antwoord

Prof Jan van der Watt antwoord:

Die teks lees: 15:34: Om drie-uur het Jesus hard uitgeroep: “Eloï, Eloï, lemá sabagtani?” Dit beteken: My God, my God, waarom het U My verlaat?’

Hierdie uitroep van Jesus in Aramees (Jesus se moedertaal) is ‘n aanhaling uit Ps 22:2, ‘n Psalm waarin die skrywer aanvanklik heeltemal verlate en alleen voel, tot God roep en dan ervaar dat sy gebed verhoor is en God tog by hom is. Daarom eindig die Psalm in lofsange vir God. Sommige Bybeluitleggers sien Jesus se uitroep in die lig van die Psalm, naamlik dat Jesus op daardie oomblik alleen en verlate gevoel het, maar tog geweet het dat God Hom nie sal verlaat nie en dat, soos in die Psalm, Hy vertrou het dat alles in lofsange vir God sal eindig.

Ander Bybeluitleggers voel dat bogenoemde verklaring nie presies weergee wat Markus bedoel het nie. Volgens hulle wil Markus beklemtoon dat Jesus heeltemal verlate gevoel het, asof God nie meer daar is nie. Dit is hoe mense wat God verwerp het en by wie Hy nie meer is nie, ook voel. Daarmee beskryf Markus hoe groot Jesus se lyding vir ons was.

Tog het Jesus nie opgehou om God se Seun aan die kruis te wees nie. Daaroor twyfel Markus nie. Dit is egter nie vir Markus ‘n probleem om nogtans die groot lyding van Jesus in terme van Godsverlatenheid te beskryf nie. Die strekking kombineer dus bogenoemde twee verklarings. Jesus het regtig ons sondeskuld gedra en dit het vir Hom gevoel asof God Hom verlaat het, maar tog was God steeds daar en sy opstanding sou dit bewys. Daaroor kan ons saam met die engele bly wees. God se lof het oorwin. 

Skrywer:  Prof Jan van der Watt




DIE WIL VAN GOD VIR DIE WÊRELD EN VIR JOU Hoofstuk 3 (7) – Dionne Craffort

Die mens is bestem vir ‘n ewige lewe en ‘n uiteindelike opstanding uit die dood. Hoeveel dit ookal indruis teen ons rede en ons ervaring van die dood as einde van die mens, bly die verwagting van die ewige lewe die enigste faktor wat werklik hoop en sin gee aan die menslike bestaan. Dit maak nie saak hoeveel mense dit ontken of bevraagteken nie, die Bybel stel dit duidelik dat die wil van God vir gelowiges ‘n heerlike eindbestemming inhou.

   Ons is maar reisigers op ‘n woestyntog oppad na ‘n beloofde land. Wie die eindbestemming uit die oog verloor, is niks anders nie as ‘n verdwaalde mens wat hopeloos swerf in die woestyn sonder enige hoop op redding.

   Die hart van die Evangelie is dat God die ewige lewe skenk aan elkeen wat glo in Jesus Christus as die Seun van God. Hier beteken die ewige lewe ‘n lewe van vreugde in die teenwoordigheid van Christus. Dit is die teenoorgestelde van die ewige dood wat ‘n bestaan is ver verwyder van God af. “Die loon wat die sonde gee, is die dood; die genadegawe wat God gee, is die ewige lewe in Christus Jesus ons Here”.[Rom6:23]

   Ons lewe welliswaar in ‘n verganklike wêreld waarin alles uiteindelik tot niet gaan. Wie egter in die geloof deel het aan Christus se opstanding, is nie bestem tot verganklikheid nie, maar tot die ewige lewe. “En die wêreld met sy verleidelike dinge gaan verby, maar wie die wil van God doen, bly ewig lewe”.{1Joh2:17]

   Die verganklikheid wat kenmerk van hierdie bedeling is, is opgehef toe die ware Lewe in die wêreld ingekom het. Christus is self die Ewige Lewe en daarom kan Hy ook die lewe skenk aan diegene wat aan Hom behoort. “Die Lewe het gekom……. en ons verkondig aan julle die Ewige Lewe wat by die Vader was en aan ons ge-openbaar is”.[1Joh1:2] Die verlossing in Christus geld nie net hierdie lewe nie, maar sluit die gawe van die ewige lewe in. ”En die getuienis behels dit: God het ons die ewige lewe gegee, en die lewe is deur Sy Seun”.[1Joh5:11]

   Die apostel Paulus vat die proses van God se wil met gelowiges mooi saam in Rom6:22 ”Maar nou- julle is vrygemaak van die sonde en in diens van God gestel en die vrug daarvan is dat julle geheilig word, en die uiteinde is die ewige lewe”. Die wil van God sluit nie net vrymaking van sonde, diensbaarheid aan God en heiliging in nie, maar loop uiteindelik uit op die ewige lewe. Die ewige lewe is die vrug wat ingesamel word deur die werking van die Heilige Gees na ‘n lewe van diensbaarheid en gehoorsaamheid.

   Wie nie uitsien na die ewige lewe as voleinding van God se wil nie, het nog nie die wil van God ten volle verstaan nie.

Skrywer: Prof Dionne Craffort