Vals leerstellings – Jan van der Watt

Anton vra:

Hoe kan ʼn mens valse leerstellings herken? (Die feit dat kerke so verskil pla hom en maak dat hy liewer op sy eie die Bybel wil bestudeer.)

Antwoord:

Prof Jan van der Watt antwoord:

Dit is natuurlik goed om die Bybel te bestudeer, tog het ʼn mens ook die gemeenskap van die gelowiges nodig en iemand wat mens kan help om die Bybel beter te verstaan. Die rede is omdat die Bybel 2000 jaar gelede geskryf is en ʼn mens kennis nodig het om dit binne die regte konteks te kan verstaan.

Die vraag is nou hoe mens die dwaalleraars kan identifiseer.

• ʼn Probleem is dat daar baie Christene is wat nie wil aanvaar dat almal nie soos hulle dink nie. As ons egter na die Nuwe Testament self kyk het die vroeë Christene ook van mekaar verskil oor klein detail (Paulus en Johannes het in dieselfde gebiede gewerk, maar hulle het op verskillende maniere oor Jesus gepraat). Tog het hulle oor die sentrale dinge saamgestem, soos dat Jesus vir ons gesterf het, dat Hy ons verlos, dat  God ons liefhet, ens. Ons moet dus nie sommer net iemand afskryf as hy of sy nie met ons saamstem nie. Ons moet eers mooi luister wat die ander sê en probeer verstaan wat gesê word.
• In 1 Johannes 4:1-2 waarsku Johannes ons dat daar tog mense gaan wees wat werklik valse boodskappe dra. Hulle moet ons toets aan die Evangelie van Jesus. As hulle jou probeer wegkry van Jesus af, nie wil leef soos iemand wat Jesus ken, moet leef nie, ens. moet jy versigtig begin word. Jy moet die leiding van die Heilige Gees in die gevalle soek deur te kyk of dit wat gesê of gevra word deur die ander bots met die Evangelie of nie.

My raad is om te luister, te studeer, te probeer verstaan en nie te vinnig te oordeel nie. Tog, moet mens nie dink of voorgee dat alles goed is en kan deurgaan nie. As iets verkeerd is, moet jy nie stilbly nie.

Outeur: Prof Jan van der Watt

Die Groot Geloofswoordeboek: Die Eindtyd (2)

• Die tekens van die tye

Die tekens van die tye is die tekens van die nabye wederkoms van Christus. Sowel Jesus as die skrywers van die Nuwe Tes­tament noem ‘n aantal gebeurtenisse wat sal dien as tekens dat sy koms naby is. Maar let mooi op na hierdie formulering: Tekens dat sy koms naby is, nie tekens wanneer sy koms naby sal wees nie.

Wat beteken dit? Moes die tekens mense eendag in die verre toekoms help om te bereken wanneer sy koms naby sal wees, of moes die tekens die eerste Christene daagliks daaraan herinner dat sy koms (alreeds in hulle tyd) naby was? Kom ons kyk.

Daar is algemene tekens soos oorloë, aardbewings, honger­sno­de, verdrukking, geloofsafval (Matt 24:3 ev). Maar daar is ook meer spesifieke tekens soos die antichris, die Jode en die hei­densending.

Die algemene tekens is dinge wat deurlopend in elke ge­slag ge­beur: oorloë, aardbewings, hongersnode, verdrukking, ge­loofs­afval. Hierdie tekens sou dus moeilik kon dien as aandui­ding wanneer sy koms naby sou wees. Elke geslag beleef hierdie tekens.

Daar is ‘n taamlik algemene oortuiging onder baie Christene dat hierdie tekens wel altyd voorkom, maar dat dit kort voor die wederkoms intensiewer sal word. Maar dit is ‘n ver­leent­heids­op­lossing. Jesus sê nooit iets daarvan nie, en indien dit wel so is, hoe intensief moet dit dan word voordat ons daaruit moet aflei dat die koms nou naby is?

Dit lyk dus beter om Jesus se woorde net so te aanvaar soos dit daar staan: “As julle (sy dissipels) … ” Dit was bedoel as herinnering aan sy dissipels (en daarom ook aan elke geslag na hulle) dat sy koms naby is. Dit was nie bedoel as hulp om te bereken wanneer sy koms naby sou wees nie.

Deur die eeue heen was hierdie tekens dus ‘n staande herinne­ring daaraan dat die Here enige oomblik kan kom. Hulle funksie is inderdaad juis om ons voortdurend gereed te hou, presies soos Jesus dit oorspronklik gestel het: “Om dieselfde rede moet julle ook elke oomblik gereed wees, want die Seun van die mens kom op ‘n uur dat julle dit nie verwag nie” (Matt 24:44).

Maar wat dan van die spesifieke tekens: die antichris, die Jo­de en die heidensending? Sou hierdie tekens vir ‘n mens ‘n aanduiding kon gee van wanneer Christus se koms naby sal wees? Die vraag self is natuurlik in terme van die Nuwe Tes­ta­ment klaar ‘n vreemde vraag. As Christus se koms al in die tyd van die Nuwe Testament naby was, is dit dan sinvol dat daar sekere tekens is om te help bereken wanneer dit naby sal wees? Maar kom ons kyk een vir een na hierdie tekens.

Antichris (*Chiliasme)

“Antichris” is ‘n Griekse woord wat in die Bybel net in die eer­ste en die tweede brief van Johannes voorkom. Dit verwys na ‘n figuur in die eindtyd wat radikaal teenoor Christus (anti-Christus) staan en die gelowiges vervolg. Volgens die briewe van Johannes was daar alreeds in sy tyd baie “antichriste” of misleiers en vyande van Christus wat die gelowiges vervolg het (1 Joh 2:18-25; 4:1-3; 2 Joh v 7-9).

Die meeste Christene stem saam dat daar wel ook op an­der plek­ke in die Bybel van hierdie figuur sprake is, onder andere 2 Tessa­lonisense 2:3-12 en Openbaring 13.

Onder Christene is daar verskillende sienings oor die anti­chris. Die Chiliaste en die Dispensasionaliste in die algemeen is oortuig dat ons eintlik nou eers in die eindtyd leef en dat die anti­christe waarvan Johannes in sy briewe skryf, maar net voorlopers was van die eintlike antichris wat nog moet kom. Hierdie antichris sal ‘n politieke wêreldheerser wees wat die gelowiges stelselma­tig en vreeslik sal vervolg in wat bekend staan as die Groot Verdruk­king (*Chiliasme), wat sewe jaar lank sal duur.

Dit is egter goed om noukeuriger na hierdie saak te kyk. Dit wat Johannes uitdruklik skryf, maak dit onmoontlik om in hierdie antichriste maar net voorlopers van die eintlike antichris te sien. Johannes skryf dat dit die laaste uur is. Dus sal hy nie van voorlopers skryf nie. As hy in die laaste uur skryf, sal hy tog seker oor die eintlike antichris skryf. En dan herhaal hy ook nog dat die feit dat daar reeds in sy tyd baie antichriste is, bevestig dat hulle in die laaste uur leef. Dan kan hierdie antichriste mos nie voorlopers wees nie. Die feit dat hy van antichriste (meervoud) praat, is nie vreemd nie. Ons weet dat daar verskillende prentjies van die antichris in die Nuwe Testament is: ‘n godsdienstige leier (2 Tess 2), ‘n politieke leier (Op 13) en mense (meervoud!) wat in die gemeente was, maar die gemeente verlaat het (1 Joh 2:19 ev).

Verderaan in hierdie deel skryf Johannes nog meer oor die antichris. En dan blyk dit dat dit juis om meer as een persoon gaan, want elkeen wat nie bely dat Jesus werklik die Christus (Messias) is nie, is ‘n antichris (2:22 ev).

1 Johannes 4:1-3 bevestig hierdie siening. Hier word aan die gelowiges ‘n maatstaf gegee waaraan hulle profete kan meet om te weet of hulle eg is en of hulle die gees van die antichris adem. Van sulke profete word dan geskryf dat hulle die gees van die antichris is “van wie julle gehoor het dat hy kom en wat nou reeds in die wêreld is” (4:3). Dit gaan dus om dinge wat deel van die gemeentelede se lewe is. En die derde en laaste verwysing waar die woord “antichris” gebruik word, bevestig dit. Hier word geskryf van baie verleiers wat “te voorskyn gekom het in die wêreld”, en hulle is dié wat nie erken dat Jesus die Christus is wat mens geword het nie. En dan vervolg Johannes uitdruklik: “dit is wat ek met ‘die misleier’, ‘die antichris’, bedoel” (2 Joh v 7).

Die antichris het dus alreeds in Johannes se tyd in baie ver­skillende vorme en persone gekom. Dit ondersteun die gedagte dat die eindtyd alreeds met Jesus se aardse optrede aangebreek het en dat sy wederkoms al in die tyd van die Nuwe Testament naby was. Maar dit beteken ook dat die koms van die antichris nie die gelowiges gehelp het om te bereken wanneer Jesus se koms naby sal wees nie, maar eerder bevestig het dat sy koms – toe al – naby was.

Dit bring ‘n interessante faset van hierdie tekens na vore: hulle was nooit bedoel om mense te help bereken wanneer die wederkoms naby sal wees nie – wat onsinnig sou wees omdat die wederkoms alreeds naby was – maar om te bevestig dat die wederkoms naby is.

Natuurlik het die antichris sedertdien al weer in baie ander vor­me of persone verskyn. En natuurlik kan hy nog weer in ander vor­me of persone na vore kom. Maar dit is elke keer net om te bevestig dat Christus se koms naby is. Die tekens van die tye is nooit gegee om Christene in staat te stel om te bereken wanneer Christus se koms naby sou wees nie, eenvoudig omdat sy koms van die begin af naby was. Dit is gegee om hulle voortdurend daaraan te herinner dat sy koms naby is. Omdat hulle baie gely het, was dit vir hulle ‘n troos. En vir die ongelowiges ‘n waar­skuwing.

Outeur: Prof Adrio König

Die hemel en die hel – Jan van der Watt

Twee lesers het die volgende twee vrae gevra wat by mekaar aansluit:

Anton vra:

Ek wil graag die geleerdes se opinie hê oor al die boeke wat deesdae geskryf word “5 sekondes na dood” “Hemel is ʼn werklikheid” “Hel is n werklikheid” en almal wat al sê hulle is al hel toe en hemel toe is dit Bybels?

ʼn Ander leser vra:

Is die hemel ‘n werklikheid? Ek verstaan van dit wat ek in die Bybel lees dat daar 3 hemele is, nl. die wolke hemel, die buite(sterre) hemel en dan daar waar God die Vader en Jesus is. Ek het onlangs gelees van iemand wat hemel en hel toe is en ‘n boek geskryf het.  Nou wil ek eintlik ook weet of dit kan gebeur dat jy hemel of hel toe kan gaan.  Ek lees nêrens in die Bybel dat jy daarheen kan gaan terwyl jy  nog lewendig is nie.  Dit is mos verborge? Of verstaan ek verkeerd.  As jy die Bybel lees is daar definitief ʼn hemel, want daar is 553 verse om dit te bevestig, maar is dit ‘n werklikheid dat mens daarheen kan gaan en terugkom om daarvan te vertel? Ek weet nie of ek nou lekker sin maak en my vraag reg uitdruk nie, maar die soort boeke en “getuienisse” laat mens wonder….

Antwoord:

Prof Jan van der Watt antwoord:

Die hemel en die hel is ʼn werklikheid. Tog weet ons nie hoe dit gaan lyk of hoe dit daar gaan wees nie (lees van die ander artikels hier by www.bybelkennis.co.za). Ons weet dat die hemel ʼn wonderlike bestaan saam met God gaan inhou en dat die hel nie ʼn plek is waar ʼn mens graag sal wil wees nie. Tog is die beskrywings in die Bybel van die hemel en hel pogings om hierdie waarhede te beskryf – die hemel word byvoorbeeld as ʼn wonderlike stad van goud beskryf (Openbaring 21), of ʼn paradys (tuin – Lukas 23:43). Dit is natuurlik beelde wat vir ons voorstellings wil gee van hoe wonderlik die hemel gaan wees. Die name vir die hel, soos ‘gehenna’, herinner byvoorbeeld aan die ashoop van Jerusalem waar daar altyd rook, stank, en gemors was. So sleg, het die mense gesê, gaan die hel wees; of soos ʼn vuur waarin jy gaan land waar jy altyd gaan brand. Hoe dit regtig so sonder God gaan wees, weet niemand nie.

Nou is daar mense wat beweer dat hulle weet hoe die hemel gaan wees en dat hulle daar was. Natuurlik kan en wil ons nooit die egtheid van die ervarings van die mense betwyfel of maak dat hulle nie ernstig is met wat hulle vertel nie. In die Bybel kry ons byvoorbeeld die verhaal van die ryk man en Lasarus (die arme bedelaar – Lukas 16:19-31). Beide is toe dood en dan word daar beskryf hoe die een in die hemel is en die ander een nie. Dit is egter net In gelykenis (ʼn storie) wat Jesus vertel het om sy boodskap oor te dra. Dit is nie bedoel om ʼn akkurate beskrywing van die hemel te wees nie. Wat egter wel pla met die mense wat so presies weet hoe die hemel gaan lyk is dat hulle meer weet as die Bybel. Die verskil is dat hulle letterlik presies weet hoe dit gaan wees en die Bybel die saak eintlik oop laat – dit gee ons net beelde soos ʼn stad of ʼn lekker tuin.

Nou is daar mense wat sê dat hulle ʼn helder lig gesien het met figure ens. Dan beweer hulle hulle was in die hemel. Weer wil ek nie die opregtheid van die mense betwyfel nie. Wat ʼn mense egter moet weet is dat vlieëniers van oorlogsvliegtuie identiese ervarings het as hulle deur toetse gesit word waar hulle breine aan suurstoftekort ly. Dit mag wees dat die mense, wat sê dat hulle dood was, op die punt van suurstoftekort in die brein gekom het en toe die wit lig ervaar het.

Al persoon wat ek van weet wat regtig bo alle twyfel in die hemel was en wat weer teruggekom het, was Jesus. Hoe dit ook al sy – party van ons sal skepties wees en ander sal sulke ervarings aangryp. Een ding moet ons egter nie doen nie – ons moet nie ons geloof of sulke ervarings bou nie, maar op Jesus alleen.

Outeur: Prof Jan van der Watt

Positief in die wêreld – Jan van der Watt

Chris vra:

Hoe kan ek as Christen positief in hierdie wêreld raak ? ( Hierdie wêreld is Suid-Afrika ) As wit, persoon is dit half onmoontlik. Ek bid elke dag vir wysheid.

Antwoord:

Prof Jan van der Watt antwoord:

Hierdie is ʼn baie relevante vraag: Hoe bly mens positief? In ʼn sekere sin is ʼn mens baas van jou eie lewe. As ek dit sê, moet ʼn mens onthou dat daar soms dinge gebeur waaraan jy net mooi niks kan doen nie. In sulke situasies moet jy maar net aan jouself werk sodat die situasie jou nie oorweldig nie. Kyk na jouself, want die Here verander nie noodwendig slegte situasies nie, maar verander wel mense om die slegte situasies te hanteer en staande te bly in die situasies.

Die lewe gaan baie oor wat jy self daarvan maak. Jy kan besluit of iets vir jou belangrik is of nie. As jy besluit iets is vir jou belangrik sal dit jou baie pla as daar iets mee verkeerd gaan. Een persoon kan baie ontsteld raak as die doppie nie op die tandepastabuis gedraai is nie en sal selfs daaroor baklei, terwyl iemand anders nie eers ʼn oog sal knip nie. Hoekom? Die probleem lê nie by die tandepasta nie, maar by die manier waarop die twee persone die tandepastabuisie en doppie sien. Vir die een is dit belangrik dat die doppie op is, en as dit nie is nie, vererg hy hom vreeslik. Vir die ander een maak dit nie saak nie en daarom pla dit hom glad nie. Dit gaan dus oor jou instelling en gesindheid.

Ons moet sorg dat ons die dinge wat rondom ons gebeur reg waardeer. Ons moet ons nie te veel bekommer oor dinge rondom ons wat nie belangrik is of waaraan ons nie veel kan doen nie. Dit maak ons net ongelukkig. Ons moet eerder die lewe met die regte waardes benader. ʼn ‘Waarde’ is iets wat vir ons waarde het en dus belangrik is. Ons moet die regte dinge wat regtig belangrik is in ons lewe belangrik maak. Neem Paulus as voorbeeld: hy was in die tronk toe hy die brief aan die Filippense geskryf het. Uit hoofstuk 1 lei ons af dat daar baie dinge verkeerd gegaan het en dat hy swaargekry het, selfs tot op die punt dat hy gedink het hy gaan dood (lees gerus Filippense 1). Tog is Filippense die brief van blydskap (kyk Filippense 4:4) en nie die brief van moedeloosheid nie. Waarom? Dit lees ons in Filippense 3 – daar sê Paulus dat dinge wat voorheen vir hom belangrik was, nie meer belangrik is nie. As daar dinge gebeur, pla dit hom nie. Wat nou vir hom belangrik is, is Jesus en om soos Hy te wees, al beteken dit dat dinge mag swaar gaan. Dit moet jou nie onderkry nie, want die belangrikste is dat jy aan Jesus behoort. Dit moet jou belangrikste ‘waarde’ wees. Daarom sal baie van die gewone dinge jou nie meer so ontstel nie. Dit beteken nie dat jy jou oë daarvoor toe hou nie, maar net dat jy jouself nie meer daaroor ontstel nie, want jy besef dit is nie so belangrik nie. Daar is ander dinge, Jesus se dinge, wat belangriker is.

Moenie ʼn maagsweer oor die verkeerde dinge kry nie!

Outeur: Prof Jan van der Watt