Daar is net een God (Monoteïsme)
Daar is net een God (Monoteïsme)
Monoteïsme is ʼn woord wat afgelei is van die Griekse woorde, mono (wat “een” beteken) en teïsme (wat “God” beteken). Dit is dus die naam wat vir godsdienste gegee word wat aan net een God glo. Die Christendom is byvoorbeeld een so ʼn godsdiens. Ons glo daar is net een God en dit is die God wat alles gemaak het.
Monoteïsme staan gewoonlik teenoor politeïsme (“poli” is weer die Griekse woord vir “baie”). Die woord politeïsme dui op godsdienste met baie verskillende gode (sien by politeïsme). In die Tien Gebooie verbied God mense baie duidelik om enige ander gode behalwe die ware God te aanbid. Enige poging om meer as een god te aanbid, word deur die ware God gesien as ʼn verwerping van Hom. Jy mag die ware God dus nie saam met ander gode aanbid nie. Jy moet Hom alleen aanbid en dien. Ja, om so in net een God te glo en Hom alleen te dien, is monoteïsme.
Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy