Mense wat God ongelukkig maak (Sondaars)

image_pdfimage_print

Mense wat God ongelukkig maak (Sondaars)

Sondaars is mense wat nie doen wat God wil nie. Hulle maak God ongelukkig. Die woord sondaars beskryf iemand se status en posisie as ʼn mens wat nie leef soos God dit wil hê nie omdat hy of sy nie aan God behoort nie. Dit is wie die persoon is… ʼn sondaar.

Christene dra nie meer die titel van “sondaars” nie, al doen hulle nou en dan nog sonde. Nee, God het elkeen wat in Hom glo sy KIND gemaak. Christene is koningskinders, geredde mense wat God se erfgename geword het. Om dus ʼn kind van God ʼn sondaar te noem is so goed as om ʼn multimiljoenêr ʼn boemelaar te noem. Dit pas net nie. Daarom praat die Nuwe Testament ook nie van Christene as sondaars nie. Nee, hulle dra ʼn ander status; hulle is God se kinders.

Dit beteken nou nie dat Christene nie ook soms sonde doen nie. Maar dit maak nie van hulle skielik sondaars en nie meer kinders van God nie. As jy ʼn fout maak, hou jy nie skielik op om jou ouers se kind te wees nie. Net so hou ʼn Christen nie skielik op om God se kind te wees as hy of sy sonde doen nie. Wat wel moet gebeur, is dat jy daardie sonde voor God moet regstel. Jy moet om verskoning gaan vra.

Moet jouself nie iets maak wat jy nie is nie. As jy aan God behoort is jou status voor Hom nie die van ʼn sondaar nie, maar van ʼn koningskind. Leef so!

 

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy

image_pdfimage_print