27 Mei: Droom God se drome. – Jan van der Watt

image_pdfimage_print

Hand 10:23-48 (fokus 10:34-43)

 In Hand 10 lees ons van een van die mees dramatiese gebeure in die geskiedenis van die kerk. Die Jode het gedink God se redding is net vir hulle bedoel. Gelukkig maak die Here Petrus se oë oop en stuur hom na ʼn nie-Jood toe, iets wat Jode eintlik nie gedoen het nie (10:28). Maar Petrus moes ‘n les daar gaan leer. Juis so kon Petrus leer dat Jesus die geskiedenis van mense vir altyd kom verander het. Die sluise van redding wat God deur Jesus oopgetrek het gaan ook die nie-Jode oorspoel (10:34-36). Sy liefde en genade loop nie in smal stroompies net na party mense toe nie. Nee, dit bars los in storms oor almal.

Petrus het geleer dat vir God dit nie so belangrik is wie jy is nie, maar waar jy kyk. Toe Petrus van homself begin vergeet en op God se planne en drome begin konsentreer, het dinge rondom hom begin gebeur. Daar ontdek hy toe die God van liefde en aksie.

In ons geestelike lewe is dit nie anders nie. Ons moet ook seker maak dat ons reg kyk. Daarom is dit miskien goed dat ons weer die les by Petrus leer: Kyk van jouself af weg  na wat God vir jou wil wys. Begin sy drome droom… en dan sal die goddelike aksie rondom jou losbars.

image_pdfimage_print

You may also like...