20 Junie: Jy’s ‘n koningskind… dit is jou lewensleuse. – Jan van der Watt

image_pdfimage_print

Rom 3:1-20 (fokus 3:9-20)

In die aanbevelingslys in Rom 3:10-18 staan daar nou nie juis veel wat in mense se guns tel nie. Om die waarheid te sê, dit lyk maar sleg.

Die probleem met hierdie verse is egter dat te veel gelowiges hierdie verse hulle lewensleuse maak. “Ag, die Here moet maar genadig wees, want ek is so swak en vol sonde”. “Ek is maar net ʼn wurm in die stof wat tot niks goeds instaat is nie”, en so gaan hulle aan. Dit is verloortaal in die ergste graad. Dit is die taal van mense wat nie eers wil probeer om ʼn oorwinnaarslewe vir God te lei nie. Voor die sonde nog by hulle aanklop het hulle sommer al klaar ingegee.

Dit is verkeerd vir enige gelowige om so te negatief te dink. Hierdie verse sê beslis ook nie dat gelowiges wurms in die stof van die sonde is wat tot niks goeds in staat is nie. Hierdie verse gaan oor mense wat NOG NIE gered is nie – nie oor geredde mense nie. Mense sonder God lê nog in die stof van die sonde en stik; nie gelowiges nie.

Die verloorwoorde kan nooit geredde mense se lewensleuse word nie! Geredde mense is koningskinders, God se kinders! Hulle is uit die stof van die sonde opgetel. Hulle kan uit God se krag leef en roem oor sy nabyheid en versorging. Dit moet hulle lewensleuse wees. Dit is taal wat erken dat gelowiges nie wurms in die stof van die sonde is nie, maar oorwinnaars in die familie van God.

Jy is nie ʼn sondewurm nie, maar ʼn koningskind. Maak dit jou lewensleuse

image_pdfimage_print

You may also like...