Hoe word die doderyk oop- en toegesluit?

image_pdfimage_print

Hoe word die doderyk oop- en toegesluit? – Kobus Kok

‘n Leser vra:

 

Die antwoord waarna ek soek is die waarheid uit die Bybel (met teksverse) wat vir my verduidelik hoe die oop en toesluit van die doderyk plaasvind en wie het die mag om dit te doen.

Antwoord

Prof Kobus Kok antwoord:

 

Jesus het die sleutels van die dood en hades oorgevat

In die Openbaring wat Johannes van God en Jesus Christus ontvang (Openb 1:1), lees ons in Openbaring 1:18 dat Jesus die Lewende is wat vir ewig sal leef. Inteendeel, op die sterkste moontlike manier word dit vir Johannes bevestig deur die beeld dat hierdie Jesus die sleutels van die dood en die doderyk persoonlik in sy hand hou. In die antieke tyd was die grootste vyand die dood omdat niemand dit ooit kon oorwin nie. Dood was ’n toestand en hades was ’n plek onder die aarde met ’n vreesaanjaende god Hades aan die beheer daarvan. In die oorspronklike Grieks van Openbaring 1:18 staan daar dat Jesus die sleutels van Hades in sy hande hou. Die antieke Grieke en selfs die Jode in die Ou Testament het verwys na die “hekke van die dood/hades” (Job 17:16; 38:17; Ps. 9:13; 107:18). In die Griekse mitologie en godewêreld was Hades die god van die onderwêreld, die bose ou wat jou kom haal en toesluit die dag as jy sterf. Niemand kon ooit uit die greep van Hades en sy magtige doods-ryk ontsnap nie. Hades was die magtige een met die sleutels van die doderyk in sy hand. Min het Hades geweet dat God ’n plan van lewe het wat met skitterende lig sy donker skaduwêreld sou transformeer en ontmagtig en daarmee Sy kinders sou bevry tot ’n lewe van hoop.

 

Jesus oorwin die dood en triomfeer

Jesus het die dood oorwin toe hy sy lewe neerlê en dit weer opneem (vgl. Johannes 10:17-19). Reeds in Johannes 1:4 lees ons dat Jesus die bron van die lewe is en dat hy die lig is wat lewe gee. Die duisternis kon hom nie oorwin nie, inteendeel, Jesus het die duisternis totaal oorwin in die groot triomftog van sy opstanding (vgl. Kol 2:15). Dit is hoekom die opstanding in die Christelike teologie so ‘n belangrike dimensie is.  

 

Jesus het die mag

In die antieke tyd was die ou met die sleutels in sy hand, die ou met die mag, hy was die een wat kon besluit wie in en uitgaan. Deur die opstanding het Jesus die sleutels van die dood en van Hades oorgeneem vir altyd (Openbaring 1:18). Jesus is lewe en hy skenk lewe aan sy kinders. Vir al sy kinders is die dood as plek van duisternis toegesluit en die lewe oopgesluit.  Nou is dood en hades nie meer ’n plek om te vrees nie. God se lewe het oorwin, en herskep jou dood en donkerte in splinternuwe lewe (Joh 5:28; vgl. Ook 16:19).

 

Ongelukkig is Hades tog die plek waar ongelowiges heen sal gaan. Hulle sal die greep van die ou vyand nie kan ontsnap nie. Gelowiges kan egter seker wees dat hulle die ewige dood en pynlike wêreld van Hades sal ontsnap (Filippense 1:23; 2 Kor. 5:8).

 

Skrywer: Prof Kobus Kok

 

image_pdfimage_print