26 Maart: Jou binnekant en buitekant moet dieselfde lyk. – Jan van der Watt

image_pdfimage_print

Luk 11:27-44 (fokus 11:37-44)

“Hoekom gee julle nie ook julle binnekant vir die Here nie?”, vra Jesus (11:41) vir die Farisseërs. Aan die buitekant leef hulle vreeslik vroom, maar dit is alles net skyn. Hulle binnekante is vuil en hulle probeer dit wegsteek. Hulle het ‘n “kortsluiting-lewe” gelei. En almal weet dat as daar ‘n kortsluiting is, kan daar nie krag vloei nie. Dan loop dinge verkeerd.

Die kortsluiting het gekom toe die Fariseërs gedink het die buitekant maak saak, maar nie die binnekant nie. Dit was ‘n buitekant wat anders gelyk het as die binnekant. So moet die Here se mense nie lyk nie. Hy wil nie hê hulle moet dinge wegsteek nie. Soos hulle binne is, moet hulle buite ook wees en omgekeerd.

Om binne soos buite te lyk, vra eerlikheid. Eerlikheid met die Here, want ons binnekant behoort aan Hom. Hy sal ons binnekant skoon en rein maak. Maar dit vra ook eerlikheid met jouself, want ons moet ons binnekant skoon hou sodat die Here daar tuis kan voel. En ‘n mooi binnekant is die sekerste resep vir ‘n mooi buitekant, want, wat binne is, sal buitentoe kom. Dit kan niemand keer nie.

Oppas vir ‘n “kortsluitingslewe” waar jou buitekant anders lyk as jou binnekant. Dit is nie eerlik met God nie en ook nie met jouself nie. Gee jou binnekant en jou buitekant vir die Here!

image_pdfimage_print

You may also like...