Gebruike en Gewoontes in die Bybel: ’n Besoek aan Moderne Jerusalem (2) – JP Louw
Hiskia se tonnel
Met ‘n flits en gepaste klere kan ‘n mens van die fontein Gihon deur die driekwart kilometer tonnel loop tot by die bad van Siloam. In die tonnel is ook die plek te sien waar die grawers van weerskante bymekaar gekom het. Ook die skag waardeur Joab geklim het om in die stad te kom, is te sien.
Die familiegraf van Herodes. Die klipwiel is die deur wat die graf toerol.
Ander besienswaardige plekke
Aan die westekant van die huidige Jerusalem by die Koning Dawid Hotel is ‘n tuin waar Herodes se familie moontlik begrawe is. In die tonnel kan ‘n mens afklim en die nisse in die gange sien waar die liggame neergelê was. In die noordooste van die stad is onder die bouvalle van ‘n ou kerk die oorblyfsels van die bad van Betesda. Een van sy pilaargange is opgegrawe en mens kan tot by die modderwater afklim. Buite die muur is Salomo se steengroewe waar baie van die Tempel se klip uitgehaal is. Soms word hier nog ‘n skaapmark gehou soos in antieke tye.
Op die Olyfberg staan die Pater Noster (“Ons Vader”) Kerk waar dié gebed in ‘n menigte tale teen die mure aangebring is-ook in Afrikaans. Hier, so word gesê, het Jesus oor die voleinding van die tye met sy dissipels gepraat.
Die Pater Noster Kerk op die Olyfberg
Betlehem
Tien minute met ‘n bus na Betlehem bring ‘n mens by die Kerk van die Geboorte waar gesê word dat die stal was waarin Jesus gebore is. Hierdie kerk, word gesê, is een van die oudste kerke in die wêreld. Van hier is dit nie ver na die veld van die skaapwagters nie. Daar is twee plekke wat aangewys word: een by die YMCA-gebou waar daar grotte is, en die ander is by ‘n kerk met baie skilderye oor Jesus se geboorte.
‘n Mens kan besef dat deur die eeue baie spekulasies rondom plekke en gebeure ontstaan het en dat verskeie tradisies sonder enige werklike sekerheid ontstaan het. Baie plekke, soos die vorige, en ander soos die oppersaal waar Jesus die nagmaal ingestel het, die Via Dolorosa, die plek van die hemelvaart, ens. het deur die eeue ontwikkel met die aanwysings wat hulle vandag het. Oor sommige is kerke gebou en so het die plek ‘n vaste aanwysing gekry. Al is baie hiervan onseker, en sommige beslis foutief, het dit vir die Christendom deur die eeue groot waarde gekry, of dit nou as reëel beskou is, of by wyse van assosiasie toegedig word. Nogtans adem die plekke ‘n atmosfeer wat die gedagtes inkleur met ‘n lokalisering van eertydse gebeure.
Skrywer: Prof JP Louw